މިދިޔަ މަހުގެ ތެރޭގައި ރިޒާވުގެ ހާލަތު އިންތިހާއަށް ދަށްވުމަށް ފަހު، މަސް ނިމުނުއިރު ދައުލަތުގެ ބޭނުންކުރެވޭ ރިޒާވުގައި 61 މިލިއަން ޑޮލަރު ހުރި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފި ކަމަށް އިއްޔެ ރިޕޯޓުކުރި އެވެ.
އެމްއެމްއޭގެ ތަފާސްހިސާބު ޕޯޓަލްގައި ހުރި މައުލޫމާތުން ދައްކާ ގޮތުގައި މިދިޔަ މަސް ނިމުނުއިރު ގްރޮސް އިންޓަނޭޝަނަލް ރިޒާވުގައި 443 މިލިއަން ޑޮލަރު އެބަހުއްޓެވެ. މިއީ އޭގެ ކުރީ މަހަށް ވުރެ 28 މިލިއަން ޑޮލަރު އިތުރު އަދަދެކެވެ. އަދި ބޭނުންކުރެވޭ ރިޒާވުގައި ހުރި އަދަދު 18 މިލިއަން ޑޮލަރު އިތުރެވެ.
ރިޒާވުގެ ހާލަތު ރަނގަޅުވެފައިވާއިރު، މިދިޔަ މަހުގެ އެއް ހިސާބެއްގައި ރިޒާވު އެއްކޮށް ހުސްވީ ކަމަށް އިތުބާރު ހުރި މަސްދަރުތަކުން "އަދަދު" އަށް މައުލޫމާތު ދިނެވެ. ސަރުކާރުން މި ހަބަރުތައް ދޮގުކުރުމަށް ފަހު ބުނީ، ރިޒާވު އެ ވަރަށް ނުވެއްޓޭ ކަމަށާއި މަސް ނިމެންވާއިރަށް ރަނގަޅު ކުރެވޭނެ ކަމަށެވެ.
ބޭނުންކުރެވޭ ރިޒާވުގައި މި ވަގުތު ހުރި އަދަދަކީ ރާއްޖޭގެ ޒަރޫރީ އިމްޕޯޓުތަކަށް މަހަކަށް ބޭނުންކުރެވޭ ވަރުގެ ފައިސާ އެވެ.
ރިޒާވުގައި ހުރި ފައިސާގެ އަދަދު އިތުރުވެފައި މިވަނީ ވޭތުވި އަހަރުތަކުގައި ނުވެއްޓޭ ވަރަށް ރިޒާވުގެ ހާލަތު ދަށަށް ދިޔުމަށް ފަހުގަ އެވެ. އެމްއެމްއޭއިން ކުރިން ބުނެފައިވަނީ ރިޒާވު ރަނގަޅު ކުރުމަށް ރިޒާވު ބޭންކު އޮފް އިންޑިއާއާއެކީ 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީއެއް ހަމަޖައްސައި، ގްރީން ބޮންޑެއް ވިއްކާނެ ކަމަށެވެ.
މިކަންކަން ފަހިވުމުން މިހާރަށް ވުރެ ވެސް ރިޒާވުގެ ހާލަތު ރަނގަޅު ކުރެވޭނެ އެވެ. އަދި ސަރުކާރުން މި އަހަރުގެ ތެރޭގައި ހަރަދު ކުޑަކުރަން އަޅާ ފިޔަވަޅުތައް ތަންފީޒުކުރަން ފެށުމުން އެއަށް ވުރެ ވެސް ރިޒާވުގެ ހާލަތު މަތި ކުރެވޭނެ ކަމަށް ފިނޭންސް މިނިސްޓްރީން ބުނެފައިވެ އެވެ.
