ދެ ސައިކަލެއް ޖެހި މާލޭގައި އަނެއްކާ ވެސް މިރޭ އެކްސިޑެންޓެއް ހިނގައިފި ކަމަށް ފުލުހުން ބުނެފި އެވެ.
ފުލުހުން ބުނީ މި އެކްސިޑެންޓު ހިނގާފައިވަނީ މިރޭ 6:30 ހާއިރު ކަމަށެވެ. އެ އެކްސިޑެންޓު ހިނގީ މާފަންނު ބަސް ސްޓޭޝަން ކައިރިން ބޮޑުތަކުރުފާނު މަގުގަ އެވެ.
އެކްސިޑެންޓުވި ޖީއެން ސައިކަލަކާއި ވޭވް ސައިކަލެއް ފެންނަ ވީޑިއޯއެއް ސޯޝަލް މީޑިއާގައި ދަނީ ދައުރުވަމުންނެވެ. އެ ވީޑިއޯއިން އަނިޔާވި މީހަކު ނުފެނެ އެވެ. ނަމަވެސް ދެ ސައިކަލަށް ފުދޭވަރަކަށް ބޮޑެތި ގެއްލުންވެފައިވެ އެވެ.
ފުލުހުން ބުނީ، މި އެކްސިޑެންޓުގައި އަނިޔާވީ ދިވެހި ފިރިހެނަކަށާއި ބިދޭސީ ދެ ފިރިހެނުންނަށް ކަމަށެވެ. އެ ދެ މީހުންނަށް ވެސް އައިޖީއެމްއެޗުގައި ފަރުވާދެމުންދާ ކަމަށްވެ އެވެ. ނަމަވެސް އަނިޔާތަކުގެ ތަފުސީލެއް ފުލުހުން ނުދެ އެވެ. އެއްވެސް މީހެއްގެ ހާލު ސީރިއަސް ކަމަކަށް ވެސް ނުބުނެ އެވެ.
ނަމަވެސް މައްސަލަ ތަހުގީގުކުރަމުންދާ ކަމަށް ފުލުހުން ބުންޏެވެ.
މި ފަހުން މާލޭގައި އެކްސިޑެންޓުތައް ވަނީ ގިނަވެފަ އެވެ. އެގޮތުން ހުޅުމާލެ އަދި މާލޭގައި ސައިކަލަކާއި ކާރެއް ޖެހުނު އެކްސިޑެންޓަކާއި މާލޭގައި ސައިކަލަކާއި ކާރެއް ޖެހި ހިނގި އެކްސިޑެންޓެއްގައި ސައިކަލު ދުއްވި ދެ މީހުން ވަނީ މަރުވެފަ އެވެ.
އިއްޔެ އެކަނިވެސް މާލެ ސަރަހައްދުގައި ތިން އެކްސިޑެންޓެއް ހިނގި އެވެ.
މަގުމަތީގެ އެކްސިޑެންޓުތައް މި ދުވަސްވަރު ގިނަވެފައިވާއިރު، ސަރުކާރުން ވަނީ އެކްސިޑެންޓުތައް ހުއްޓުވަން ހާއްސަ ފިޔަވަޅުތަކެއް އަޅަން ނިންމާފަ އެވެ. މި ފިޔަވަޅުތައް އަޅަން ނިންމީ ހުކުރު ދުވަހު ހުޅުމާލޭގައި ހިނގި އެކްސިޑެންޓެއްގައި 23 އަހަރުގެ ޒުވާނަކު ނިޔާވުމާ ގުޅިގެންނެވެ.
އެގޮތުން، ރޭސިންއަށާއި ޑްރިފްޓިންއަށް ހުޅުމާލެއިން ދޫކޮށްފައި އޮންނަ ސަރަހައްދު އަތުލައި، ގަވާއިދާ ހިލާފަށް އުޅަނދު ދުއްވާ މީހުންގެ ލައިސެންސުން ޕޮއިންޓު ކަނޑަން ފަށަން ރައީސް ޑރ. މުހައްމަދު މުއިއްޒު ހޮނުހިރު ދުވަހު ނިންމެވި އެވެ.
