ހުޅުމާލޭގައި ބާރު ސްޕީޑުގައި ދިޔަ ކާރަކާއި ސައިކަލެއް ޖެހި، ސައިކަލް ދުއްވަން އިން ޒުވާނާ އަށް ބޮޑެތި އަނިޔާތަކެއް ލިބިއްޖެ އެވެ.
މިއަދު ހެނދުނު 6:50 ހާއިރު އެ އެކްސިޑެންޓު ހިނގީ ހުޅުމާލޭ ފޭސް 2 ގައި، އެންމެ ފަހުން ހުޅުވި މިސްކިތް ހުރި ސަރަހައްދުގެ މައި މަގުގަ އެވެ.
އެ އެކްސިޑެންޓުގައި ސައިކަލް ދުއްވަން އިން ޒުވާނާ އަށް ސީރިއަސް އަނިޔާތަކެއް ލިބިފައިވާ ކަމަށް ފުލުހުން ބުންޏެވެ. އޭނާ އަށް ފަރުވާ ދެމުންދަނީ ހުޅުމާލޭ ހޮސްޕިޓަލްގަ އެވެ.
އެ ޒުވާނާގެ ނަމެއް، އަދި ލިބުނު އަނިޔާގެ ތަފްސީލެއް ފުލުހުން އަދި ހާމައެއް ނުކުރެ އެވެ.
މަންޒަރު ފެނުނު ބައެއް މީހުން އަދަދު ނޫހަށް ކިޔައިދިން ގޮތުގައި އެކްސިޑެންޓުވި ކާރު ބާރު ސްޕީޑުގައި ދުއްވާފައި ދިޔައީ، ހިޔާ ފްލެޓުތަކާ ދިމާއިން އުތުރުން ދެކުނަށް ކަމަށާއި، ސައިކަލް ނުކުތީ މިސްކިތުގެ ގޯޅިން މައި މަގަށް ކަމަށެވެ.
މި މައްސަލަ ފުލުހުން އަންނަނީ ތަހުގީގުކުރަމުންނެވެ.
އިއްޔެ ރޭގައި ވެސް ހުޅުމާލޭގައި ކާރަކާއި ސައިކަލް ޖެހި ހިނގި އެކްސިޑެންޓުގައި ސައިކަލް ދުއްވަން އިން 23 އަހަރުގެ ޒުވާނާ ވަނީ ނިޔާވެފަ އެވެ. އެ މައްސަލައިގައި ކާރު ދުއްވަން އިން ޒުވާނާ ހައްޔަރުކުރި އެވެ. އޭނާ އަތުގައި ޑްރައިވިން ލައިސަންސް ވެސް ނެތެވެ.
