ކުރީގެ ރައީސް އަބްދުﷲ ޔާމީނު ހައްޔަރުކުރަން ކޯޓު އަމުރެއް ނެރުނު މައްސަލާގެ ތަހުގީގީ ރިޕޯޓަކާއި އެންޓި ކޮރަޕްޝަން ކޮމިޝަނު (އޭސީސީ) ގެ ތަހުގީގީ ރިޕޯޓެއް ކަމަށް ބުނެ އަސްލު ނޫން ރިޕޯޓެއް ދައުރުކުރަމުންދާ މައްސަލައެއް ބަލަމުންދާ ކަމަށް ފުލުހުން ބުނެފި އެވެ.
ފުލުހުން މިއަދު ނެރުނު ބަޔާނެއްގައި ބުނީ، ޔާމީނު ހައްޔަރުކުރަން 2016 ގައި ނެރުނު ކޯޓު އަމުރުގެ މައްސަލައިގެ ތަހުގީގީ ރިޕޯޓު ކަމަށް ބުނެ ދައުރުކުރަމުން ދަނީ ސައްހަ ނޫން ރިޕޯޓެއް ކަމަށެވެ.
އެގޮތުން އެ ރިޕޯޓުގައި ބޭނުންކޮށްފައި ހެޑާ އާއި އަސްލާ ދިމާނުވާ ކަމަށާއި އޭރުގެ އެކްޓިން ކޮމިޝަނާ އޮފް ޕޮލިސް އަބްދުﷲ ނަވާޒުގެ ނަމުގައި އެ ރިޕޯޓުގައި ބޭނުންކޮށްފައި ވަނީ މިހާރުގެ އެސިސްޓަންޓް ކޮމިޝަނާ އޮފް ޕޮލިސް އަހުމަދު ޝިފާނުގެ ސޮއި ފޯޖުކޮށްގެން ކޮށްފައި އޮތް ސޮއެއްކަން ފުލުހުންގެ ތަހުގީގަށް ދެނެގަނެވިފައިވާ ކަމަށް ބަޔާނުގައިވެ އެވެ.
އަސްލު ނޫން ލިޔެކިޔުން އުފެއްދުމާއި ފޯޖުކުރުމަކީ ގާނޫނީ ކުށެކެވެ. ދައުރުވަމުންދާ ރިޕޯޓުގައި ހުރީ ސައްހަނޫން ވާހަކަތަކެއް ކަމަށް ވެސް ފުލުހުން ބުންޏެވެ.
"ސައްހަ ނޫން މި ރިޕޯޓު އުފައްދައި ދައުރުކުރަމުންދާ މައްސަލަ ފުލުހުން ގެންދަނީ ސީރިއަސް މައްސަލައެއްގެ ގޮތުގައި ތަހުގީގުކުރަމުން،" ފުލުހުންގެ ބަޔާނުގައިވެ އެވެ.
މިއީ މި ރިޕޯޓު ސައްހަ ނޫން ކަމަށް ފުލުހުން ބުނި ދެވަނަ ފަހަރެވެ. ރިޕޯޓުގައި ރައީސް ޑރ. މުހައްމަދު މުއިއްޒު އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް އެމްއެމްޕީއާރުސީ ހިޔާނާތުގެ ފައިސާ، ކުރީގެ ނައިބު ރައީސް އަހުމަދު އަދީބު ދެއްވި ކަމަށް ވެސް އޮތެވެ.
އެއާއެކު ސޯޝަލް މީޑިއާގައި ކުރެއްވި ޕޯސްޓެއްގައި ޝިފާން ވަނީ ރައީސް އާއި އަބްދުއްރަހީމަށް ތުހުމަތުތަކެއް އަމާޒުވާ ގޮތަށް އޮތް ފުލުހުންގެ ތަހުގީގު ބަޔާނެއް ކަމަށް ބުނެ ސޯޝަލް މީޑިއާގައި ފަތުރަމުންދަނީ ސައްހަ ރިޕޯޓެއް ކަމަށް ވިދާޅުވެފަ އެވެ. އޭރު ތަހުގީގު ކުރާ ކަމަށް ވިދާޅެއް ނުވެ އެވެ.
މި ރިޕޯޓުގެ އިތުރުން، އޭސީސީގެ ތަހުގީގީ ރިޕޯޓެއް ކަމަށް ބުނެ އަސްލު ނޫން ރިޕޯޓެއް ދައުރުކުރާ މައްސަލައެއް ބަލަމުންދާ ކަމަށްވެސް ފުލުހުން މިއަދު ބުންޏެވެ. މި މައްސަލަ ފުލުހުންނަށް ހުށަހެޅީ އޭސީސީ އިންނެވެ. ނަމަވެސް މި ރިޕޯޓުގެ ތަފުސީލެއް ފުލުހުން ނުދެ އެވެ.
ފުލުހުންގެ ބަޔާން ނިންމާލަމުން ސައްހަ ނޫން މައުލޫމާތު ފެތުރުމުގައި ބައިވެރި ނުވާން އިލްތިމާސްކޮށްފައިވެ އެވެ.
ފުލުހުން ދޮގުކުރި ރިޕޯޓު ސޯޝަލް މީޑިއާގެ އިތުރުން ޔާމީނުގެ ސިޔާސީ ޕާޓީ ޕީއެންއެފްގެ ޖަލްސާތަކުގައި ވެސް ދައުރުކޮށްފައިވެ އެވެ. އެގޮތުން މި ސަރުކާރާއި ރައީސްއަށް ފާޑުކިޔާ މި ރިޕޯޓުގައި ހުރި ވާހަކަތައް އެ ޕާޓީގެ އިސްވެރިން ބޭނުންކޮށްފައިވެ އެވެ.
