އިޒްރޭލުން ފަލަސްތީނުގައި ހިންގާ ގަތުލްއާންމާ ދެކޮޅަށް އަޑު އުފުލަމުންދިޔަ އާއިޝަތު ޝާދިޔާ އާއި ޑރ. ޝަޒްރާ އިބްރާހިމްގެ ބަންދަށް އިތުރު ފަސް ދުވަސް ޖެހީ މި ސަރުކާރުން އެދިގެން ކަމަށާއި، އޭގެ ބޭނުމަކީ ފަލަސްތީނު ރައްޔިތުންނަށް ދޭ އަނިޔާތަކުގެ އަޑު ރާއްޖެއިން ކަނޑުވައިލުން ކަމަށް އަދާލަތުން ބުނެފި އެވެ.
އެކްސްގައި އަދާލަތުން ކުރި ޕޯސްޓެއްގައި ބުނީ އެ ދެމީހުންގެ ބަންދަށް އިތުރު ފަސް ދުވަސް ޖެހުން އެ ޕާޓީން ކުށްވެރި ކުރާ ކަމަށެވެ.
"އައިޝަތު ޝާދިޔާ އާއި ޑރ.ޝަޒްރާ އިބްރާހީމް އިތުރު ފަސް ދުވަހަށް ބަންދު ކުރުމަށް ސަރުކާރުން އެދިގެން ނިންމި ނިންމުން ކުށްވެރިކުރަމެވެ، މިއީ ފަލަސްތީނުގެ ރައްޔިތުންނަށް ދޭ އަނިޔާތަކުގެ އަޑު ރާއްޖެއިން ކަނޑުވާލުމަށް މި ސަރުކާރުން ހިންގާ ލާއިންސާނީ އަމަލެއް ކަމުގައި މި ޕާޓީއިން ދެކެމެވެ،" އަދާލަތުގެ ޕޯސްޓުގައި ބުނެފައިވެ އެވެ.
ޝާދިޔާ އާއި ޑރ. ޝަޒްރާ ހައްޔަރު ކުރީ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، ވަކި ސަފީރަކަށް އުނދަގޫވާ ގޮތަށް އަމަލުކޮށް، ފުލުހުންގެ ވާޖިބަށް ހުރަސް އެޅުމުން ކޯޓު އަމުރެއްގެ ދަށުން ކަމަށް ފުލުހުން ބުނެ އެވެ.
އޯގަސްޓު 28، ގައި ހައްޔަރުކުރި ދެ މީހުންގެ ބަންދަށް ޖެހިގެން އައި ދުވަހު ކްރިމިނަލް ކޯޓުން ޖެހީ ތިން ދުވަހެވެ. އެ މުއްދަތު ހަމަވެގެން މިއަދު އެ ދެމީހުން ކްރިމިނަލް ކޯޓަށް ހާޒިރުކުރުމުން ބަންދަށް އިތުރު ފަސް ދުވަސް ވަނީ ޖަހައިފަ އެވެ.
އެ ދެ މީހުން އުނދަގޫކުރީ ކޮން ސަފީރަކަށް ކަމެއް އަދި ކޮން ޑިޕްލޮމެޓިކް މިޝަންތަކަކަށް ކަމެއް ފުލުހުން ހާމަކޮށްފައެއް ނުވެ އެވެ.
ޝާދިޔާ، 47، އާއި ޝަޒްރާ، 36، ހައްޔަރު ކުރުމުން އެކަން އިދިކޮޅު އެމްޑީޕީ އާއި އަދާލަތު ޕާޓީން ކުށްވެރިކޮށް، އެ ދެ މީހުން ދޫކޮށްލަން ގޮވާލި އެވެ. ނަމަވެސް ސަރުކާރުން ވަނީ ޑިޕްލޮމެޓުންނަށް އުނދަގޫ ނުކޮށް ފަލަސްތީނަށްޓަކާ އަޑުއުފުލޭނެ ކަމަށް ބުނެ ފުލުހުންގެ އަމަލު ދިފާއުކޮށްފަ އެވެ
