އަންހެނެއްގެ ކަރުގައި ވަޅި ޖައްސައިގެން ބިރު ދެއްކި އާދަމް އަތުހަރު، 32 އަނެއްކާ ވެސް ހޮސްޕިޓަލުން ދޫކޮށްލުމުން ފުލުހުންގެ ބަންދަށް ގެންގޮސްފި އެވެ.
ފުލުހުން ބުނީ އަތުހަރު މިއަދު ހެނދުނު އައިޖީއެމްއެޗް ހޮސްޕިޓަލުން ދޫކޮށްލުމާއެކު ކަސްޓޯޑިއަލްއަށް ގެންގޮސްފައިވާ ކަމަށެވެ.
"އަހުތަރު ހުރީ ފުލުހުންގެ ހައްޔަރުގައި. މިއަދު ހެނދުނު ކަސްޓޯޑިއަލްއަށް ވަނީ ގެންގޮސްފައި. ހާލު ވެސް ރަނގަޅު،" ފުލުހުން ބުންޏެވެ.
ބުރާސްފަތި ދުވަހުގެ ރޭ ހިނގި ހާދިސާއާ ގުޅިގެން އަހުތަރު އިއްޔެ ހެނދުނު އައިޖީއެމްއެޗް ހޮސްޕިޓަލުން ފަރުވާ ދިނުމަށްފަހު ކަސްޓޯޑިއަލްއަށް ގެންދިޔަ އެވެ. ނަމަވެސް އޭނާގެ ހާލު ސީރިއަސް ވެގެން އަނބުރާ އައިޖީއެމްއެޗްގައި އެޑުމިޓުކުރީ އިއްޔެ ހަވީރު އެވެ.
އަހުތަރުގެ އާއިލާއިން "އަދަދު" އަށް ބުނީ އޭނާގެ ހާލު ރަނގަޅަށް ކިޔައި ނުދީ، މުޅިން ރަނގަޅު ނުވަނީސް ކަސްޓޯޑިއަލްއަށް ގެންދިޔުމުން ކަންބޮޑުވާ ކަމަށެވެ.
"ސްޓޭބަލް ކަމަކަށް ގަބޫލެއް ނުކުރަން، އޭނާގެ ބުރަކަށްޓަށް ވެސް ގެއްލުންވެފައި ހުރީ، ލޮލާއި ބޮލަށް ވެސް ގެއްލުންވެފައި ހުރީ، ހާލަތު އެއްވެސް ވަރަކަށް ކިޔައެއް ނުދޭ، ބުނަނީ ހަމަ ސްޓޭބަލްއޭ ސްޓޭބަލްއޭ،" އާއިލާއިން ބުންޏެވެ.
އަހުތަރަށް ބޮޑަށް އަނިޔާވީ ރަހީނު ކޮށްފައި ހުރި އަންހެން މީހާ ސަލާމަތް ކުރުމުގެ ތެރޭގައި ފުލުހުން ގޮސް އޭނާގެ ބޮލުގައި މުގުރަކުން ޖެހުމުންނެވެ. އަހުތާރަށް ލިބުނު އަނިޔާގެ ތަފުސީލެއް ފުލުހުން ހާމަ ނުކުރި ނަމަވެސް އޭނާގެ ބޮލުން ވަރަށް ބައިވަރު ލޭ އެ ސަރަހައްދު މަގުމައްޗަށް އޮހުރިފައި ހުއްޓެވެ.
އަހުތާރުގެ ބޮލުގައި މުގުރުން ޖެހުމުން ސައިކަލާއެކު އަންހެން މީހާ އާއި އޭނާ ވެސް ބިންމައްޗަށް ވެއްޓޭ މަންޒަރު ފެނެ އެވެ. އަންހެން މީހާ ސަލާމަތް ކުރީ އެ ސަރަހައްދުގައި އެ ވަގުތު ތިބި ފުލުުހުންނާއި އާންމުން ގޮހެވެ.
އަހުތަރު ރަހީނުކުރި އަންހެން މީހާއަކީ އޭނާ ލޯބީގެ ގޮތުން ގުޅިގެން އުޅޭ ފުލުހެކެވެ. އޭނާއަށް ހާދިސާ ހިނގި ރޭ ފަރުވާ ދިނުމަށްފަހު ވަނީ ދޫކޮށްލާފަ އެވެ.
