އަންހެނެއްގެ ކަރުގައި ވަޅި ޖައްސައިގެން ބިރު ދެއްކި އާދަމް އަހުތާރު، 32އ ގެ ހާލު މިހާރު ރަނގަޅު ކަމަށް ފުލުހުން ބުނެފައި އޮއްވައި އޭނާގެ ހާލު ސީރިއަސްވެ އައިސީޔޫއަށް ބަދަލުކޮށްފި އެވެ.
އަހުތާރުގެ ހާލު ސީރިއަސްވެ އައިސީޔޫއަށް ބަދަލުކޮށްފައި މިވަނީ އޭނާގެ ހާލު ރަނގަޅު ކަމަށް ބުނެ މިއަދު މެންދުރު ފުލުހުން މީޑިއާތަކަށް މެސެޖު ކޮށްފައި ވަނިކޮށެވެ.
އާއިލާއިން "އަދަދު" އަށް މައުލޫމާތު ދެމުން ބުނީ އޭޑީކޭއިން ފަރުވާ ދިނުމަށްފަހު ފަތިހު އައިޖީއެމްއެޗަށް ބަދަލު ކުރި ކަމަށެވެ. އެއަށްފަހު މިއަދު ހެނދުނު 8:00 ހާއިރު ފުލުހުންގެ ކަސްޓޯޑިއަލަށް އަހުތާރު ގެންދިޔަ ކަމަށް އާއިލާއިން ބުންޏެވެ.
ނަމަވެސް, ކަސްޓޯޑިއަލްގައި ހުއްޓައި ފިޓު ޖެހި ހާލަތު ގޯސްވެގެން އަނެއްކާ ހަވީރު 5:00 ހާއިރު އައިޖީއެމްއެޗަށް އޭނާ ގެންދިޔައީ ކަމަށް އާއިލާއިން ބުންޏެވެ. އަހުތާރުއަށް މިވަގުތު ފަރުވާ ދެމުން ދަނީ އައިޖީއެމްއެޗުގެ އައިސީޔޫގައި ކަމަށް އާއިލާއިން ބުންޏެވެ.
"ސްޓޭބަލް ކަމަކަށް ގަބޫލެއް ނުކުރަން، އޭނާގެ ބުރަކަށްޓަށް ވެސް ގެއްލުންވެފައި ހުރީ، ބޮލަށް ވެސް ގެއްލުންވެފައި ހުރީ، ހާލަތު އެއްވެސް ވަރަކަށް ކިޔައެއް ނުދޭ، ބުނަނީ ހަމަ ސްޓޭބަލްއޭ ސްޓޭބަލްއޭ،" އާއިލާއިން ބުންޏެވެ.
އާއިލާއިން ވާހަކަ ދެއްކި މީހާ ބުނީ މިއަދު ހެނދުނު އަހުތާރު ކަސްޓޯޑިއަލަށް ގެންދިޔައިރު އޭނާއަށް ކޮޅަށް ވެސް ނުހުރެވޭ ކަމަށާއި ފުލުހުން އެނާ ގެންދިޔައީ ފުރޮޅުލީ ގޮނޑިއެއްގައި ކަމަށެވެ.
އަހުތާރުއަށް ބޮޑަށް އަނިޔާވީ ރަހީނު ކޮށްފައި ހުރި އަންހެން މީހާ ސަލާމަތް ކުރުމުގެ ތެރޭގައި ފުލުހުން ގޮސް އޭނާގެ ބޮލުގައި މުގުރަކުން ޖެހުމުންނެވެ. އަހުތާރަށް ލިބުނު އަނިޔާގެ ތަފުސީލެއް ފުލުހުން ހާމަ ނުކުރި ނަމަވެސް އޭނާގެ ބޮލުން ވަރަށް ބައިވަރު ލޭ އެ ސަރަހައްދު މަގުމައްޗަށް އޮހުރިފައި ހުއްޓެވެ.
އެ ހާދިސާ ކޮންޓްރޯލް ކުރުމަށް ފުލުހުން އަމަލު ކުރި ގޮތަށް ޕޮލިސް ކޮމިޝަނަރު، އަލީ ސުޖާއު މިއަދު ވަނީ ތައުރީފުކުރައްވައި ހާލަތު ކޮންޓްރޯލް ކުރުމަށް ހަރަކާތްތެރިވި ފުލުހުންނަށް ޝުކުރު އަދާ ކުރައްވައިފަ އެވެ.
ފުލުހުންނާ ބައްދަލު ކުރައްވައި ޝުޖާއު މިއަދު ދެއްކެވި ވާހަކައިގައި ވިދާޅުވީ މިއީ އަލަށް ދިމާވި ހާދިސާއެއް ނަމަވެސް ފުލުހުން "ތުރެޓް ނިއުޓްރަލައިޒް" ކޮށްފައި ވަނީ ވަރަށް ޕްރޮފެޝަނަލްކޮށް ކަމަށާއި ހާލަތާއި ނުކުމެދާނެ ނަތީޖާއަށް ބަލާއިރު "ނިއުޓްރަލައިޒް" ކުރުމުގައި ފުލުހުން ނިންމި ނިންމުން ރަނގަޅުކަމަށެވެ.
ފުލުހުންގެ މަސައްކަތަށް ހޯމް މިނިސްޓަރު، އަލީ އިހުސާން ވެސް ވަނީ ތައުރީފު ކުރައްވައިފަ އެވެ. އެކްސްގައި އިހުސާން ކުރެއްވި ޕޯސްޓެއްގައި ވިދާޅުވީ ފުލުހުން ކުރީ ހިތްވަރުގަދަ މަސައްކަތެއް ކަމަށެވެ.
އަދި، ފުލުހުންގެ މަސައްކަތުން ރަހީނު ކޮށްފައި ހުރި އަންހެން މީހާ ސަލާމަތް ކުރީތީ ސާބަސް ދަންނަވާ ކަމަށް އިހުސާންގެ ޕޯސްޓުގައި ވިދާޅުވެފައިވެ އެވެ.
ރޭގެ މަންޒަރު ފެންނަ ވީޑިއޯތައް މިހާރު ސޯޝަލް މީޑިއާގައި އާންމުވެފައިވާއިރު، އެ ވީޑިއޯތަކުން ފެންނަނީ އަންހެނެއްގެ ކަރުގައި ވަޅިއެއް ޖައްސައިގެން ހުރެ އޭނާ މަރާލާނެ ކަމަށް ބުނެ އިންޒާރު ދެމުން އަހުތާރު މާލޭގެ ގެއަކުން ނުކުންނަ މަންޒަރެވެ. އެއަށް ފަހު އެ އަންހެން މީހާ އާއެކު އެތަނުގައި ހުރި ސައިކަލަކަށް އަރައި ސައިކަލު ދުއްވުމަށް އަންހެން މީހާއަށް އަހުތާރު މަޖުބޫރު ކުރެ އެވެ.
އެ ސަރަހައްދު ދޫކޮށް ސައިކަލުގައި އަހުތާރަށް ނުދެވެނީ އެ ސަރަހައްދަށް މީހުން އެއްވެ އެ މަގު ބަންދުވެފައި އޮތުމުންނެވެ. ފުލުހުންގެ އޮފިސަރެއް ގޮސް އަހުތާރުގެ ބޮލުގައި މުގުރުން ޖެހީ އެ މީހުންގަނޑު ކުރިމައްޗަށް ސައިކަލު މަޑުކުރުމުންނެވެ.
އަހުތާރުގެ ބޮލުގައި މުގުރުން ޖެހުމުން ސައިކަލާއެކު އަންހެން މީހާ އާއި އޭނާ ވެސް ބިންމައްޗަށް ވެއްޓޭ މަންޒަރު ފެނެ އެވެ. އަންހެން މީހާ ސަލާމަތް ކުރީ އެ ސަރަހައްދުގައި އެ ވަގުތު ތިބި ފުލުުހުންނާއި އާންމުން ގޮހެވެ.
