ތައުލީމީ ދާއިރާގައި ހުރި ގޮންޖެހުންތައް ހައްލުކޮށް ކުރިއެރުވުމަށްޓަކައި ޔުނިސެފް އާއި ގުޅިގެން ގްލޯބަލް ޕާޓްނާޝިޕް ފޯ އެޑިއުކޭޝަން (ޖީޕީއީ) އަދި ވޯލްޑް ބޭންކުން ރާއްޖެއަށް 9.5 މިލިއަން އެމެރިކަން ޑޮލަރުގެ ގްރާންޓެއްް ދީފި އެވެ.
މިއަދު ހެނދުނު ބޭއްވި "ތައުލީމީ އިންގިލާބީ ބަދަލު" އިފްތިތާހުކުރުމުގެ ރަސްމިއްޔާތުގައި ވާހަކަ ދައްކަވަމުން އެޑިޔުކޭޝަން މިނިސްޓަރު ޝަފީއު ވިދާޅުވީ ތައުލީމީ ދާއިރާ ކުރިއެރުވުމަށްޓަކައި މި ފައިސާއަކީ މުހިންމު އަދި ބޭނުންވާ މަގުސަދު ހާސިލުކުރުމަށް ހުޅުވުނު ފަހި ފުރުސަތެއް ކަމަށެވެ.
ޖީޕީއީ އިން ޔުނިސެފް އާއި ގުޅިގެން ސިސްޓަމް ޓްރާންސްފޯމޭޝަނަށް ފަސް މިލިއަން ޑޮލަރު ދީފައިވެ އެވެ. މި ފައިސާ ބޭނުންކުރަނީ ޓީޗަރުން ތަމްރީނު ކުރުމަށާއި، ކިޔެވުމުގެ މާހައުލަކީ ރައްކާތެރި އަމާން ތަނަކަށް ހެދުމަށެވެ. އަދި ކަރިކިއުލަމް ބަދަލުކުރުން ވެސް މީގެތެރެއިން ކުރިއަށް ދާނެ އެވެ.
ތިން މިލިއަން ޑޮލަރަކީ ވޯލްޑް ބޭންކްގެ ފަރާތުން ހަމަޖެއްސެވި މަލްޓި ޕްލޭޔާ ގްރޭންޓެކެވެ. މި ފައިސާއަކީ ތައުލީމީ ނިޒާމްގެ ހުރިހާ ވިއުގަތަކެއް ގުޅުވާލުމަށް ކުރާނެ މަސައްކަތެކެވެ. ޓީޗަރުންނާއި ދަރިވަރުންގެ މައުލޫމާތުތައް ވެސް މީގެތެރެއިން އެއްކުރެވި ކަންތައްތައް ނިންމުމަށް ފަސޭހަވެ ފުރުސަތު ހުޅުވިގެންދާނެ ކަމަށް އެޑިއުކޭޝަނުން ބުންޏެވެ.
ބާކީ 1.5 މިލިއަން ޑޮލަރުން ތައުލީމީ ދާއިރާ ހިންގުމުގެ ބައި ހަރުދަނާ ކުރުމަށް މަސައްކަތް ކުރާނެ ކަމަށާއި، އޭގެއިތުރުން އިންސްޓިޓުޝަންތައް ހަރުދަނާކޮށް އެތަންތަނަށް ބޭނުންވާ ފައިނޭންސް ހަމަޖެހިގެންދާނެ ކަމަށް އެޑިޔުކޭޝަނުން ބުންޏެވެ.
ތައުލީމީ ނިޒާމު ކުރިއެރުވުމަށް މި ލިބުނު ގްރޭންޓުތަކުގެ ސަބަބުން ހުރިހާ މައްސަލަތަކެއް ހައްލުވާނެ ކަމަށް މިނިސްޓަރު ޝަފީއު ވިދާޅުވި އެވެ. އަދި ދަރިވަރުންގެ ނަތީޖާތައް ރަނގަޅުވެ، ޓީޗަރުން މަދުވުމުގެ ޝަކުވާތަކުގެ ހައްލު ވެސް މިކަމުގެ ސަބަބުން ލިބޭނެ ކަމަށް އޭނާ ވިދާޅުވި އެވެ.
