މެންޗެސްޓާ (އޮގަސްޓް 11) - މެންޗެސްޓާ ޔުނައިޓެޑުން ބަޔާން މިއުނިކަށް ކުޅޭ ނެދަލެންޑްސްގެ ޑިފެންޑަރު، މަތައިސް ޑި ލިޓް އާއި މޮރޮކޯގެ ފުލްބެކް، ނުސައިރު މަޒްރައޮއީގެ ޑީލް، 70 މިލިއަން ޑޮލަރަށް ނިންމަން އެއްބަސްވުމަކަށް އަތުވެއްޖެ އެވެ.
ޑި ލިޓް އާއި މަޒްރައޮއީ ވަނީ، މީގެ ކުރިން ޔުނައިޓެޑްގެ ކޯޗު އެރިކް ޓެން ހާގްއާ އެކު، އަޔަކްސްގައި މަސައްކަތްކޮށްފަ އެވެ. އެ ގޮތުން، ޑި ލިޓް އަކީ، 2019 ވަނަ އަހަރު އަޔަކްސް އިން ޓެން ހާގާ އެކު، ޗެމްޕިއަންސް ލީގުގެ ސެމީ ފައިނަލުގައި ކުޅުނުއިރު، ޓީމުގެ ކެޕްޓަން އެވެ.
ބަޔާނުން އެއްބަސްވެފައިވަނީ، 55 މިލިއަން ޑޮލަރަށް ޑި ލިޓް ދޫކޮށްލުމަށާއި 15 މިލިއަން ޑޮލަރަށް މަޒްރައޮއީގެ ޑީލް ނިންމުމަށެވެ.
ޔުނައިޓެޑުން ވަނީ އެ ޓީމަށް ކުޅޭ، އިނގިރޭސި ފުލްބެކް، އާރޮން ވަން-ބިސާކާ، 20 މިލިއަން ޑޮލަަރަށް ވެސްޓް ހޭމް ޔުނައިޓެޑަށް ވިއްކާލަން ނިންމައިފަ އެވެ.
މި ފަހަރުގެ ޓްރާންސްފާގައި ޔުނައިޓެޑުން ލިލް އިން ގަތް 19 އަހަރުގެ ޑިފެންޑަރު، ލެނީ ޔޯރޯ ވަނީ އަނިޔާވެ ތިން މަހެއްހާ ދުވަހަށް ކުޅުމާ ދުރަށް ދާން ޖެހިފަ އެވެ. އަނެއްކޮޅުން، ޔުނައިޓެޑްގެ ފޯވާޑް، ރަސްމުސް ހޮއިލުންޑް ވެސް ހުރީ އަނިޔާގަ އެވެ.
އަޔަކްސް ދޫކޮށް، 2019 ވަނަ އަހަރު 81 މިލިއަން ޑޮލަރަށް ޔުވެންޓަސް އަށް ބަދަލުވި ޑި ލިޓް، މީގެ ދެ އަހަރު ކުރިން ބަޔާނަށް ސޮއިކުރީ، 78 މިލިއަން ޑޮލަަރަށެވެ. އެކަމަކު، މިދިޔަ ސީޒަނުގައި ތޯމަސް ޓުޗެލް ބަޔާނަށް ކޯޗުކޮށްދިންއިރު، ޑި ލިޓް އަށް މާގިނަ ފުރުސަތެއް ނުލިބެ އެވެ.
