ސަރުކާރަށް ނިސްބަތްވާ ރައްޔިތުންގެ މަޖިލީހުގެ މެންބަރުން ހައްލަން ވަރަށް މަސައްކަތް ކުރާނެ ކަމަށާއި އެކަމަށް ސަމާލުވާން ޖެހޭ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ރޭ ވިދަޅުވި އެވެ.
ޕީއެންސީގެ ޖަގަހައިގައި ބޭއްވި ޖަލްސާގައި އަބްދުއްރަހީމް ވިދާޅުވީ ރައްޔިތުން ޕީއެންސީގެ މެންބަރުން ހޮވީ ރައީސް ޑރ. މުހައްމަދު މުއިއްޒުގެ ވެރިކަން ހިމާޔަތް ކުރުމަށް ކަމަށެވެ.
"ރައްޔިތުންގެ އިއްޒަތްތެރި މެންބަރުން ހައްލަން އެކި ގޮތްގޮތަށް ވަރަށް މަސައްކަތް ކުރާނެ، މިއީ ވަރަށް ބޮޑަށް ސަމާލުވާން ޖެހޭ ވަގުތެއް. ތިބޭފުޅުން ގަބޫލުކުރައްވަންވާނެ، ރައްޔިތުން ތިބޭފުޅުން އިންތިހާބު ކުރީ ރައީސް މުއިއްޒުގެ ވެރިކަން ދިފާއުކުރަން،" ޕީއެންސީގެ ޗެއާޕާސަންގެ މަގާމުގައި ވެސް ހުންނެވި އަބްދުއްރަހީމް ވިދާޅުވި އެވެ.
މި ވާހަކަތައް އަބްދުއްރަހީމް މިވީ ސަރުކާރާ ދެކޮޅަށް، ޕީޕީއެމް/ޕީއެންސީގެ ކުރީގެ ލީޑަރު އަދި ކުރީގެ ރައީސް އަބްދުﷲ ޔާމީން ވަރަށް ބޮޑަށް ފާޑުކިޔަމުންދާ ދަނޑިވަޅެއްގަ އެވެ. އަދި ޕީއެންސީގެ މަޖިލީސް މެންބަރުންގެ މެދުގައި ވެސް ހިތްހަމަ ނުޖެހުންތައް އިތުރުވަމުން ދަނިކޮށެވެ.
އަބްދުއްރަހީމް ވިދާޅުވީ މަޖިލީހުގައި ތިބި ޕީއެންސީގެ 75 މެންބަރުން މަސައްކަތް ކުރައްވަން ވާނީ ރައީސް މުއިއްޒަށް އެހީތެރިވެދީ ރައްޔިތުންނަށް ތަރައްގީއާ ކުރިއެރުން ހޯދުމަށް ކުރެވޭ މަސައްކަތްތަކަށް މަގުފަހި ކުރަންކަމަށެވެ.
"ތިބޭފުޅުންގެ ޒިންމާއަކަށް ވާންވާނީ ގައުމާއި ރައްޔިތުންނަށް ލާބަޔާއި މަންފާ ހުރި މަގުން ކުރިއަށް ދިޔުން، އެމަގުން ކުރިއަށް ދެވޭނީ ރައީސް ޑރ. މުހައްމަދު މުއިއްޒު އާ އެކީގައި ސާބިތުވެ ތިބެގެން،" އެމަނިކުފާނު ވިދާޅުވި އެވެ.
