ގދ. ތިނަދޫގައި މުޒާހަރާ ކުރުމުން އެއީ ވިސާގެ ޝަރުތަކާ ހިލާފުވުން ކަމަށް ކަނޑައަޅައި ޑީޕޯޓްކުރުމަށް ސަރުކާރުން ނިންމާފައިވާ ބިދޭސީން ޑީޕޯޓްކުރަނީ ސީދާ މުޒާހަރާގެ ސަބަބަށް ވުރެ ވިސާ ނެތުމުން ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން މިއަދު ބުނެފި އެވެ.
ބަންގްލަދޭޝްގައި މިހާރު ހިނގަމުންދާ ހަމަނުޖެހުންތަކާ ދެކޮޅަށް އަޑު އުފުލުމަށް އެ ރަށުގެ ދާރުލްއާސާރު ކުރިމަތީ އެއްވި ބިދޭސީން ޑިޕޯޓްކުރަން ނިންމީ މީގެ ތިން ހަފުތާއެއް ކުރިންނެވެ. މުޒާހަރާއަކީ ހައްގެއް ކަމަށް ބުނެ މައްސަލަ ބަލަމުންދާ ކަމަށް އެޗްއާރުސީއެމުން ބުނީ ޖުލައި 27، ގަ އެވެ.
ތަހުގީގާ ގުޅޭ ގޮތުން ސުވާލުކުރުމުން އެޗްއާރުސީއެމްގެ މީޑިއާއިން ފޮނުވި މެސެޖެއްގައި ބުނީ އެ ކޮމިޝަނުން ބެލި ބެލުމުން އެ ބިދޭސީންނަށް ނަސޭހަތް ދިނުމަށް ފަހު ދޫކޮށްލާފައިވާ ކަން އެނގިފައިވާ ކަމަށެވެ. ބިދޭސީން ތިބީ އިމިގްރޭޝަންގެ ޑިޓެންޝަން ސެންޓަރެއްގައި ބަންދަކު ނޫނެވެ.
ކޮމިޝަނުން ބުނީ މިނިސްޓްރީން ބަލަމުން އަންނަނީ އެ މީހުންގެ ތެރެއިން ވިސާ ނެތް މީހުންގެ މައްސަލަ ކަމަށެވެ. އަދި ސަރުކާރުން ބިދޭސީންތަކެއް ޑީޕޯޓްކުރުމުގެ މަސައްކަތް ކުރަނީ އެ މައްސަލާގައި ކަމަށް ކޮމިޝަނުގެ މެސެޖުގައިވެ އެވެ.
"މުޒާހަރާކުރުމާ ގުޅިގެން އެއްވެސް މީހަކު ޑީޕޯޓު ކުރުމަށް ނިންމުމެއް ނިންމާފައިވާކަމަށް ކޮމިޝަނުން ބެލި ބެލުމުން ފާހަގައެއް ނުވޭ، އެހެންކަމުން ބިދޭސީން ޑީޕޯޓުކުރުން ހުއްޓުވުމަށް އެޗްއާރްސީއެމް އިން އަންގާފައެއް ނުވާނެ،" ކޮމިޝަނުން ފޮނުވި މެސެޖުގައިވެ އެވެ.
ނަމަވެސް މިއީ ސަރުކާރުން އެ ބިދޭސީން ޑިޕޯޓްކުރަން ނިންމި އިރު މީޑިއާތަކާ މައުލޫމާތު ހިއްސާކުރި ގޮތެއް ނޫނެވެ. ހޯމް މިނިސްޓްރީން މީޑިއާތަކަށް މައުލޫމާތު ދިނީ މުޒާހަރާ ކުރުމަކީ ވިސާގެ ޝަރުތަކާ ހިލާފު ވާތީ ޑިޕޯޓް ކުރުމުގެ މަސައްކަތް ކުރަމުންދާ ކަމަށެވެ.
މައްސަލަ ބަލަން ނިންމައި އެޗްއާރުސީއެމުން ބަޔާން ނެރުނު ދުވަހު އެ ކޮމިޝަނުން ބުނެފައިވަނީ ވެސް ރާއްޖޭން ސޮއިކޮށްފައިވާ އދ. ގެ އިންސާނީ ހައްގުތަކުގެ އާންމު ގަރާރު، އައިސީސީޕީއާރުގައި ވެސް ބިދޭސީން ހިމެނޭހެން އެންމެނަށް ވެސް ސުލްހަވެރިކަމާއެކު އެއްވުމުގެ ހައްގު ކަށަވަރު ކޮށްދޭން ޖެހޭ ކަމަށެވެ.
