ބާރު ސްޕީޑުގައި ދުއްވާފައި ދިޔަ ސައިކަލެއް ކޮންޓްރޯލުން ނައްޓައިގެން ގޮސް ވެލި ފުންޏެއްގައި ޖެހި ބޮޑު އެކްސިޑެންޓެއް އައްޑޫ ސިޓީ ހިތަދޫގައި ހިނގައިފި އެެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ އެކްސިޑެންޓުގައި ސައިކަލު ދުއްވަން އިން 23 އަހަރުގެ ދިވެހި ޒުވާނަކަށް އަނިޔާވެ އައްޑޫ އިކުއެޓޯރިއަލް ހޮސްޕިޓަލުގައި ފަރުވާ ދެމުންދާ ކަމަށެވެ. އަދި އިތުރު ފަރުވާއަށް އޭނާ މާލެ ގެނައުމުގެ މަސައްކަތް މިހާރު ކުރަމުންދާ ކަމަށް ފުލުހުން ބުންޏެވެ.
އެ އެކްސިޑެންޓު ހިނގާފައި ވަނީ ހިތަދޫގައި ފެން ހިންދާ ނިޒާމު ގާއިމު ކުރުމަށް މަގު ކޮނެފައިވާ ސަރަހައްދުގައި ކަމަށް ފުލުހުން ބުންޏެވެ. އެކްސިޑެންޓު ހިނގީ ރޭ 11:49 ހާއިރު ކަމަށް ވެސް ފުލުހުންގެ މެސެޖުގައި ބުނެފައިވެ އެވެ.
އައްޑޫގެ މަގުތައް ހެދުމާއި ފެން ހިންދުމުގެ މަސައްކަތް ކުރަނީ އިންޑިއާގެ އެފްކޮންސް ކުންފުނިންނެވެ. އެ މަޝްރޫއުގެ ދަށުން އައްޑޫގެ ގުޅިފައިވާ ހުރިހާ ރަށެއްގެ މަގުތައް ހެދުމަށް ނިންމާފައިވެ އެވެ.
ފުލުހުން ބުނީ އެ މައްސަލަ އާ ގުޅިގެން ބަލަންޖެހޭ ކަންކަން އިތުރަށް ބަލަމުންދާ ކަމަށެވެ.
