ވެހިކަލް މަރާމާތުކުރާ ގަރާޖަކާއި އެތަނުގެ މަތީގައި ހިންގަމުން ދިޔަ ކާބޯތަކެތި ބަންދުކޮށް ޑެލިވަރީ ކުރުމުގެ މަސައްކަތް ކުރަމުން ދިޔަ ތަނެއް ބަލައި ފާސްކޮށް އަދި ބިދޭސީންތަކެއް މިއަދު ހައްޔަރުކޮށްފި އެވެ.
މޯލްޑިވްސް އިމިގްރޭޝަން އަށް ލިބުނު ޝަކުވާއަކާ ގުޅިގެން ބަލައި ފާސްކުރީ ހުޅުމާލޭގައި ހިންގަމުން ދިޔަ ގަރާޖަކާއި އެ ގަރާޖުގެ މަތީ ފަންގިފިލާ އެވެ. އެތަނުގައި ހިންގަމުން ދިޔަ އޮޕަރޭޝަނަކީ ކާބޯތަކެތި ޑެލިވަރީކޮށް ދިނުމެވެ.
އެ އިމާރާތް ހުންނަ ސަރަހައްދެއް އިމިގްރޭޝަނުން ނުބުނެ އެވެ. ނަމަވެސް މިއަދު ބަލައި ފާސްކުރި ތަނާ ގުޅޭ ގޮތުން އާންމުންގެ ޝަކުވާތަކެއް ދާދި ފަހުން ސޯޝަލް މީޑިއާ އަށް ބަންޑުންކޮށްލާފައިވާ ކަމަށް އިމިގްރޭޝަނުން ބުނެ އެވެ.
"އިމިގްރޭޝަނުން ހާޒިރުވިއިރު ބިދޭސީން ދިޔައީ އެތަން ރޫޅާލާ ހުސްކުރުމުގެ މަސައްކަތް ކުރަމުން. ނަމަވެސް، ގަވާއިދާ ހިލާފަށް ކާބޯތަކެތި ޑެލިވަރީ ކުރާ ތަނުގައި ތިބި ބިދޭސީ އަށް މީހަކާއި ގަރާޖުން ތިން މީހަކު ވަނީ އިމިގްރޭޝަންގެ ބެލުމުގެ ދަށަށް ގެނެވިފައި،" އިމިގްރޭޝަނުން ބުނެ އެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދުމުގެ އޮޕަރޭޝަނެއް އިމިގްރޭޝަން އާއި ފުލުހުން ދަނީ ހިންގަމުންނެވެ. މިދިޔަ ހަފުތާގައި ވެސް 100 އެއްހާ ބިދޭސީން އިމިގްރޭޝަނުގެ ބެލުމުގެ ދަށަށް ގެންދިޔަ ކަމަށް ބުނެފައިވެ އެވެ.
