މާލޭގެ މަގުތަކާއި ގޯޅިތަކުގައި ކުރަހައިފާ ހުރި ގްރެފިޓީތައް ފުހެ ސާފުކުރުމުގެ މަސައްކަތް ފުލުހުންނާއި ސިޓީ ކައުންސިލުން ގުޅިގެން ފަށައިފި އެވެ.
ފުލުހުން ބުނެފައިވަނީ މި މަސައްކަތުގެ ދަށުން ފުހުމުގެ މަސައްކަތް ކުރަމުން ދަނީ ކުޑަކުދިންނާއި ނުގުޅޭ އަދި އިޖުތިމާއީ މިންގަނޑުތަކަށް ނުފެތޭ ގްރެފިޓީތައް ކަމަށެވެ.
އޭގެ އިތުރުން, ފުލުހުން ބުނީ މި ފެށި މަސައްކަތުގެ އަމާޒަކީ މާލޭގެ މަގުތަކާއި ގޯޅިތަކަކީ ހިތްފަސޭހަ، މީހުންނަށް ހަމަޖެހިލައިގެން އުޅެވޭ މަގުތަކަކަށް ހެދުން ކަމަށެވެ. އަދި, އާންމު ތަންތަނަކީ މީހުންނަށް އަދި ވަކިން ހާއްސަކޮށް ކުޑަކުދިންނަށް މަރުހަބާ ކިޔާ އަދި ރައްކާތެރި ތަންތަނަށް ހެދުން ކަމަށް ވެސް ފުލުހުން ބުނެފައިވެ އެވެ.
މި މަސައްކަތް ހުއްޓާނުލައި މާލޭގެ އެކި ހިސާބުތަކުގައި ކުރިއަށް ދާނެ ކަމަށް އެ އިދާރާއިން ފާހަގަކުރި އެވެ. އަދި އަބަދުވެސް މަސައްކަތް ކުރާނީ ހުރިހާ ފަރުދުންނަށާއި ދަތުރުވެރިންނަށް ރައްކާތެރި އަދި ތަރުތީބު ސިޓީއަކަށް މާލެ ހެދުމަށް ކަމަށްވެސް ފުލުހުން ބުންޏެވެ.
