ވޭޕް ކާޓްރިޖުތަކެއް ފެޑެކްސް މެދުވެރިކޮށް ގެނައުމުން އެއީ މަސްތުވާތަކެތީގެ ބާވަތެއް ކަމަށްވާ ކެނެބިސް އެކުލެވޭ ކާޓްރިޖުތަކެއް ކަމަށް ތުހުމަތުކޮށް، ނުހައްގުން ބަންދު ކުރުމުން ދައުވާ ކުރަން ނިންމައިފި އެވެ.
އެ ކާޓްރިޖުތައް އެތެރެކުރި ކަމުގެ ތުހުމަތުގައި ފުލުހުންގެ އިންޓެލިޖެންސުން ހިންގި ކޮންޓްރޯލް ޑެލިވަރީ އޮޕަރޭޝަނެއްގައި ހައްޔަރުކުރީ ގދ. ތިނަދޫއަށް ނިސްބަތްވާ 31 އަހަރުގެ ޒުވާނެކެވެ.
"އަދަދު" އަށް އެނގިފައިވާ ގޮތުގައި ޗައިނާއިން އޭނާ ރާއްޖެ ގެނައި ކާޓްރިޖްތައް ޖޫން، 20 ގައި ރާއްޖެ ވަނީ ގެނެސްފަ އެވެ. އެ ތަކެތި ކަސްޓަމްސްއިން ހިފަހެއްޓައި، ފުލުހުންނަށް އެންގީ ޖޫން، 26 ގަ އެވެ.
އެ މައްސަލައިގައި އޭނާ ޖުލައި، 2 ގައި ހައްޔަރުކުރީ ކަސްޓަމްސްއިން ތަހުލީލުކުރި ކާޓްރިޖުން ކެނެބިސްއަށް ޕޮޒިޓިވްވުމާ ގުޅިގެންނެވެ. ނަމަވެސް ފުލުހުންގެ ބެލުމުގެ ދަށަށް ގެންގޮސް، ތަހުލީލު ކުރުމުން އެ ތަކެތި އެއްވެސް މަސްތުވާ އެއްޗަކަށް ޕޮޒިޓިވްވެފައި ނުވެ އެވެ.
ކްރިމިނަލް ކޯޓުން ފަސް ދުވަހުގެ މުއްދަތަށް ބަންދުގެ މުއްދަތު ޖެހުމަށްފަހު، ޖުލައި، 8 ގައި ބަންދުން ދޫކޮށްލި އެވެ. އޭނާގެ ކުޑަކަމުދާ ތަކެތި ވެސް އެއްވެސް މަސްތުވާ އެއްޗަކަށް ޕޮޒިޓިވް ނުވެ އެވެ.
މިކަމާ ގުޅިގެން "އަދަދު" އާ ވާހަކަ ދައްކަމުން އޭނާ ބުނީ ނުހައްގުން ބަންދުކުރުމުން ބޮޑެތި ގެއްލުންތަކެއް ވެފައިވާ ކަމަށާއި ބަންދުން ދޫކޮށްލިއިރު ކުރަމުންދިޔަ ރީޓެއިލް ވިޔަފާރި ވެސް އޮތީ ހުއްޓިފައި ކަމަށެވެ.
އެގޮތުން ދައުލަތާ ދެކޮޅަށް ނުހައްގުން ބަންދު ކުރުމާއި، އަބުރުގެ ދައުވާގެ އިތުރުން ލިބުނު ގެއްލުމުގެ ބަދަލު ހޯދުމަށް ދައުވާ ކުރަން ނިންމާފައިވާ ކަމަށް އޭނާ ބުންޏެވެ.
"ހައްޔަރުކުރިއިރު އަތުގައި 3200 ޑޮލަރާއި 560 ބާތު އަދި 1،000 އިންޑިއަން ރުޕީސް އޮތް. ޑޮލަރަކީ ޝިޕްމަންޓަކަށް އޯޑަރު ކުރަން ޓީޓީ ކުރަންވެގެން ހުރި ފައިސާގެ ބައެއް. އެ ފައިސާ ދިނީ ބަންދުން ދޫކުރިތާ 8 ދުވަސް ފަހުން. އެހެންވެ ޝިޕްމަންޓަށް އޯޑަރު ނުޖެހި ގެއްލުންވި. ކުރަމުންދިޔަ ރީޓެއިލް ވިޔަފާރި އޮތީ ހުއްޓިފައި. ހުއްޓުނީ އެތަނަށް ބޭނުންވާ ސާމާނު ހަމަކުރާނެ އިތުރު މީހެއް ނެތީމަ،" އޭނާ ބުންޏެވެ.
ކުރެވުނު ތުހުމަތާ ގުޅިގެން ތަފާތު ވާހަކަތައް މީހުން ދައްކަމުން އަންނަކަން ފާހަގަކޮށް އޭނާ ބުނީ މިކަމުގެ ސަބުން މީހުން ދެކޭ ގޮތް ވެސް ބަދަލުވާނެ ކަމަށާއި އުންމީދަކީ މިފަދަ ކަމެއް އެހެން މީހަކަށް ކުރިމަތި ނުވުން ކަމަށެވެ.
އޭނާ ބުނީ ހައްޔަރުކުރުމުގެ އިތުރުން މުއްދަތު މަޖިލީހުގައި ވެސް އެ ތަކެއްޗަކީ އޭނާގެ އަމިއްލަ ނަމުގައި ގެނައި ސައްހަ ތަކެތި ކަމަށް ބުނެފައިވާ ކަމަށާއި ނަމަވެސް ކަސްޓަމްސްގެ އިހުމާލާއެކު މިފަދަ ކަމެއް މެދުވެރިވުމުން ސުވާލު އުފެދޭ ބައިވަރު ކަންކަން އެބަ ހުރި ކަމަށެވެ.
ރާއްޖެއަށް މަސްތުވާތަކެތި އެތެރެކުރުމުގެ ތުހުމަތުގައި ކަސްޓަމްސްއިން ރިޕޯޓުކޮށްގެން މީގެކުރިން ވެސް މީހުން ހައްޔަރުކުރެ އެވެ.
