މާލޭ އަމީނީ މަގުގައި ހުންނަ ކޭއެފްސީ އައުޓްލެޓުގެ ބިއްލޫރިގަނޑެއް ތަޅާލައިފި އެވެ.
ފުލުހުން ބުނީ އެތަނުގެ ބިއްލޫރިގަނޑެއް ތަޅައިލިކަމުގެ ރިޕޯޓު ލިބުނީ ރޭ 3:00 ހާއިރު ކަމަށެވެ. ނަމަވެސް މި މައްސަލާގެ އިތުރު އެއްވެސް ތަފުސީލެއް ފުލުހުން ދީފައެއް ނުވެ އެވެ.
ފުލުހުން ބުނީ މައްސަލަ ތަހުގީގުކުރަމުން އަންނަ ކަމަށެވެ.
މިދިޔަ ނޮވެމްބަރު މަހު ކޭއެފްސީ އައުޓްލެޓަށް ވަނީ ކަޅުތެޔޮވެސް ޖަހާފަ އެވެ. އެ މައްސަލާގައި މީހަކު ހައްޔަރުކުރިކަން ފުލުހުން ހާމައެއް ނުކުރެ އެވެ.
އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގާ ލާއިންސާނީ ގަތުލުއާންމާ ގުޅިގެން ކޭއެފްސީ ބޮއިކޮޓު ކުރުމަށް ގޮވާލައި އެތަނުގެ ބޭރުގައި، ލިޔުންތައް ހަރުކުރަމުން އަންނަތާ ދުވަސްކޮޅެއް ވެއްޖެ އެވެ. އިޒްރޭލަށް ވާގިވެރިވެ މާލީ އެހީދޭ ބްރޭންޑުތަކުގެ ތެރޭގައި ކޭއެފްސީ ހިމެނެ އެވެ.
ފަލަސްތީނުގެ ރައްޔިތުން އިސްވެ ހިންގާ ބޮއިކޮޓް، ޑައިވެސްޓްމަންޓް، ސެންްކްޝަންސް (ބީޑީއެސް) ހަރަކާތުން ބޮއިކޮޓް ކުރާ ލިސްޓުގައިވެސް ކޭއެފްސީ ހިމެނެ އެވެ.
މި ހަރަކާތާހެދި ކޭއެފްސީއަށް ދަނީ ބޮޑެތި މާލީ ގެއްލުންތަކެއްވެސް ކުރިމަތިވަމުންނެވެ. އެގޮތުން ބައެއް ގައުމުތަކުގައި އެ ބްރޭންޑުން ހިންގަމުންދިޔަ ރެސްޓޯރަންޓުތަކަށް ގެއްލުންވެ ވަނީ ބަންދުކުރަން ޖެހިފަ އެވެ.
ފްރެންޗަައިޒް އުސޫލުން ހިންގާ މި ރެސްޓޯރަންޓު ރާއްޖޭގައި ހިންގަނީ ގަމާ އައިލެންޑް ފުޑް ޕްރައިވެޓް ލިމިޓެޑް ކިޔާ ކުންފުންޏަކުންނެވެ. މި ކުންފުނީގެ ހިއްސާދާރުންނަކީ އައިލެންޑް ފުޑް ޕްރައިވެޓް ލިމިޓެޑް ކިޔާ ދިވެހި ކުންފުންޏަކާއި އިންޑިއާގެ ގަމާ ޕިއްޒާކްރާފްޓް އޯވާސީސް ލިމިޓެެޑެވެ.
