މަޖީދިއްޔާ ސްކޫލް ހުންނަ ސަރަހައްދަށް ކަރަންޓު ދޭން ސްޓެލްކޯއިން ބަހައްޓާފައި ހުންނަ ޓްރާންސްފޯމަރަކަށް ގުޅާފައި ހުރި ކޭބަލެއް މިދިޔަ އަންގާރަ ދުވަހު ވަގަށް ބުރިކުރި މައްސަލައިގައި އިއްޔެ ހައްޔަރު ކުރި މީހާ 15 ދުވަހަށް ބަންދު ކުރަން ކްރިމިނަލް ކޯޓުން އަމުރުކޮށްފި އެވެ.
އެ މައްސަލައިގައި ހައްޔަރު ކުރި މީހާގެ ބަންދަށް 15 ދުވަސް ޖަހާފައިވާ ކަމަށް ފުލުހުން ބުނީ މީޑިއާތަކަށް ފޮނުވި މެސެޖެއްގަ އެވެ.
މަޖީދިއްޔާ ސްކޫލް ކައިރީގައި ހުންނަ ޓްރާންސްފޯމަރަކުން މިދިޔަ އަންގާރަ ދުވަހު ވައްކަން ކުރި ކަމަށް ފުލުހުން ތުހުމަތު ކުރަނީ 32 އަހަރުގެ ދިވެހި ފިރިހެނަކަށެވެ.
ޓްރާންސްފޯމަރުން ވައްކަން ކުރުމުގެ ސަބަބުން މިދިޔަ އަންގާރަ ދުވަހު މަޖީދިއްޔާ ސްކޫލާއި ހެންވޭރު އަބަދަށްފެހި މަގާއި މެދުޒިޔާރަތް މަގުގެ އިތުރުން ކަޅުހުރާ މަހާއި ކަރަންކާ މަގުގެ ބައެއް ގެތަކުން ކަރަންޓުގެ ހިދުމަތް ކެނޑުނު ކަމަށް ސްޓެލްކޯއިން ބުނެފައިވެ އެވެ.
ސްޓެލްކޯގެ އެމްޑީ ހުސެއިން ފަހުމީ އޭރު ވިދާޅުވީ ކޭބަލްތައް ވަގަށް ނެގުމުން ސްޓެލްކޯއަށް ލިބޭ ގެއްލުމުގެ އިތުރުން އާންމު ރައްޔިތުން ކަރަންޓުގެ ހިދުމަތުން މަހުރޫމު ކުރެވެމުންދާ ކަމަށެވެ.
"މިކަމުން ލިބެމުންދާ ގެއްލުންތަކުން ސަލާމަތް ކުރުމަށްޓަކައި މިފަދަ އަމަލުތައް ކުރާ ފަރާތްތަކާއި، މިކަން ކުރާ ފަރާތްތަކަށް ހިތްވަރަކަށް ވާގޮތަށް، ވަގަށް ނަގާފައިވާ މިފަދަ ތަކެތި ގަންނަ ފަރާތްތައް ހޯދައި ގާނޫނީ ގޮތުން އެފަދަ ފަރާތްތަކާއި މެދު އަޅަންޖެހޭ އެންމެހާ ފިޔަވަޅުތައް ކަމާއި ބެހޭ ފަރާތްތަކުން އަޅަމުން ގެންދިޔުމަކީ އަޅުގަނޑުމެންގެ ވަރަށް ބޮޑު އެދުމެއް،" ފަހުމީ އޭރު ވިދާޅުވި އެވެ.
މިފަހަކަށް އައިސް ޓްރާންސްފޯމަރުތަކުން ވައްކަން ކުރުމުގެ މައްސަލަތައް އަންނަނީ އިތުރުވަމުންނެވެ. ހުޅުމާލެ ދެވަނަ ފިޔަވަހީގައި ހުންނަ ޓްރާސްފޯމަރަކުން ވައްކަން ކުރަން އުޅުނު މީހަކު ކަރަންޓުގައި ޖެހި މިދިޔަ މާޗު މަހު މަރު ވެސް ވެފައިވެ އެވެ.
