ހައުސިން ޑިވެލޮޕްމެންޓު ކޯޕަރޭޝަންގެ ޑޭޓާބޭސް ބަޔަކު ހެކުކޮށް އޯޓީޕީ ހޯދުމަށް ބައެއް މީހުންނަށް މެސެޖު ކުރަމުންދާ މައްސަލައެއް ބަލަމުންދާ ކަމަށް ފުލުހުން ބުނެފި އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ އެޗްޑީސީގެ ޑޭޓާބޭސް މެދުވެރިކޮށް މީހުންގެ އޯޓީޕީ ހޯދަން މެސެޖު ކުރަމުންދާ މައްސަލައެއް އެ އިދާރާގެ ސަމާލު ކަމަށް އައިސްފައިވާ ކަމަށެވެ.
އަދި އެ މައްސަލަ ތަހުގީގު ކުރަމުންދާ ކަމަށް ވެސް ފުލުހުން ބުންޏެވެ.
އެޗްޑީސީގެ ޑޭޓާބޭސް ހެކުކޮށް މީހުންނަށް މެސެޖު ކުރަމުންދާ މައްސަލައެއް ފެންމަތި ވެފައިވާއިރު، މީގެ ކުރިން އެޗްޑީސީގެ ނަމުގައި ތަފާތު އެކި ނަންބަރުތަކުން މީހުންނަށް މެސެޖުކޮށް މަކަރާއި ހީލަތުން ފައިސާ ހޯދާ މައްސަލަތައް ވެސް ފެންތިވެފައިވެ އެވެ.
ކިތަންމެ ގާތް މީހަކު ބުނި ނަމަވެސް ފޯނަށް އަންނަ އޯޓީޕީ ފަދަ މުހިންމު މައުލޫމާތު އެއްވެސް މީހަކާ ހިއްސާ ނުކުރުމަށް ފުލުހުން އަބަދުވެސް އިލްތިމާސް ކުރެ އެވެ.
