މި ފަހަރުގެ ޔޫރޯ ފުޓްބޯޅަ މުބާރާތުގައި ސްލޮވާކިއާގެ ބެންޗުން ފެންނަ، އިޓަލީ އަށް އުފަން، ފްރެންޗެސްކޯ ކަލްޒޯނާ އަކީ އެންމެ ތަފާތު ކޯޗެވެ. ކަލްޒޯނާ، 2022 ވަނަ އަހަރުގެ އޮގަސްޓް މަހުން ފެށިގެން، ސްލޮވާކިއާގެ ކޯޗުކަން ކުރަމުން އަންނައިރު، އޭނާ ވަނީ މި އަހަރުގެ ފެބްރުއަރީ މަހު އިޓަލީގެ ނަޕޯލީގެ ކޯޗުކަމާ ވެސް ހަވާލުވެފަ އެވެ.
މިދިޔަ ސީޒަނުގެ ނިޔަލަށް ނަޕޯލީގެ ކޯޗަކަށް ކަލްޒޯނާ ހުރީ ސްލޮވާކިއާ އިން ވެސް ހުއްދަދީގެންނެވެ. މިއީ، އެއް ފަހަރާ ދެ ޓީމެއްގެ ކޯޗަކަށް މި ގޮތަށް އެކަކު މަސައްކަތްކުރި ފުރަތަމަ ފަހަރެެވެ.
ކަލްޒޯނާ ބުނީ އެއް ފަހަރާ ދެ މަސައްކަތް ކުރުން އޭނާ އަށް "އަލެއް ނޫން" ކަމަށެވެ.
ސްލޮވާކިއާ އަކީ ކަލްޒޯނާގެ ފުރަތަމަ ފުލްޓައިމް ކޯޗިން ވަޒީފާ އެވެ. މީގެ ކުރިން، އޭނާ ހުރީ މުޅިން ވެސް އެސިސްޓަންޓް ކޯޗެއްގެ ގޮތުގަ އެވެ.
އިޓަލީގެ ކޯޗުން ކަމަށްވާ މައުރީޒިއޯ ސާރީ، އުސޭބިއޯ ޑި ފްރެންޗެސްކޯ އަދި ލޫޝިއާނޯ ސްޕަލެއްޓީއާ އެކު، އެސިސްޓަންޓެއްގެ ގޮތުގައި، ކަލްޒޯނާ މަސައްކަތްކުރި އެވެ. އެ ހުރިހާ އިރެއްގައި ވެސް އޭނާ އަކީ، ކުރިން އަދާކުރި ވަޒީފާ ކަމަށްވާ ކޮފީ ބީންސް ވިއްކުމަށް ވަގުތު ދޭ މީހެކެވެ.
ނަޕޯލީ އާއި ޗެލްސީގެ ކުރީގެ ކޯޗު، ސާރީ، އިންވެސްޓްމަންޓް ބޭންކަރެއްގެ ގޮތުގައި ހުރެ ކޯޗިން މަސައްކަތް ކުރަމުން އައިއިރު، އޭނާއާ އެކު، ކަލްޒޯނާ މަަސައްކަތްކުރީ އައީ، ކޮފީ ވިއްކުމުގެ ވިޔަފާރި ވެސް ކުރިއަށް ގެންދަމުންނެވެ.
"އަހަރެން އޭނަ (ސާރީ)އާ ބައްދަލުވީ ރައްޓެއްސަކު މެދުވެރިކޮށް، އޭނަ އަކީ ފައިނޭންޝިއަލް ޕްރޮމޯޓަރެއް. އަހަރެން އަތުގައި ހުރި ފައިސާ އަށް ހަދާނެ ގޮތެއް އަހަމުން އޭނައާ ހަވާލުކޮށް، ކަންކަން ކުރަމުން އައީ، އެކަމަކު، ކޮންމެ ފަހަރަކު ވެސް ނިމެނީ ފުޓްބޯޅައިގެ ވާހަކަ އަކުން،" ކަލްޒޯނާ ބުންޏެވެ.
ސްލޮވާކިއާގެ ކޯޗު ކަލްޒޯނާ: މިއީ އޭނާ ޓީމަކާ ހަވާލުވެ ހެޑްކޯޗެއްގެ ގޮތުގައި މަސައްކަތްކުރާ ފުރަތަމަ މުބާރާތް
މި ފަހަރުގެ ޔޫރޯގައި އެއް ގައުމަކުން އެންމެ ގިނަ ކޯޗުން ފެންނަނީ އިޓަލީންނެވެ. އިޓަލީގެ ފަސް ކޯޗުން މި ޔޫރޯގައި މަސައްކަތްކުރެ އެވެ.
ކަލްޒޯނާ ބުނީ، ދިރިއުޅުމުގެ ކަންކަން ހައްލުކުރަމުން، ފުޓްބޯޅައިގެ ތެރެއިން ކުރިއަށް ދިއުމަކީ އިޓަލީގެ "ޕެޝަން" އެކެވެ.
"އަހަރެން ކޮފީ ވިއްކާ މީހެއްގެ ގޮތުގައި ހުރެ އެ ކުރި ތަޖުރިބާ އަބަދުވެސް ހަނދާނުގައި ބަހައްޓާނަން. ދިރިއުޅުމުގެ ގިނަ ކަންކަން ދަސްވި. އަދިވެސް އަހަންނަށް ގިނަ ކަސްޓަމަރުން އެބަ ގުޅޭ ކޮފީ ހޯދަން. އަހަންނަށް މައްސަލައެއް ނޫން، އެކި މީހުންނަށް އެކި ގޮތަށް އަހަރެން އެނގުމަކީ،" ކަލްޒޯނާ ބުންޏެވެ.
ސްލޮވާކިއާ ޓީމުން ކޯޗެއް ހޯދަން މަސައްކަތް ކުރަނިކޮށް، އެ ޓީމުގެ ކުރީގެ ކެޕްޓަން، މަރެކް ހަމްސިކް ވަނީ ކަލްޒޯނާގެ ނަން ހުށަހަޅައިފަ އެވެ. ކަލްޒޯނާގެ ކިބައިގައި ހެޑް ކޯޗެއްގެ ތަޖުރިބާ ނެތް ނަމަވެސް، ހަމްސިކްގެ ބަހަށް އިތުބާރުކޮށް، ސްލޮވާކިއާ ފުޓްބޯޅަ ފެޑެރޭޝަނުން ވަނީ ކަލްޒޯނާ އަށް އެ ގައުމުގެ ކޯޗުގެ ޒިިންމާ ދީފަ އެވެ.
ޔޫރޯ ފެށުމުގެ ކުރިން، ސްލޮވާކިއާގެ ކޯޗުކަން ދޫކޮށްނުލައި، ނަޕޯލީ އަށް ކުރު މުއްދަތަކަށް ކޯޗުކޮށްދޭން ކަލްޒޯނާ ނިންމި ސަބަބެއް ވެސް އެބައޮތެވެ. އެއީ، ނަޕޯލީގައި ހުރި ސްލޮވާކިއާގެ މިޑްފީލްޑަރު، ސްޓަނިސްލާވް ލޮބޯޓްކާއާ އެކުގައި ވީހާ ވެސް ރަނގަޅަށް މަސައްކަތްކޮށް، އޭނާގެ ވަށައިގެން، ސްލޮވާކިއާ ޓީމު ރަނގަޅަށް އެތުރުމަށް ކަންކަން ދެނެގަންނާށެވެ.
ލޮބޮޓްކާ، 29، ވަނީ ސްލޮވާކިއާ އިން ޔޫރޯގައި ކުޅުނު ތިން މެޗުގެ ތެރެއިން ދެ މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ. ކަލްޒޯނާގެ މަސައްކަތް ކާމިޔާބު ކަމުގެ އެއް ހެއްކަކީ މި އެވެ.
މި ފަހަރުގެ ޔޫރޯގައި ސްލޮވާކިއާ އިން ކުޅުނު ފުރަތަމަ މެޗުގައި، ވަރުގަދަ ބެލްޖިއަމް އަތުން 1-0 އިން ސްލޮވާކިއާ މޮޅުވުމާ އެކު، އެ ގައުމުގެ ފުޓްބޯޅަ އަށް ލޯބިކުރާ އެތައް ބައެއްގެ އުންމީދުތައް މައްޗަށް ދިޔަ އެވެ. ސްލޮވާކިއާގެ ފުޓްބޯޅައިގެ ތަޖުރިބާކާރުން ދެކޭގޮތުގައި، ކަލްޒޯނާ އައިސް، ސްލޮވާކިއާ ފުޓްބޯޅައިގެ "ރަހަ ހެޔޮވަރު" ކޮއްލައި، ވަރުގަދަ ޓީމުތަކަށް ޗެލެންޖް ދޭން ފަށައިފި އެވެ.
ޔޫރޯގެ ގަދަ 16 ގައި، ސްލޮވާކިއާ އާއި އިންގްލެންޑްގެ މެޗު ފަށާނީ މިރޭ 9 ޖަހާއިރު އެވެ.
