އެމެރިކާގެ ކްރެޑިޓް ރޭޓިން އޭޖެންސީ, ފިޗުން ރާއްޖޭގެ ރޭޓިން މިއަހަރު "ސީސީސީ ޕްލަސް" އަށް ދަށްކޮށްފައި މިވަނީ އެ އެޖެންސީން ރާއްޖެ ރޭޓު ކުރަން ފެށިފަހުން ދިމާވި އެންމެ ބޮޑު އިގުތިސާދީ ގޮންޖެހުން ކަމަށްވާ ކޮވިޑަށް ފަހު ފުރަތަމަ ފަހަރަށްކަން ރޭޓިންގެ ތާރީހުން ދައްކައިފި އެވެ.
ފިޗުން ރާއްޖޭގެ ރޭޓިން ދަށްކޮށްފައި މިވަނީ ރާއްޖެއިން ބޭރުގެ ފަރާތްތަކުން ނަގާފައިވާ ދަރަނިތައް ނުދެއްކޭނެ ކަމަށް ބަލައިގެންނެވެ. މި އަހު ރޭޓިންއާއެކު ރާއްޖެއަކީ ބަނގުރޫޓުވުމުގެ ފުރުސަތު ބޮޑު ގައުމެެއްގެ ގޮތުގައި ފިޗުން ވަނީ ފާހަގަކޮށްފަ އެވެ.
ރާއްޖެއަށް އެންމެފަހުން މިފަދަ ދަށް ރޭޓިންއެއް ދީފައިވަނީ ކޮވިޑް ފެތުރެން ފެށި އަހަރު އެވެ. އެ އަހަރުގެ ކުރީކޮޅު މާޗު 2020 ގައި ރާއްޖެއަށް ދިނީ "ބީ ނެގެޓިވް" ރޭޓިންއެކެވެ. އޭގެ ފަހުން ނޮވެމްބަރު 2020 ގައި ރާއްޖޭގެ ރޭޓިން "ސީސީސީ" އަށް ދަށްކުރި އެވެ.
އޭގެ ފަހުން 2021, 2022, އަދި 2023 ގައި ވެސް ރޭޓިން ހުރީ "ބީ ނެގެޓިވް" ގަ އެވެ. މި ސަރުކާރު ވެރިކަމާ ހަވާލުވިއިރު ވެސް ރޭޓިން ހުރީ އެވަރުގަ އެވެ.
ފިޗު ރޭޓިން އަހަރުތަކުގައި ހުރި ގޮތް
- މެއި 8, 2019 - ބީ ޕްލަސް
- މާޗު 30, 2020 - ބީ ނެގެޓިވް
- ނޮވެމްބަރު 5, 2020 - ސީސީސީ
- އޮކްޓޯބަރު 28, 2021 - ބީ ނެގެޓިވް
- އޮކްޓޯބަރު 13, 2022 - ބީ ނެގެޓިވް
- އޮކްޓޯބަރު 9, 2023 - ބީ ނެގެޓިވް
- ޖޫން 26, 2024 - ސީސީސީ ޕްލަސް
އާންމު ގޮތެއްގައި ފިޗުން ރޭޓިން ރިވިއު ކުރަނީ އޮކްޓޯބަރު މަހުގެ ތެރޭގައި ކަމަށްވާއިރު މިޑް ޓާމް ރިވިއުއެއް ހަދައިން ރާއްޖޭގެ ރޭޓިން ދަށްކުރީ ފާއިތުވި އަށް މަސް ދުވަހުގެ ތެރޭގައި ރާއްޖެއަށް އޮތް ކޮންފިޑެންސް ގެއްލުމަކީ އެކަމުގެ ސަބަބެއް ކަމަށް މި ނޫހާ ވާހަކަ ދެއްކެވި މާލީ ތަޖުރިބާކާރަކު ވިދާޅުވި އެވެ.
ސަރުކާރުން ހުށަހަޅާ މާލި އިސްލާހީ އެޖެންޑާގައި ހިމެނޭ ސަބްސިޑީ ރިފޯމްތައް ތަންފީޒުކުރަން ފަށާނީ އަހަރުގެ ފަހު ކުއާޓަރުގައި ކަމަށް ފިޗުން ބުނެފައިވެ އެވެ. ސަރުކާރުން އަދި މިކަމުގައި ޓައިމްލައިނެއް ހާމަކޮށްފައި ނުވެ އެވެ.
ސަރުކާރުން ކުރިއަށް އޮތް ތަނުގައި ވެސް ހަރަދު ކުޑަކުރަން އިތުރު ހަރުކަށި ފިޔަވަޅުތައް އަޅަން މަޖުބޫރު ވާނެ ކަމަށާއި ރާއްޖެއަކީ އިމްޕޯޓަށް އެއްކޮށް ބަރޯސާވާ ގައުމަކަށްވުމާއެކު ޑޮލަރުގެ ތާށިކަން ވެސް ކުރިމަތިވާނެ ކަމަށް ވަނީ ލަފާކޮށްފަ އެވެ.
