މަސްވެރިންގެ އަތުން މިފްކޯއިން ގަނެފައިވާ މަހަށް ފައިސާ ނުދީ ގިނަ ދުވަސްވެފައިވާ މައްސަލަ ހައްލުކުރަން ގޮވާލައި ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަޅައިފި އެވެ.
މަޖިލީހަށް މި ކުއްލި މައްސަލަ ހުށަހެޅުއްވީ މަރަދޫ ދާއިރާގެ އެމްޑީޕީ މެމްބަރު އަހުމަދު ދީދީ އެވެ. އޭނާ މި މައްސަލަ މަޖިލީހަށް ހުށަހަޅުއްވާފައި މިވަނީ މިފްކޯއަށް ކިރާފައިވާ މަހަށް ފައިސާ ނުދީ ދެ މަހަށް ވުރެ ގިނަ ދުވަސްވެފައިވާ ކަމަށް ބުނެ އައްޑޫގައި މަސްވެރިން މުޒާހަރާ ކުރަމުންދާ ދަނޑިވަޅެއްގަ އެވެ.
އެގޮތުން ހުށަހެޅުއްވި މައްސަލައިގައި މިކަން ފާހަގަކުރަައްވަމުން މެމްބަރު ދީދީ ވިދާޅުވީ މިފްކޯއަށް ކިރާ މަހަށް 48 ގަޑިއިރުގެ ތެރޭގައި ފައިސާ ދޫކުރުމަކީ ސަރުކާރުގެ ވައުދެއް ނަމަވެސް އެކަން ނުވެ މަސްވެރިންނާއި މަސްވެރިންގެ އާއިލާތަކުގެ ހަރަދުތައް ނުކުރެވޭ ހިސާބަށް ގޮސް، މަސްވެރިކަމަށް ބަރޯސާވާ ރަށްރަށުގެ އިގުތިސޯދު ހުއްޓުމަކަށް އައިސްފައިވާ ކަމަށެވެ.
މި ކުއްލި މައްސަލައިގައި މެމްބަރު ވަނީ ތިން ކަމަކަށް ގޮވާލާފަ އެވެ. އެއީ މަސްވެރިން ކުރަމުންދާ އިހުތިޖާޖަށް ފުލުހުންނާއި ސިފައިން ހުރަސް ނޭޅުމަށާއި، މަސްވެރިންނަށް ދޭން ޖެހޭ ފައިސާ މިހާރުންމިހާރަށް ހަމަޖައްސައިދިނުމަށާއި، މަސްވެރިންނަށް ފައިސާ ނުލިބި ލަސްވާ މައްސަލައަށް ދާއިމީ ހައްލެއް ހޯދައިދިނުމަށެވެ.
"އައްޑޫ ހިމެނޭ ގޮތަށް ރާއްޖޭގެ އެކި ކަންކޮޅުތަކުގައި ވަރުބަލިކަމެއް ނެތި ބުރަ މަސައްކަތް ކުރަމުންދާ މަސްވެރިން އެ މީހުންގެ ހައްގުތައް ހޯދުމަށް ކުރަމުންދާ އިހުތިޖާޖަށް ފުލުހުންނާއި ސިފައިން ހުރަސް ނޭޅުމަށް ގޮވާލައި، އަދި އެ މީހުންނަށް ލިބެން ޖެހޭ ފައިސާ މިހާރުން މިހާރަށް ސަރުކާރުން ހަމަޖައްސައިދިނުމާއި، މަސްވެރިން އެދޭ ގޮތަށް ފައިސާ ނުލިބި ލަސްވާ މައްސަލައަށް އިޖާބަދީ، ދާއިމީ ހައްލެއް ހޯދައިދެއްވުމަށް ސަރުކާރަށް ގޮވާލައި ރައްޔިތުންގެ މަޖިލީހުގެ ގަވާއިދުގެ 170 ވަނަ މާއްދާގެ ދަށުން މި ކުއްލި މައްސަލަ އަޅުގަނޑު ހުށަހަޅަން" މެމްބަރު ވިދާޅުވި އެވެ.
މަޖިލީހުން މި މައްސަލަ ބަލައިގަތީ ވޯޓުގައި ބައިވެރިވީ 74 މެމްބަރުންގެ އިއްތިފާގުންނެވެ.
މިފްކޯއަށް ކިރާފައިވާ މަހަށް ފައިސާ ނުލިބޭ މައްސަލަ ބޮޑުވެފައިވާއިރު، މަސްވެރިން މިހާރު ނުލިބިގެން އުޅެނީ ސަރުކާރު ބަދަލުވެ، މަސް ގަންނަ އަގު 25ރ. އިން 20ރ. އަށް ތިރިކުރި ފަހުން މަސްވެރިންނަށް ނުދީ ހުރި ފައިސާ އެވެ.
މި މައްސަލައިގައި އައްޑޫގައި ކުރަމުންދާ އިހުތިޖާޖުގެ ތެރެއިން މަސްރަހު ގޯސްވެ، ފުލުހުން މެދުވެރިކޮށް މިފްކޯގެ އައްޑޫ ކާރުހާނާގެ ސަލާމަތީ ކަންކަން ބަލަހައްޓާ ހިސާބަށް ކަންކަން ގޮސްފައިވާއިރު ފައިސާ ދެވޭނެ ދުވަހެއް މިފްކޯ އާއި ސަރުކާރުން ވެސް ނުބުނެ އެވެ. ހައްތަހާވެސް ބުނަމުން ދަނީ ވަރަށް އަވަހަށް އެ މައްސަލަ ހައްލުކޮށް އެ ފައިސާ ދޫކުރާނެ ކަމަށެވެ.
