މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަށް މަސް ގަންނަ އަގު މާދަމާ އިން ފެށިގެން ކިލޯއެއް 20ރ. ކުޑަކޮށްފި އެވެ.
ފިޝަރީޒް މިނިސްޓަރު އަހުމަދު ޝިޔާމް "އަދަދު" ނޫހަށް ވިދާޅުވީ ސަރުކާރުން އެ ގޮތަށް ނިންމައި، މިފްކޯއަށް ވެސް މިހާރު އަންގާފައިވާ ކަމަށެވެ.
"މާދަމާއިން ފެށިގެން މިފްކޯއަށް މަސް ގަންނާނީ ކިލޯއެއް 20ރ. ގެ ރޭޓުން،" ޝިޔާމް ވިދާޅުވި އެވެ.
މިހާރު މަސް ގަންނަމުންދާ އަގު ކަމުގައިވާ 25ރ. ކަނޑައެޅީ ސެޕްޓެމްބަރު 25، 2023 ގަ އެވެ. ރިޔާސީ އިންތިހާބުގެ ކެމްޕޭނުގެ ތެރޭގައި އޭރުގެ ސަރުކާރުން މަހުގެ އަގު ބޮޑުކުރީ، ރާއްޖެއިން އިނގިރޭސިވިލާތަށާއި ޔޫރަޕަށް އެކްސްޕޯޓުކުރާ މަހުން ނަގާ ޑިއުޓީ ކަނޑާލާނެކަން ޔަގީންވެފައިވާތީ ކަމަށް ބުނެފަ އެވެ.
ނަމަވެސް ފިޝަރީޒު މިނިސްޓަރު ޝިޔާމް ވިދާޅުވީ ކުރީގެ ސަރުކާރުން އޭރު ސަރުކާރުން ބުނި ގޮތަށް އެކަން ވާނެކަމުގެ އެއްވެސް އިޝާރާތެއް މި ވޭތުވެދިޔަ ތިން މަސް ދުވަހު ފެންނަން ނެތް ކަމަށެވެ.
"މަސްވެރިން ވެސް ބުނަނީ 20ރ. އަށް ކުޑަކޮށްގެން ވިޔަސް ފައިސާ ދެވޭނެ ގޮތެއް މުހިންމު ކަމަށް. އަދި މި ބަދަލު ގެނަން ޖެހުނީ މިފްކޯ ސަލާމަތް ކުރަން،" ޝިޔާމް ވިދާޅުވި އެވެ.
ކުރިއަށް އޮތް ތަނުގައި މަސްވެރިންނަށް ބަރާބަރަށް ފައިސާ ދޫކުރަން ފެށޭނެ ދުވަސް އަންނާނެ ކަމަށް ޝިޔާމް ވިދާޅުވި އެވެ. މިހާރު ވެސް މަސްވެރިންނަށް ގިނަ އަދަދެއްގެ ފައިސާ ދޫނުކުރެވި އެބަ ހުއްޓެވެ.
