އިންޑިއާގެ ޓްރިވެންޑްރަމް، ކޮޗިން އަދި ބެންގަލޫރުގައި ތާށިވެފައި ތިބި މޯލްޑިވިއަންގެ ފަސިންޖަރުންނަށް އަނބުރާ ރާއްޖެއަށް އާދެވޭނެ ގޮތް ހަމަޖެހިއްޖެ އެވެ.
މޯލްޑިވިއަންގެ ފަސިންޖަރުންތަކެއް އިންޑިއާގެ ތިން ސްޓޭޓެއްގައި ތާށިވީ އެ އެއާލައިންގެ އެއާބަސް A-320 ގެ ފްލައިޓަށް ދިމާވި ޓެކްނިކަލް މައްސަލައަކާ ގުޅިގެން އިންޑިއާއިން ނުފުރިގެންނެވެ.
އެ ފްލައިޓު މާލެއިން އިންޑިއާއަށް ދިޔުމަށް މިސްރާބު ޖެހި ނަމަވެސް މާ ގިނައިރުތަކެއް ނުވަނީސް އަނބުރާ ވަނީ ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ޖައްސާފަ އެވެ. އެކަމާ ގުޅޭ ތަފްސީލެއް މޯލްޑިވިއަން އިން މިހާތަނަށް ހާމަކޮށްފައެއް ނުވެ އެވެ.
ކޮޗިންގައި ތާށިވެފައި ހުރި މޯލްޑިވިއަންގެ ފަސިންޖަރަކު "އަދަދު" އާ ވާހަކަ ދައްކަމުން ބުނީ ފަސިންޖަރުންތައް މިއަދު ހެނދުނު އެއާޕޯޓަށް ގެންގޮސް ފުރުވާލަނީ އިންޑިގޯގެ ފްލައިޓެއް މެދުވެރިކޮށް ކަމަށެވެ.
"އިއްޔެ ފުރި ބައެއް މީހުންނަށް ދަތިތައް ދިމާވި. ބަރުވެގެން ފައިސާ ވެސް ނެގި. ނަމަވެސް މިއަދު ފުރި މީހުން ބަރުވި ނަމަވެސް އިތުރަށް ފައިސާއެއް ނުނަގާ. އެންމެން ވެސް އިއްޔެ ފުރަން ދިޔައީ މޯލްޑިވިއަންގެ ފްލައިޓުން ކަނޑައަޅާފައިވާ ބަރުދަނަށް ބަރޯސާވެގެން،" ފަސިންޖަރު ބުންޏެވެ.
މޯލްޑިވިއަންގެ ކޯޕަރޭޓް ސޭލްސް މުހައްމަދު ނަސީރު ވިދާޅުވީ އިއްޔެއިން ފެށިގެން ތާށިވެފައި ތިބި ފަސިންޖަރުން އަނބުރާ ރާއްޖެ ގެންނަމުންދާ ކަމަށާއި މިއަދު ވެސް ބައެއް ފަސިންޖަރުންތައް ގެނައުމަށް ހަމަޖެހިފައިވާ ކަމަށެވެ.
"ފަސިންޖަރުންގެ ހާލު ބަލައި އޮޕްޝަންތައް އިއްޔެއިން ފެށިގެން ދެމުން މިދިޔައީ. ޓްރިވެންޑްރަމްގައި ތިބި ހުރިހާ ފަސިންޖަރުން މިހާރު ގެނެވިއްޖެ. މިއަދު ކޮޗިންއާއި ބެންގަލޫރުގައި ތިބި ފަސިންޖަރުން ގެނެވޭނެ،" ނަސީރު ވިދާޅުވި އެވެ.
ތާށިވި ފަސިންޖަރުންނަށް މޯލްޑިވިއަންއިން ވަނީ ހޮޓަލް ހަމަޖައްސައި، ކެއުމުގެ އިތުރުން ޓްރާންސްޕޯޓު ވެސް ހަމަޖައްސައިދީފަ އެވެ.
މީގެކުރިން ވެސް މޯލްޑިވިއަންގެ ފަސިންޖަރުންތައް އިންޑިއާގައި ތާށިވެފައި އެބަ ހުއްޓެވެ. އެއީ ހަމަ ފްލައިޓަކަށް ދިމާވި ޓެކްނިކަލް މައްސަލައަކާ ގުޅިގެންނެވެ.
