މާލީ ކަންކަމާ ގުޅޭ ގޮތުން ރައީސް ޑރ. މުހައްމަދު މުއިއްޒު ދައްކަވާ ވާހަކަތަކާއި އަސްލު ހިސާބުތަކާއި ނަންބަރުތަކާ ދިމާނުވާ ކަމަށް އިއްޔެ ރިޕޯޓުކުރި އެވެ. އަދަދު ނޫހުގެ ސަބް އެޑިޓަރު ސާއިފު ސައީދު ލިޔުނު ރިޕޯޓުގައި އެ ތަފްސީލްތައްވެ އެވެ.
---
"ގާތްގަނޑަކަށް 13 ބިލިއަން ރުފިޔާ މި ހަތް މަސް ތެރޭގައި އަޅުގަނޑުމެން މިއައީ ދައްކާފައި. އެއީ އަޅުގަނޑުމެންނާ ދެކޮޅު ބޭފުޅުން, ވާދަވެރި ބޭފުޅުން ފޮރުވަން ބޭނުންވާ ހަގީގަތް. އަޅުގަނޑުމެން ދައްކާނީ ތެެދު ބަހުން ވާހަކަ."
މިއީ އިއްޔެ ރޭ ސަރުކާރުގެ ހިންގާ ޕާޓީ, ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ހަރުގެ ހުޅުވަން ބޭއްވި ޖަލްސާގައި ރައީސް ޑރ. މުހައްމަދު މުއިއްޒު އެންމެ ފަހުރުވެރިކަމާ އެކު ދެއްކެވި ވާހަކަ އެވެ. ބޭރުގެ ދަރަންޏާއި, އެތެރޭގެ ދަރަންޏާއި, ސޮވްރިންް ޑިވެލޮޕްމަންޓު ފަންޑުގެ ވާހަކައަކީ ރައީސްގެ ވާހަކައިގެ އެންމެ މުހިންމު އުސްއަލިތަކެވެ.
އެމަނިކުފާނު މިހެން ވިދާޅުވުމުން ވެސް އެންމެ ބޮޑު ސުވާލެއް އުފެދުނީ 18 ބިލިއަން ރުފިޔާ މިއަހަރުގެ ބަޖެޓުން ހޭދަކުރިއިރު އޭގެ 72 ޕަސެންޓު ދަރަނި ދެއްކުމަށް ހޭދަކުރުމަށް ފަހު ބާކީ އޮތް ފަސް ބިލިއަނުން ދައުލަތުގެ ހަރަދުތައް ހަމަޖައްސާނެ ގޮތަކާ މެދު އެވެ.
"ބާކީ އޮތް 13 ބިިލިއަން ރުފިޔާ އެއީ ހުސް ކުރީ ސަރުކާރުގެ "ދަރަނި" ތޯ؟ މި ސަރުކާރުން އޮފީސް ވެސް ނުހުޅުވަނީތޯ ޑްރޯންވެސް ނުގަންނަނީތޯ؟ ރައީސް އާއި ކެބިނެޓް ވަޒީރުން ދަތުރުވެސް ނުކުރައްވަނީތޯ؟," އެކަމާ ގުޅިގެން ސުވާލު އުފައްދަވަމުން ކުރީގެ ފިނޭންސް މިނިސްޓަރު އިބްރާހިމް އަމީރު ވެސް ވިދާޅުވި އެވެ.
ބާކީ ފަސް ބިލިއަން ރުފިޔާއިން މުވައްޒަފުންނަށް މުސާރަ ވެސް ނުދެވޭނެ އެވެ. ގިނަ އަދަދެއްގެ ސިޔާސީ މަގާމުތަކެއް އުފައްދާފައިވާއިރު މުވައްޒަފުންގެ މުސާރައަށް އެކަނި 5.5 ބިލިއަން ރުފިޔާ ހޭދަވި ކަމަށް ފިނޭންސް މިނިސްޓްރީން ހާމަކުރާ ދައުލަތުގެ މާލީ ހިސާބުކިތާބުން އެނގެ އެވެ.
"މި އަހަރުގެ މިހާތަނަށް އެޑްމިނިސްޓްރޭޓިވް އަދި އޮޕަރޭޝަނަލް ހަރަދަށް އެކަނިވެސް 200 މިލިއަން އިތުރަށް ހަރަދު ކޮށްފި. މުސާރަ އާއި ދަައުލަތުގެ ހިންގުމުގެ ޚަރަދަށް އެކަނި 600 މިލިއަން ރުފިޔާ އިތުރުވެއްޖެ. 700 ގައި ހުރި ސިޔާސީ މަގާމުތައް މިހާރު ހުރީ 2000 އަށް ވުރެ މަތީގައި," އަމީރު ވިދާޅުވެފައިވެ އެވެ.
ފިސްކަލް ރިޕޯޓްތަކުން ފެންނަ ގޮތުގައި މުވައްޒަފުންނަށް ކުރާ ހަރަދު ދަނީ ބޮޑުތަނުން އިތުރުވަމުންނެވެ. މުވައްޒަފުންނަށް ހިނގާ ހަރަދު މި އަހަރު ވަނީ 11 ޕަސެންޓުން އިތުރުވެފަ އެވެ. ރިކަރަންޓް ހަރަދުވެސް ވޭތުވެދިޔަ އަހަރަށްވުރެ 617 މިލިއަނުން ވަނީ އިތުރުވެފަ އެވެ.
ބަޖެޓުގައި ރާވައިފައިވާ ހުރިހާ އިސްލާހީ ފިޔަވަޅުތައް ލަސްވެފައި ވާއިރު، ސަރުކާރުން ވަނީ ބަޖެޓް ނުހިމެނޭ ބައެއް މަސައްކަތްތައް ފަށާފަ އެވެ. އޭގެ ސަބަބުން ދައުލަތުގެ ބަޖެޓާއި ކޭޝްފްލޯގެ ހާލަތު އިތުރަށް ވަނީ ގޯސްވެފަ އެވެ.
އޭގެ ތެރޭގައި ސިޔާސީ ވަޒީފާ އިތުރުކުރުމާއި، އެއާ އެމްބިއުލާންސްގެ ހިދުމަތް ފަދަ އާ ހިދުމަތްތައް ތައާރަފު ކުރުމާއި، ޑްރޯން ގަތުމާއި، ސްކޫލް އޭސީ ޕްރޮޖެކްޓާއި، ބަޖެޓަށް ބެލުމެއް ނެތި ހުރިހާ ފަރާތްތަކަށް ސްޓޫޑެންޓް ލޯނު ދިނުމާއި، ގައުމިއްޔަތުގެ މަޝްރޫއު އާއި، އެކި ޖަމިއްޔާ ޖަމާއަތްތަކަށާއި މީޑިއާތަކަށް މާލީ އެހީތެރިކަން ފޯރުކޮށްދިނުން ފަދަ ކަންކަން ހިމެނެ އެވެ.
ދަރަންޏަށް 13 ބިލިއަން ދައްކައި މުސާރައަށް ފަސް ބިލިއަން ހޭދަކުރާ ދައުލަތަކުން އަހަރުގެ ފުރަތަމަ ހަ މަހުގެ ބިލިއަނުގެ ބަޖެޓުން ކުރެވޭނެ އިތުރު ހަރަދެއް ނެތެވެ. ސަރުކާރުން ހަރަދުތައް ކުޑަކުރި ކަމަށް ބުނި ނަމަވެސް ރަސްމީ މާލީ ހިސާބުކިތާބުތަކުން ފެންނަނީ އެހެން މަންޒަރެކެވެ. ހަރަދުތައް ކުޑަވީ ހަމައެކަނި ޕްރޮޖެކްޓުތައް މަޑުޖައްސައިލުމުންނެވެ.
