ޑަސެލްޑޯފް (ޖޫން 25) - ޔޫރޯ ފުޓްބޯޅަ މުބާރާތުގައި މިރޭ އަލްބޭނިއާ އަތުން 1-0 އިން މޮޅުވެ، ސްޕެއިނުން ސައްތަ އިން ސައްތަ ރެކޯޑަކާ އެކު ނޮކައުޓް ބުރަށް ތައްޔާރުވެއްޖެ އެވެ.
މިއީ، 2008 ވަނަ އަހަރުގެ ޔޫރޯ އަށް ފަހު ސްޕެއިނުން ފުރިހަމަ ރެކޯޑަކާ އެކު ޔޫރޯގެ ގްރޫޕް ސްޓޭޖެއް ނިންމާލި ފުރަތަމަަ ފަހަރެވެ.
ގްރޫޕް ބީގެ އެއް ވަނަ ސްޕެއިނުން ތިން މޮޅާ އެކު، ނުވަ ޕޮއިންޓް ހޯދައިގެން ހާސިލްކުރިއިރު، އެ ޓީމަކީ މި ފަަހަރުގެ ޔޫރޯގައި ފުރިހަަމަ ރެކޯޑަކާ އެކު ގްރޫޕް ސްޓޭޖު ނިންމާލި ފުރަތަމަ ޓީމެވެ.
މި ގްރޫޕުން އިޓަލީ ދެ ވަނަ ޓީމުގެ ގޮތުގައި އަނެއް ބުރަށް ދިޔައީ، ތިން މެޗުން ހަތަރު ޕޮއިންޓާ އެކު އެވެ. ތިން ވަނައިގައި ނިންމި ކްރޮއޭޝިއާ އަށް ދެ ޕޮއިންޓް ލިބިފައިވާއިރު، އެ ޓީމަށް ނޮކައުޓް ބުރުގެ ފުރުސަތު ލިބޭކަން އެނގޭނީ ގްރޫޕް ސްޓޭޖުގެ ކުޅުން ނިމޭއިރު، އެ ޓީމަށް އެންމެ ރަނގަޅު ނަތީޖާ ނެރުނު ތިން ވަނަ ޓީމުތަކުގެ ތެރެއިން ގަދަ ހަތަރެއްގައި ހިމެނޭނަމަ އެވެ. ޔޫރޯގެ ހަ ގްރޫޕްގެ ތިން ވަނަ ޓީމުތަކުގެ ރޭންކިންގެ ތެރެއިން ގަދަ ހަތަރަކަށް ވެސް ނޮކައުޓުން ފުރުސަތު ލިބޭނެ އެވެ.
ގްރޫޕް ބީގެ ފުލަށް ދިޔަ އަލްބޭނިއާ ވަނީ އެއް ޕޮއިންޓާ އެކު މުބާރާތުން ކަޓައިފަ އެވެ.
ސްޕެއިނުން ގިނަ ބަަދަލުތަކާ އެކު މިރޭގެ މެޗަށް ފުރަތަމަ އެގާރަ ނެރުނުއިރު، އެ ޓީމުން ވަނީ މެޗު ފަށައިގެން އަލްބޭނިއާ ފަހަތަށް ބާރު ބޮޑުކުރަން ފަށައިފަ އެެވެ. އެ ގޮތުން، މެޗުގެ 11 ވަަނަ މިނިޓްގައި ސްޕެއިނުގެ ފޯވާޑް، ހޮސޭލޫ ވަނީ ބޮލުން ހަމަލާއެއް ފޮނުވާލައިފަ އެވެ. އެ ބޯޅަ އަލްބޭނިއާގެ ކީޕަރު، ތޯމަސް ސްޓްރަކޯޝާ ވަނީ މަތަކޮށްފަ އެވެ.
އޭގެ މިނިޓެއް ފަހުން، ސްޕެއިނުން ލީޑުނެގި އެވެ. މި ލަނޑު ޖެހީ ޑެނީ އޯލްމޯ ދިން ބޯޅައަކުން އޭރިއާތެރެއިން ފެރާން ޓޮރޭޒް އެވެ. އޭނާ ޖެހި ބޯޅަ ގޯލަށް ވަނީ ދަނޑީގައި ޖެހިފަ އެވެ. މިއީ ގައުމީ ޓީމަށް ޓޮރޭޒް ޖަހައިދިން 20 ވަނަ ލަނޑެވެ. މިއީ، މި ފަަހަރުގެ ޔޫރޯގައި އަލްބޭނިއާ ކޮޅަށް މެޗެއްގައި ފުރަތަމަ ގޯލެއް ވަން ފުރަތަމަ ފަހަރެވެ.
ފުރަތަމަ ހާފު ނިމުމުގެ ކުރިން އަލްބޭނިއާ އިން އޭރިއާބޭރުން ރަނގަޅު ޝޮޓެއް ފޮނުވާލި އެވެ. އަލްބޭނިއާގެ ކްރިސްޓްޖާން އަލްސާނީ ޖެހި ބޯޅަ ސްޕެއިނުގެ ގޯލްކީޕަރު، ޑޭވިޑް ރާޔާ ވަނީ މަތަކޮށްފަ އެވެ.
ސްޕެއިނުން ދެ ވަނަ ހާފުގައި ބަދަލުތަކެއް ގެނެސްގެން، ބޯޅަ ހިފަހައްޓައިގެން ކުޅެ އިތުރު އެޓޭކްތަކެއް ކުރެވޭތޯ މަސައްކަތްކުރި އެވެ. އެކަމަކު، އަލްބޭނިއާ އިން ދިޔައީ ރަނގަޅަށް ޑިފެންސްކޮށް ކައުންޓާގައި އެ ޓީމަށް ވެސް ލަނޑެއް ޖެހޭތޯ ބަލަމުންނެވެ.
އަލްބޭނިއާ އަތުން ސްޕެއިން މި ވަނީ މި ދެ ޓީމު ބައްދަލުކުރި ނުވަ މެޗުން ވެސް މޮޅުވެފަ އެވެ.
