އިންޑިއާގެ ޓްރިވެންޑްރަމް، ބެންގަލޫރު އަދި ކޮޗިންގައި ތާށިވެފައި ތިބި ގައުމީ އެއާލައިން މޯލްޑިވިއަންގެ ފަސިންޖަރުން ކަންބޮޑުވުން ފާޅުކޮށްފި އެވެ.
އިންޑިއާގެ ތިން މަންޒިލެއްގައި ތިބި މޯލްޑިވިއަންގެ ފަސިންޖަރުން ތާށިވީ އެ އެއާލައިންގެ އެއާބަސް A320 ގެ ފްލައިޓަށް ދިމާވި ޓެކްނިކަލް މައްސަލައަކާ ގުޅިގެން އިންޑިއާއަށް ނުދެވުމުންނެވެ.
އެ ފްލައިޓު އިއްޔެ ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ފުރައިގެން އިންޑިއާއަށް މިސްރާބު ޖެހި ނަމަވެސް، ފްލައިޓަށް ދިމާވި މައްސަލައާއެކު އަނބުރާ ވީއައިއޭއަށް ވަނީ ޖައްސާފަ އެވެ. އަދި މިކަމާ ގުޅޭ ތަފްސީލެއް މިހާތަނަށް މޯލްޑިވިއަންއިން ހާމަކޮށްފައެއް ނުވެ އެވެ.
މޯލްޑިވިއަންގައި ދަތުރުކުރަން ހަމަޖެހިފައިވާ ފަސިންޖަރުން "އަދަދު" އާ ވާހަކަ ދައްކަމުން ބުނީ އެމީހުންނަށް ނުފުރޭކަން އެނގުނީ ރޭ ފަތިހު އެއާޕޯޓަށް ދެވުމުން ކަމަށާއި ނަމަވެސް މޯލްޑިވިއަންގެ ފްލައިޓަށް ޓެކްނިކަލް މައްސަލައެއް ދިމާވެފައިވާކަން އިއްޔެ އެނގޭއިރު ގޮތްތަކެއް ހަމަޖައްސާފައި ނުވާ ކަމަށެވެ.
ހޮޓާތަކަށް ފޮނުވި ފަސިންޖަރުންނަށް ލިބެނީ ހަމައެކަނި ހެނދުނުގެ ނާސްތާ ކަމަށާއި މެންދުރާއި ރޭގަނޑު ކެެއުން ހަމަޖައްސަން މޯލްޑިވިއަން އިން ބުނެފައި ވަނީ އަމިއްލައަށް ކަމަށް ވެސް ފަސިންޖަރުން ބުނި އެވެ.
އިންޑިގޯއިން ބައެއް ފަސިންޖަރުންނަށް ޓިކެޓު މިހާރު ނަގާފައިވާކަން ފާހަގަކޮށް މައުލޫމާތު ދިން މީހަކު ބުނީ މޯލްޑިވިއަންގެ ލަގެޖު ކިލޯއަށް ބަރޯސާވެގެން އައި މީހުން ބަރުވެގެން ލަގެޖަށް ފައިސާ ދައްކަން ޖެހުނު ކަމަށާއި މޯލްޑިވިއަންގެ އެހީތެރިކަމެއް އެކަމުގައި ވެސް ނުލިބޭ ކަމަށް ފަސިންޖަރު ބުނި އެވެ.
"މޯލްޑިވިއަންގެ އިންތިޒާމުތަކާ މެދު ހިތްހަމަ ނުޖެހޭ. އެއާޕޯޓަށް ގެނައީ ނުފުރޭނެކަން އެނގިތިބެ. ކުރިންވެސް އެންގޭނެ އަޅުގަނޑުމެންނަށް ނުފުރޭކަން. ވާނުވާ ނޭގި އެތައް އިރެއް އެއާޕޯޓުގައި ތިބެން ޖެހުނު. ހޮޓާތަކަށް ފޮނުވިއިރު އަމިއްލަ ހަރަދުގައި ކާން ޖެހުމަކީ ބަލައިގަނެވޭނެ ކަމެއް ނޫން. މިއީ އަޅުގަނޑުމެންގެ މައްސަލައަކުން ވީ ކަމެއް ނޫން،" ފަސިންޖަރަކު ބުންޏެވެ.
މީގެއިތުރުން ބަލި މީހުންނާއި އުމުރުން ދުވަސްވީ މީހުން އެއާޕޯޓުގައި ކާއެއްޗެއް ނުލިބި ގިނަ އިރުތަކެއްވި ކަމަށާއި މުއާމަލާތްކުރަން މޯލްޑިވިއަންގެ އެއްވެސް ދިވެހި މުވައްޒަފަކާ ބައްދަލުނުވި ކަމަށް ވެސް ފަސިންޖަރު ވަނީ ބުނެފަ އެވެ.
މޯލްޑިވިއަންގެ ކޯޕަރޭޓް ސޭލްސް މުހައްމަދު ނަސީރު "އަދަދު" އަށް ވިދާޅުވީ މޯލްޑިވިއަންގެ 200 އެއްހާ ފަސިންޖަރުން ޓްރިވެންޑްރަމް، ކޮޗިން އަދި ބެންގަލޫރުގައި ތާށިވެފައިވާ ކަމަށާއި އެ އެންމެން ގެނައުމަށް މަސައްކަތް ކުރަމުން އަންނަ ކަމަށެވެ.
"ފަސިންޖަރުންނަށް އެކި އޮޕްޝަންތައް ދެމުން މިދަނީ. ބައެއް މީހުން ހޮޓެލްތައް ހަމަޖައްސައި ވަނީ ފޮނުވާފައި. ބައެއް މީހުންނަށް އެހެން އެއާލައިންތަކުން ރީފަންޑު ދީފައި ޓިކެޓު މިދަނީ ހޯދައިދެމުން. ވީ އެންމެ އަވަހަކަށް ފަސިންޖަރުން ގެންނަން މަސައްކަތް މި ކުރަނީ. ސީދާ އެންމެން ގެނެވޭނެ އިރެއް ބުނާކަށް ނޭގޭ،" ނަސީރު ވިދާޅުވި އެވެ.
މީގެކުރިން ވެސް މޯލްޑިވިއަންގެ ފަސިންޖަރުންތައް އިންޑިއާގައި ތާށިވެފައި އެބަ ހުއްޓެވެ. އެއީ ހަމަ ފްލައިޓަކަށް ދިމާވި ޓެކްނިކަލް މައްސަލައަކާ ގުޅިގެންނެވެ.
