ޑަސެލްޑޯފް (ޖޫން 24) - ޔޫރޯ ފުޓްބޯޅަ މުބާރާތުގައި މިރޭގެ މެޗުގައި ސްޕެއިނާ ދެކޮޅަށް ނަތީޖާ ނެރެންޖެހޭ މެޗެއްގައި ނުކުންނަން ޖެހުނަސް އަލްބޭނިއާގެ ފޯކަސް ހުރީ މެޗުން މޮޅެއް ހޯދައި ތާރީހީ ކާމިޔާބަކަށް ކަމަށް އެ ޓީމުގެ ކޯޗު ސިލްވީނިއޯ ބުނެފި އެވެ.
ގްރޫޕް ބީގެ ތާވަލަށް ބަލާއިރު، ސްޕެއިން މި ވަގުތު ވެސް އޮތީ ހަ ޕޮއިންޓް ހޯދައިގެން އަނެއް ބުރު ޔަގީންކޮށްފަ އެވެ. ގްރޫޕްގެ ދެ ވަނައިގައި އޮތް އިޓަލީ އަށް ތިން ޕޮއިންޓް ލިބިފައިވާއިރު، ތިން ވަނައިގައި އޮތް އަލްބޭނިއާ އާއި ހަތަރެއްގައި އޮތް ކްރޮއޭޝިއާ އަށް ވަނީ ޕޮއިންޓެއް ލިބިފަ އެވެ.
އަލްބޭނިއާ އިން މިރޭ ސްޕެއިނާ ދެކޮޅަށް ނަތީޖާއެއް ނެރެފިނަމަ، އެ ގައުމުގެ ފުޓްބޯޅަ ތާރީހުގައި ފުރަތަމަ ފަހަރަށް ބޮޑު މުބާރާތެއްގެ ގްރޫޕް ސްޓޭޖު ފަހަނައަޅައިދާނެ އެވެ.
އަލްބޭނިއާ މިހާތަނަށް ސްޕެއިނާ ދެކޮޅަށް ކުޅުނު ނުވަ މެޗުން ވަނީ ބަލިވެފަ އެވެ. އެހެން ނަމަވެސް، އެކަމަށް މާ ބޮޑު ސަމާލުކަމެއް ނުދީ، ކުރިމަތީގައި އޮތް ޗެލެންޖް ކާމިޔާބު ކުރަން ވިސްނާނެ ކަމަށް އަލްބޭނިއާގެ ކޯޗު ސިލްވީނިއޯ ވަނީ ބުނެފަ އެވެ.
ސްޕެއިނުގެ ބާސެލޯނާ އަށް ކުރިން ކުޅުނު ސިލްވީނިއޯ ބުނީ އަލްބޭނިއާ އަށް ވެސް މި މެޗުން ހާސިލްކުރެވޭނެ ކަންކަން ހުރުމުން އުންމީދު އެބައޮތް ކަމަށެވެ.
"ތެދެއް، އަހަރެމެންނަށް އެނގޭ ސްޕެއިނަކީ ވަރުގަދަ ޓީމެއް ކަން. އަހަރެމެން ވެސް މި ތިބީ ހާސިލްކުރެވޭނެ ބޮޑު އެއްޗެއްގެ އުންމީދުގައި، އަހަރެމެން މަސައްކަތް ކުރާނަން. އަހަރެމެންގެ އެބަތިބި ވިސްނުންތޫނު އަދި ހިތްވަރުހުރި ކުޅުންތެރިން، އެހެންވީމަ، އުންމީދާ އެކު މި ދަނީ، ކުރިއަށް،" ސިލްވީނިއޯ ބުންޏެވެ.
އޭނާ ބުނީ، އަލްބޭނިއާގައި ދިރިއުުޅޭ ތިން މިލިއަން މީހުންނާ މުޅި ދުނިޔޭގެ އެކި ހިސާބުތަކުގައި އުޅޭ އަލްބޭނިއާ އަށް ނިސްބަތްވާ 10 ވަރަކަށް މިލިއަން މީހުންނަށް މިއީ ވަރަށް ހާއްސަ މުބާރާތެއް ކަމަށެެވެ. މީގެ ކުރިން އަލްބޭނިއާ އަށް ނިސްބަތްވާ އެތައް ޖީލަކަށް އެ ޓީމު ޔޫރޯގައި ކުޅެނިކޮށް ނުފެންނަ ކަމަށާއި މި ފަހަރު އުންމީދަކާ އެކު ކުރިއަށްދާ މަންޒަރު ފެންނާތީ، މިއީ އެ ގައުމުގެ ފުޓްބޯޅަ ކުރިއަށް އެޅި ފިޔަވަޅެއްގެ ގޮތުގައި ސިލްވީނިއޯ ގަބޫލުކުރެ އެވެ.
މި ފަހަރުގެ ޔޫރޯގައި އަލްބޭނިއާ އިން ކުޅުނު ދެ މެޗުގައި ވެސް ފުރަތަމަ ލަނޑު ޖެހީ އެ ޓީމުންނެވެ. ސިލްވީނިއޯ ބުނީ، ފުރަތަމަ ލަނޑު ޖެހުމަށް ވުރެ އެ ޓީމަށް ހަގީގަތުގައި ބޭނުންތެރި ކަމަކީ މުޅި މެޗުގައި ބަހައްޓަން ޖެހޭ ސަމާލުކަމާ އެކީ ކުރިއަށްދިއުން ކަމަށެެވެ.
ސްޕެއިނާއި އަލްބޭނިއާ ކުޅޭ މެޗު ފަށާނީ 12 ޖަހާއިރު އެވެ. ހަމަ އެ ވަގުތުގައި މި ގްރޫޕްގެ އަނެއް މެޗުގައި ކްރޮއޭޝިއާ އިން އިޓަލީއާ ކުޅޭނެ އެވެ.
