މިފްކޯގެ އޮޕަރޭޝަންތައް އާންމު ހާލަތަށް ގެންދިއުމަށް މުވައްޒަފުން ކުރަމުންދާ މަސައްކަތްތަކާއި, ފުލުހުންގެ ޒިންމާތަކަށް ހުރަސް އަޅާ ދޯނިފަހަރުތަކުން މަސްގަތުން ތިން މަސް ދުވަހަށް ސަސްޕެންޑު ކުރާނެ ކަމުގެ އިންޒާރު ދީފި އެވެ.
އައްޑޫ ފިޝަރީޒް ކޮމްޕްލެކްސްގައި ބައެއް ދޯނިފަހަރުގެ މަސްވެރިން ބުރާސްފަތި ދުވަހުން ފެށިގެން ހިންގަމުންދާ އިހުތިޖާޖާ ގުޅިގެން މިފްކޯއިން ނެރުނު ބަޔާނުގައި މި އިންޒާރު ދިނީ, އެ އިޖުތިޖާޖުގައި ފިޝަރީޒް ކޮމްޕްލެކްސްގެ މަނާ ސަރަަހައްދުތަކަށް ވަދެ, ތަނުގެ އޮޕަރޭޝަނަށް ހުރަސް އަޅާ އަދި ތަނުގެ މުވައްޒަފުންގެ އަސާސީ ހައްގުތަކަށް ހުރަސްއަޅާ ކަމަށް ބުނެ އެވެ.
އައްޑޫ ފިޝަރީޒް ކޮމްޕްލެކްސްގައި މިހާރު ކުރަމުން ގެންދާ އިހުތިޖާޖުތަކާ ގުޅިގެން އެ ތަނުގެ އޮޕަރޭޝަން ހުއްޓި, ކުންފުންޏަށް މާލީ ގޮތުން ގެއްލުން ވަމުންދާތީ، އެ ތަން އޮޕަރޭޝަނަށް ގެނައުމަށް ކަމާއިބެހޭ ފަރާތްތަކާއި ގުޅިގެން އެ ކުންފުނިން އަންނަނީ މަސައްކަތް ކުރަމުންނެވެ.
މިފްކޯއިން ބުނީ, އިޖުތިޖާޖުގެ ބައިވެެރިން ފިޝަރީޒް ކޮމްޕްލެކްސްގެ މުވައްޒަފުންގެ ކެންޓީނަށް ގެއްލުންދީ، އެކަމޮޑޭޝަން އޭރިއާއަށް ރޭގައި ކަރަންޓު ދޭން ފުރުސަތު ދީފައިނުވާތީ، މުވައްޒަފުންގެ ކެއުމާއި، ނިދުމާއި ފާހާނާކުރުންފަދަ ޒަރޫރީ ކަންކަމަށް ބުރޫއަރާފައިވާ ކަމަށެވެ.
އެ ކުންފުނީގެ މަސް ރައްކާކުރާ ކޯލްޑް ސްޓޯރޭޖާއި ޕަވާ ހައުސް އިމާރާތްތާއި، މުވައްޒަފުން ދިރިއުޅެން ކަނޑައަޅާފައިވާ ސަރަހައްދުފަދަ ހުއްދަ ލިބިގެން ނޫނީ ވަނުން މަނާ ސަރަހައްދުތަކަށް ވަދެ، ތަނުގެ އޮޕަރޭޝަން ހުއްޓޭފަދަ ގޮތަކަށް އަމަލުތައް ބަހައްޓާފައިވާ ކަަމަށް ވެސް މިފްކޯއިން ބުންޏެވެ.
އައްޑޫ ފިޝަރީޒް ކޮމްޕްލެކްސްގެ އޮފީސް އިމާރާތާއި އެކޮމޮޑޭޝަން ބްލޮކަށް، ފުލުހުން މެދުވެރިވެގެން ކަރަންޓު ދިނުމަށް މިފްކޯއިން މިއަދު ހަވީރު މަސައްކަތް ކޮށްފައިވެ އެވެ. ފުލުހުން ބުނީ އެކަމުގައި ހަރަކާތްތެރި އިރު، އެއްވެފައިވާ މީހުންގެ އަމަލުތައް ހުރިގޮތުން ފުލުހުން ބާރުގެ ބޭނުން ކޮށްފައިވާނެ ކަމަށެވެ.
"ފުލުހުން މެދުވެރިވެގެން ކަރަންޓު ދިންފަހުން، އެއްވެފައިވާ މީހުންގެ އަމަލުތައް ހުރިގޮތުން ކަރަންޓުވަނީ އަލުން ކަނޑާލާފައި. އެހެންކަމުން އަލުން ކަރަންޓު ދިނުމަށް ކުރަންޖެހޭ މަސައްކަތްތައް ދަނީ ކުރަމުން," ފުލުހުން ބުންޏެވެ.
މަސްވެރިންނަށް ދެންޖެހޭ ފައިސާ ދެވޭ ވަރަށް ސަރުކާރުގެ މަސް ކުންފުނި، މިފްކޯގައި މިވަގުތު ފައިސާ ނެތް ކަމަށާއި އެހެންނަމަވެސް މަސައްކަތް ކުރަމުން ދަނީ މަސްވެރިންނަށް ފައިސާ ދެވޭނެ ގޮތެއް ހޯދުމަށް ކަމަށް އެ ކުންފުނިން ބުނެފައިވެ އެވެ.
