ކޮލޯން (ޖޫން 22) - ޔޫރޯ ފުޓްބޯޅަ މުބާރާތުގައި ބެލްޖިއަމް ކުޅުނު ފުރަތަމަ މެޗުގައި އެ ޓީމުގެ ފޯވަޑް ރޮމެލޫ ލުކާކޫ ގިނަ ފުރުސަތުތަކެއް ބޭކާރުކޮށްލިޔަސް، އަދިވެސް އޭނާ އަށް އިތުބާރު އެބައޮތް ކަމަށް ބެލްޖިއަމްގެ ކޯޗު ޑޮމެނިކޯ ޓެޑެސްކޯ ބުނެފި އެވެ.
ގުރޫޕް އީގައި ބެލްޖިއަމް ކުޅުނު ފުރަތަމަ މެޗުގައި ސްލޮވާކިއާ އަތުން 1-0 އިން އެ ޓީމު ވަނީ ބަލިވެފަ އެވެ. މި މެޗުގެ ދެ ވަނަ ހާފުގައި ލުކާކޫ ދެ ފަހަރުު ސްލޮވާކިއާގެ ގޯލަށް ބޯޅަ ވައްދާލި ނަމަވެސް، ދެ ފަހަރުވެސް ވީއޭއާރް އިން ވަނީ އެ ލަނޑުތައް ކެންސަލްކޮށްފަ އެވެ.
އެކަމަކު، އޭގެ ކުރިންވެސް ލުކާކޫ އަށް މެޗުގައި ގިނަ ފުރުސަތުތަކެއް ލިބި، ބޭނުން ނުހިފުނެވެ. މި މެޗަށް ފަހު އެންމެ ބޮޑަށް ފާޑުކިއުން އަމާޒުވި ކުޅުންތެރިޔަކީ ލުކާކޫ އެވެ.
މިރޭ ރުމޭނިއާއާ ދެކޮޅަށް ބެލްޖިއަމް މުހިންމު މެޗަކަށް ނުކުންނައިރު، ބެލްޖިއަމްގެ ކޯޗު ޓެޑެސްކޯ ބުނީ ލުކާކޫ އަށް އިތުބާރު އެބައޮތް ކަމަށެވެ.
"އަހަރަމެން އެންމެން ވެސް ބޭނުންވަނީ ލުކާކޫ އަށް ހަ ޗާންސް ލިބިއްޖެއްޔާ އެ ހުރިހާ ޗާންސަކުން ވެސް ގޯލެއް. އެކަމަކު ލުކާކޫ އަކީ ކޮލިޓީ ކުޅުންތެރިޔަކަށް ވިޔަސް އެއީ ވާނެ ކަމެއް ނޫން،" ޓެޑެސްކޯ ބުންޏެވެ.
"އަހަރެން ޓްރެއިނިންއަށް ފަހު ލުކާކޫއާ ވަކިން ވާހަކަ ދެއްކިން. ލުކާކޫއަކީ ޓީމުގެ އެންމެ މުހިންމު އެއް ކުޅުންތެރިޔާ."
ޓެޑެސްކޯ ބުނީ އަނިޔާގެ ސަބަބުން ފުރަތަމަ މެޗުގައި ނުކުޅެވުނު ތަޖުރިބާކާރު މިޑްފީލްޑަރު އެކްސެލް ވިޓްސެލް މިރޭގެ މެޗުގައި ވެސް ނުފެންނާނެ ކަމަށެވެ.
ޔޫރޯގެ ގަދަ 16 ގެ ޖާގައެއް ހޯދުމަށް މިރޭ ރުމޭނިއާ އަތުން މޮޅެއް ހޯދުން ބެލްޖިއަމް އަށް މުހިންމެވެ. ރުމޭނިއާ ވަނީ މުބާރާތުގެ ފުރަތަމަ މެޗުގައި ޔޫކްރެއިން އަތުން 3-0 އިން މޮޅުވެފަ އެވެ.
ޓެޑެސްކޯ ބުނީ ރުމޭނިއާގެ ގިނަ މެޗުތަކެއް އޭނާ ބަލައި، ދިރާސާކޮށްފައިވާ ކަމަށެވެ. އަދި ބެލްޖިއަމް އިން މިރޭގެ މެޗުގައި ހަމައެކަނި ވިސްނާނީ މޮޅަކަށް ކަމަށެެވެ.
"އަަހަރަމެން ހުރިހާ ޓީމަކަށްވެސް އިހުތިރާމްކުރާނަން. އެކަމަކު އެއްވެސް ޓީމެއް ދެކެ ބިރެއް ނުގަންނާނެ. އަހަރަމެން ބޭނުންވަނީ މި މުބާރާތުގައި ރަނގަޅު ކާމިޔާބެއް ހާސިލްކުރަން. ގުރޫޕް ސްޓޭޖުން ސަލާމަތްވެއްޖެއްޔާ ރަނގަޅު ހިސާބަކަށް ދެވިދާނެ،" ޓެޑެސްކޯ ބުންޏެވެ.
ބެލްޖިއަމް އާއި ރުމޭނިއާ 12 ފަހަރު ބައްދަލުކޮށްފައިވާއިރު، ކޮންމެ ޓީމެއް ވެސް ފަސް މެޗުން މޮޅުވި އެވެ. ދެ މެޗު އެއްވަރުވެފައިވެ އެވެ. އެންމެ ފަހުން މި ދެ ޓީމު ބައްދަލުކުރީ 2012 ވަނަ އަހަރު އެކުވެރިކަމުގެ މެޗެއްގަ އެވެ. އެ ފަހަރު 2-1 އިން މޮޅުވީ ރުމޭނިއާ އެވެ.
މިރޭ މި ދެ ޓީމު ބައްދަލުކުރާ މެޗު ފަށާނީ ރާއްޖެ ގަޑިން 12 ޖަހާއިރު އެވެ.
