މިއުނިކް (ޖޫން 20) - ޔޫރޯ ފުޓްބޯޅަ މުބާރާތުގައި މިރޭ ސާބިއާއާ ދެކޮޅަށް ކުޅޭ މެޗަށް ނުކުންނައިރު ސްލޮވީނިއާ އިން އަމާޒުހިފާފައިވަނީ އެ ގައުމުގެ ފުޓްބޯޅައިގެ ތާރީހުގައި ލިޔެލެވޭނެ ފަދަ ކާމިޔާބަކަށް ކަމަށް އެ ޓީމުގެ ކޯޗު މަޓްޖަޒް ކެކް ބުނެފި އެވެ.
ސްލޮވީނިއާ އިން މީގެ ކުރިން ޔޫރޯގައި ކުޅުނު ހަމައެކަނި ފަހަރަކީ 2000 ވަނަ އަހަރުގެ މުބާރާތުގަ އެވެ. އެ ފަަހަރު ދެ މެޗުން އެއްވަރުވެ، އެއް މެޗުން ވަނީ ބަލިވެފަ އެވެ. ދެ ވަނަ ފަހަރަށް ޔޫރޯގައި ކުޅުމުގެ ފުރުސަތު 24 އަހަރަށް ފަހު ސްލޮވީނިއާ އަށް ލިބުނުއިރު، މި ފަހަރުގެ މުބާރާތުގައި އެ ޓީމުން ކުޅުނު ފުރަތަމަ މެޗުގައި ޑެންމާކާ ވަނީ 1-1 އިން އެއްވަރުވެފަ އެވެ.
މިރޭ ސާބިއާއާ ދެކޮޅަށް ނުކުންނައިރު، ސްލޮވީނިއާގެ އެންމެ ބޮޑު އަމާޒަކީ ޔޫރޯގެ ތާރީހުގައި އެ ޓީމުގެ ފުރަތަމަ މޮޅު ހޯދުމެވެ.
"އަހަރެމެންނަށް ޑެންމާކް މެޗުގެ ދެ ވަނަ ހާފުގައި އެ ފެނުނު ކުޅުން ދައްކައިފިނަމަ، މި ބޭނުންވާ ކަންކަން ހާސިލްކުރެވޭނެ، މޮޅަކަށް އަމާޒުހިފާފައި މި ހުރީ،" ކެކް ބުންޏެވެ.
އޭނާ ބުނީ ސާބިއާ އަކީ ވަރަށް ވަރުގަދަ އަށް ކުޅޭ ޓީމެއް ކަމަށާއި އެހެންކަމުން މިއީ، ސްލޮވީނިއާގެ މުޅި ޓީމު ބޭނުންވާނެ މެޗެއް ކަމަށެވެ.
"ހަަމައެކަނި 11 ކުޅުންތެރިންނެއް ނޫން އެންމެ ފުރިހަމަ އަށް ތައްޔާރުވާންވީ، މުޅި ޓީމު، އަހަރެމެންނަށް ސާބިއާގެ ފުރަތަމަ މެޗުގެ ކުޅުން ފެނިއްޖެ، ފަސޭހަކޮށް، އާދައިގެ ގޮތަކަށް ނުވިސްނައި، ވަރަށް ވަރުގަދަ މެޗަކަށްކަން ގަބޫލުކުރަން ޖެހޭ މި ނުކުންނަނީ،" ކެކް ބުންޏެވެ.
އޭނާ ބުނީ މި ގޮތަށް ވިސްނުން ބަހައްޓައިގެން ތައްޔާރުވި ކަމުގައި ވިޔަސް ތަޖުރިބާއާ ހުރިހާ ކަމަކަށް ބަލާއިރު ސްލޮވީނިއާ އަށް އަދި ހާސިލްނުކުރެވިދާނެ ކަންކަން ވެސް ހުންނާނެކަން ގަބޫލުކުރާ ކަމަށެވެ. އަދި މާ ބޮޑެތި ކަންކަމަށް އުންމީދުކޮށްގެން ބޮޑެތި ޓީމުތައް ވެސް "ފެއިލްވެފައި" ހުރިކަން ދަންނަ ކަމަށާއި މީގެ އޮތީ ދަނޑުމަތީގައި އެއް ވިސްނުމެއްގައި ޓީމު މަސައްކަތްކުރުން ކަމަށެެވެ.
"އަހަރެމެން އެންމެން ވެސް ބޭނުންވަނީ ރަނގަޅު ނަތީޖާ. އަހަރެމެން ސާބިތުކޮށްދޭން ބޭނުންވޭ، މި ފަހަރުގެ ޔޫރޯ އަށް އަހަރެމެން ކޮލިފައިވީ، މި ލެވަލްގައި ކުޅެން ހައްގުވާތީކަން،" ކެކް ބުންޏެވެ.
ބޮޑު މުބާރާތްތަކުގައި ސްލޮވީނިއާ ކުޅުނު 10 މެޗުން އެ ޓީމު މޮޅުވެފައިވާ ހަމައެކަނި މެޗަކީ، 2010 ވަަނަ އަހަރުގެ ފީފާ ވޯލްޑް ކަޕްގައި އަލްޖީރިއާ އަތުން 1-0 އިންނެވެ.
ސާބިއާ އާއި ސްލޮވީނިއާ ވަނީ އަށް ފަހަރު ބައްދަލުކޮށްފަ އެވެ. ހަ މެޗު އެއްވަރުވިއިރު، ކޮންމެ ޓީމެއް ވަނީ އެއް މެޗުން މޮޅުވެފަ އެވެ. މިއަދު މި ދެ ޓީމު ކުޅޭ މެޗު ފަށާނީ 6 ޖަހާއިރު އެވެ.
