ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އެމަނިކުފާނުގެ އާއިލާ ޗުއްޓީ ދަތުރެއްގައި ވެލާ ޕްރައިވެޓް އައިލެންޑް ރިސޯޓަށް ވަޑައިގެންފި އެވެ.
ރައީސްގެ ޗުއްޓީ ދަތުރާ ގުޅޭ ގޮތުން ރައީސުލްޖުމްހޫރިއްޔާގެ އޮފީހުން ކޮމެންޓެއް ނުލިބުނެވެ. ނަމަވެސް ރައީސް ޗުއްޓީއަށް ވެލާ ރިސޯޓަށް ވަޑައިގެންނެވިކަން މި ނޫހަށް ވަނީ ދެ މަސްދަރަކުން ކަށަވަރުވެފަ އެވެ.
މި ނޫހަށް އެނގިފައިވާ ގޮތުގައި ރައީސް ވަޑައިގެންނެވީ ޗުއްޓީއަށް އަނބިކަނބަލުން ސާޖިދާ މުހައްމަދު އާއި އެމަނިކުފާނުގެ ދެ ދަރިކަލުން އަދި ދަރިކަނބަލާއެކު އެވެ.
ވެލާ ރިސޯޓަކީ ދުނިޔޭގެ ފެންވަރުގައި ވެސް ފާހަގަކޮށްލެވޭ ލަގްޒަރީ ރިސޯޓެވެ. ޗެކް ރިޕަބްލިކްގެ ބަޔަކު ހިންގާ އެ ރިސޯޓަކީ ޕްރައިވެޓް އައިލެންޑެއްގެ ގޮތުގައި އިސްތިހާރުކޮށް ކޮޓަރި ވިއްކާ ރިސޯޓެކެވެ.
ވެލާ ރިސޯޓުގައި ނުވަ ބާވަތެއްގެ ކޮޓަރި ވިއްކަ އެވެ. އޭގެ ތެރޭގައި 10 މީހުންނަށް ތިބެވޭ ހަތަރު އެނދުގެ ޕްރައިވެޓް ދެ ރެސިޑެންސް ހިމެނެ އެވެ. އެއީ އެ ރިސޯޓުގެ އެންމެ އަގުބޮޑު ދެ ތަނެވެ.
އޭގެ އިތުރުން، ފަސް މީހުންނަށް ތިބެވޭ ގޮތަށް ހަދާފައި ހުންނަ ބީޗް ޕޫލް ހައުސްއަކާއި އޯޝަން ޕޫލް ހައުސްއަކާއި ތިން މީހުންނަށް ތިބެވޭ ރޮމޭންޓިކް ރެސިޑެންސެއް ވެސް އެ ރިސޯޓުގައި ހުރެ އެވެ.
މިއީ ނޮވެމްބަރު 17، 2023، ގައި ވެރިކަމާ ހަވާލުވެވަޑައިގެންނެފި ފަހުން ރައީސް މުއިއްޒު ނަންގަވާ ތިން ވަނަ ޗުއްޓީ އެވެ. މީގެ ކުރިން މާޗް 21، 2024، އަދި އޭޕްރީލް 30، 2024، ގައި އެމަނިކުފާނު ވަނީ ޗުއްޓީ ދަތުރުތަކެއްގައި ސިންގަޕޫރަށް ވަޑައިގެންފަ އެވެ.
މީގެ ކުރިން ދިވެހިރާއްޖޭގެ ރައީސްއަކު ޗުއްޓީއަކަށް ރިސޯޓަކަށް ވަޑައިގެންނެވިކަން އެނގިފައެއް ނުވެ އެވެ. ނަމަވެސް ބައެއް އެހެން ދަތުރުތަކުގައި ރައީސުން ރިސޯޓުތަކުގައި މަޑުކުރެއްވި އެވެ.
ކުރީގެ ރައީސް އިބްރާހިމް މުހައްމަދު ސޯލިހު އެންމެ ގިނައިން ޗުއްޓީއަށް ވަޑައިގެންނެވީ ސިންގަޕޫރާއި ސްރީ ލަންކާއަށެވެ. ސޯލިހުގެ އާއިލީ ބައެއް ބޭފުޅުން ސިންގަޕޫރުގައި ދިރިއުޅުއްވަ އެވެ. އޭގެ އިތުރުން ޔޫއޭއީއަށް ވެސް އެމަނިކުފާނު ވަޑައިގެންނެވި އެވެ.
ކުރީގެ ރައީސް އަބްދުﷲ ޔާމީންގެ ޗުއްޓީ ދަތުރުތަކާ ބެހޭ މައުލޫމާތު މާ ބޮޑަށް ހާމަ ނުކުރެއްވި ނަމަވެސް އެނގިފައިވާ ގޮތުގައި އެމަނިކުފާނު އެންމެ ގިނައިން ޗުއްޓީ ހޭދަ ކުރެއްވީ ޕްރެޒިޑެންޝަލް ރިޓްރީޓް އާ ރަށުގަ އެވެ. ނަމަވެސް ބައެއް ބޭރު ގައުމުތަކަށް ވެސް ދަތުރު ކުރެއްވި ކަމަށްވެ އެވެ. އޭގެ ތެރޭގައި ސިންގަޕޫރު ހިމެނެ އެވެ.
އޭގެ ކުރިން ހުންނެވި ރައީސް ޑރ. މުހައްމަދު ވަހީދު ހަސަން މަނިކު އެމެރިކާއަށް ކުރެއްވި ދަތުރެއް ނިންމާލެއްވުމަށްފަހު ނިއު ޔޯކުގައި ޗުއްޓީ ހޭދަ ކުރެއްވި އެވެ. އަދި މެލޭޝިޔާއަށް ވެސް ޗުއްޓީ ދަތުރެއްގައި ވަޑައިގެންނެވި އެވެ.
ރައީސް ވަހީދުގެ ކުރިން ވެރިކަން ކުރެއްވި ރައީސް މުހައްމަދު ނަޝީދު ޗުއްޓީ ނެންގެވީ ވަރަށް މަދުންނެވެ. ޗުއްޓީ ދަތުރެއްގައި އެމަނިކުފާނު ވައިކަރަމުރައިދޫއަށް ވަޑައިގަތެވެ. އެއީ އެމަނިކުފާނުގެ އެއިރުގެ އަނބިކަނބަލުންގެ ބައްޕަގެ ރަށެކެވެ. ޗުއްޓީ ދަތުރެއްގައި ބޭރު ގައުމަކަށް ނަޝީދު ވަޑައިގެންނެވިކަމެއް ނޭނގެ އެވެ.
