ފްރޭންކްފާޓް (ޖޫން 17) - ޔޫރޯ ފުޓްބޯޅަ މުބާރާތުގައި މިރޭ ވަރުގަދަ ބެލްޖިއަމް އިން މި ފަހަރުގެ މުބާރާތުގައި ކުޅުނު ފުރަތަމަ މެޗުން 1-0 އިން ސްލޮވާކިއާ އަތުން ބަލިވެއްޖެ އެވެ.
މިއީ ސްލޮވާކިއާ އިން ބެލްޖިއަމް ބަލިކުރި ފުރަތަމަ ފަހަރެވެ. ބެލްޖިއަމުން ޔޫރޯ އަށް ކޮލިފައިވީ ސައްތަ އިން ސައްތަ ރެކޯޑަކާ އެކު އެވެ. އެކަމަކު، މި ވަނީ 2016 ވަނަ އަހަރުގެ ޔޫރޯ އެކޭ އެއްގޮތަށް ފުރަތަމަ މެޗުން ބަލިވެފަ އެވެ. އެ ފަހަރު ބެލްޖިއަމް ބަލިވީ އިޓަލީ އަތުން 2-0 އިންނެވެ.
މީގެ ކުރިން ބެލްޖިއަމް އާއި ސްލޮވާކިއާ އެކުވެރިކަމުގެ ތިން މެޗު ކުޅެފައިވާއިރު، ދެ މެޗު އެއްވަރުވެ، އެއް މެޗުން ބެލްޖިއަމް ވަނީ މޮޅުވެފަ އެވެ. ބައިނަލްއަގުވާމީ މުބާރާތެއްގައި މި ދެ ޓީމުން ކުޅުނު ހަމައެކަނި މެޗުގައި ކާމިޔާބު މި ހޯދީ ސްލޮވާކިއާ އިންނެވެ.
ފްރޭންކްފާޓް އެރީނާގައި މިރޭ ކުޅުނު މެޗު ފަށައިގެން ބެލްޖިއަމްގެ ފޯވާޑް ރޮމެލޫ ލުކާކޫ އަށް ވަނީ ރަނގަޅު ފުރުސަތުތަކެއް ލިބިފަ އެވެ. އެކަމަކު އޭގެ ބޭނުމެއްނުހިފުނުއިރު، ބެލްޖިއަމަަށް ލިބުނު ދެރަ ބޮޑެވެ. ސްލޮވާކިއާ އިން ވަނީ މެޗުގެ ހަތް ވަނަ މިނިޓްގައި ލަނޑެއް ޖަހައި ލީޑުނަގައިފަ އެވެ.
ލަނޑު ޖެހުމަށް ފަހު ސްލޮވާކިއާ ކުޅުންތެރިން އުފާފާޅުކުރަނީ.
މިއީ ބެލްޖިއަމްގެ ވިންގް، ޖެރެމީ ޑޮކޫ އަތުން ގެއްލުނު ބޯޅައެއް ހޯދައި ސްލޮވާކިއާ އިން ޖެހި ލަނޑެކެވެ. އެ ގޮތުން، ސްލޮވާކިއާގެ ޖޫރަޖް ކުޗްކާ ޖެހި ޝޮޓް ބެލްޖިއަމްގެ ކީޕަރު، ކޮއެން ކަސްޓީލްސް މަތަކުރުމުން، ރީބައުންސް ބޯޅަ، އިވާން ޝްރަންޒް ވަނީ ގޯލަށް ވައްދާލައިފަ އެވެ.
ބެލްޖިއަމް އިން އެޓޭކަށް ޖެހިގެން ގޯލެއް ޖެހޭތޯ މަސައްކަތް ކުރަމުންދިޔައިރު، ކައުންޓަ އެޓޭކުގައި ސްލޮވާކިއާ އިން ދިޔައީ ފުރުސަތު ތަނަވަސްކުރަމުންނެވެ.
އެ ގޮތުން، މެޗުގެ 43 ވަނަ މިނިޓްގައި އޭރިއާތެރެއިން ވޮލީ އަކުން ލޫކަސް ހަރާސްލިން ޖެހި ބޯޅަ ހުށިޔާރުކަމާ އެކު، ކީޕަރު ކަސްޓީލްސް މަތަކުރިއެވެ.
ދެ ވަނަ ހާފު ފަށައިގެން 11 މިނިޓް ތެރޭ، ލުކާކޫ ލަނޑެއް ޖަހައި އެއްވަރުކޮށްދިނެވެ. މިއީ އަމަދޫ އޮނާނާ ދިން ބޯޅައަކުން ގޯލު ކުރިމަތީގައި ހުސްކޮށް ހުރެފައި ލުކާކޫ ޖެހި ގޯލެކެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ އޮފްސައިޑެއް ކަމަށެވެ. އޭގެ ފަހުން، އޭރިއާތެރެއިން ލިބުނު ފުރުސަތުގައި ލުކާކޫ ޖެހި ބޯޅަ އަމާޒުވީ އަރިމަތީ ދާގަނޑަށެެވެ.
ބެލްޖިއަމްގެ ލުކާކޫ (ކ) އެޓޭކެއްގައި ބޯޅަ ފޮނުވާލަން މަސައްކަތްކުރަނީ.
މެޗުގެ 64 ވަަނަ މިނިޓްގައި، ސްލޮވާކިއާ ކީޕަރު މާޓިން ޑުބްރާވްކާ އަތުން ދޫވި ބޯޅައެއް ހޯދައި ބެލްޖިއަމްގެ ޔޯހަން ބަކަޔޯކޯ ޖެހި ބޯޅަ ގޯލު ރޮނގުމަތިން ސަލާމަތްކުރީ ސްލޮވާކިއާގެ ޑިފެންޑަރު، ޑޭވިޑް ހަންކޯ ވަނީ ބްލޮކްކޮށްފަ އެވެ.
ބެލްޖިއަމުން އެއްވަރުކުރަން މެޗުގެ 86 ވަނަ މިނިޓްގައި ލުކާކޫ އަނެއްކާ ވެސް ގޯލެއް ޖެހި އެވެ. މިއީ ބަދަލަކަށް ނުކުތް، ލޮއިސް އޮޕެންޑާ ދިން ބޯޅައަކުން ޖެހި ލަނޑެކެވެ. އެކަމަކު، ވީއޭއާރް އިން ބެލިއިރު، އެ ބޯޅަ ހިފައިގެން ދިޔައިރު، އޮޕެންޑާ އަތުގައި ބޯޅަ ޖެހުމުން ރެފްރީ ނިންމީ ގޯލެއް ނޫން ކަމަށެވެ. ރެފްރީ މި ނިންމުން ނިންމީ، ވީއޭއާރް އިން އަންގައިގެން ދަނޑުގައި ބަހައްޓާފައި ހުރި މޮނީޓަރުން ވެސް ބަލައިފަ އެވެ.
އޭގެ ފަހުން ވެސް ބެލްޖިއަމް އިން ކުރިއަށް ޖެހިގެން އެޓޭކްކޮށް ލަނޑެއް ޖެހޭތޯ ބެލި ނަމަވެސް ކާމިޔާބެއްނުވި އެވެ. އަނެއްކޮޅުން ކައުންޓަ އެޓޭކުގައި ސްލޮވާކިއާ އިން ވެސް ދިޔައީ ގޯލެއް ޖެހޭތޯ މަސައްކަތް ކުރަމުންނެވެ. އެހެން ނަމަވެސް ނަތީޖާ އަށް އިތުރު ބަދަލެއް ނާދެ އެވެ.
ސްލޮވާކިއާ އިން މި ވަނީ ޕޮއިންޓަކުން ފުއްދާލަން ނިންމައިގެން ނުކުތް މެޗުން ބޮޑު މޮޅެއް ހޯދައިފަ އެވެ.
އެންމެ ފަހުން 2022 ވަނަ އަހަރު ބޭއްވި ފީފާ ވޯލްޑް ކަޕްގެ ގްރޫޕް ސްޓޭޖުން ބެލްޖިއަމް ކެޓި ފަހުން އެ ޓީމުން ކުޅުނު ރަސްމީ 14 މެޗުން ވެސް ބަލިނުވެ އެވެ. އެކަމަކު، އެނބުރި ރަސްމީ މުބާރާތެއްގައި، ބެލްޖިއަމް ކުޅުނު ފުރަތަމަ މެޗުން މި ވަނީ، ފީފާ ރޭންކިންގައި އެ ޓީމަށް ވުރެ 45 ދަރަޖަ ފަހަތުގައި އޮތް ސްލޮވާކިއާގެ އަތްދަށުވެފަ އެވެ.
