ފްރޭންކްފަޓް (ޖޫން 17) - ޔޫރޯ ފުޓްބޯޅަ މުބާރާުތުގެ ގުރޫޕް އީގައި މިރޭ ބެލްޖިއަމްއާ ދެކޮޅަށް ސްލޮވާކިއާ ނުކުންނައިރު، މެޗުން ޕޮއިންޓެއް ލިބުނަސް ހިތްހަމަޖެހޭނެ ކަމަށް ސްލޮވާކިއާގެ ކޯޗު ފްރަންޗެސްކޯ ކަލްޒޯނާ ބުނެފި އެވެ.
ގުރޫޕް އީގެ ބެލްޖިއަމް އާއި ސްލޮވާކިއާއާ އެކު ދެން އޮތީ ރޫމޭނިއާ އަދި ޔޫކްރެއިން އެވެ.
މިރޭގެ މެޗުގެ ކުރިން މީޑިއާއާ ވާހަކަދައްކަމުން ކަލްޒޯނާ ބުނީ ބެލްޖިއަމްއަކީ މި މެޗުގެ ފޭވަރިޓުން ކަމަށާއި މެޗުން ސްލޮވާކިއާއަށް ޕޮއިންޓެއް ލިބުނަސް ހިތްހަމަޖެހޭނެ ކަމަށެވެ.
"އަހަރެން އުންމީދުކުރަނީ ޓީމުން ރަނގަޅު ކުޅުމެއް ދައްކާނެ ކަމަށް. އަހަރެން ބޭނުންވާ ގޮތަކީ ބަލިނުވުން،" މިދިޔަ ސީޒަންގެ ފަހުކޮޅު ނަޕޯލީގެ ވަގުތީ ކޯޗުކަންވެސް ކުރި ކަލްޒޯނާ ބުންޏެވެ.
"ބެލްޖިއަމް އަކީ ޓްރާންސިޝަންގައި އަދި ކައުންޓާ އެޓޭކްގައި ވަރަށް މޮޅު ޓީމެއް. އެކަމަކު އަހަރަމެންވެސް ކުޅޭ ވަކި ގޮތެއް އޮންނާނެ."
ކަލްޒާނޯ ވަނީ މިދިޔަ ސީޒަނުގެ ފަހު ބައިގައި ނަޕޯލީގެ ކޯޗުކަން ވެސް ކޮށްދީފަ އެވެ. އެއީ، ސްލޮވާކިއާ ފުޓްބޯޅަ ފެޑެރޭޝަނުގެ ރުހުމާ އެކު އެވެ.
ބެލްޖިއަމްގެ ފޯވާޑް ލައިންގައި ސްލޮވާކިއާ އިން އެންމެ ސަމާލުވާންޖެހޭ އެއް ކުޅުންތެރިޔަކީ ފޯވަޑް ރޮމެލޫ ލުކަކޫ އެވެ. އެކަމަކު، ލުކާކޫ އަކީ ސްލޮވާކިއާގެ ކެޕްޓަން މިލާން ސްކްރީނިއާ އަށް އާ ކުޅުންތެރިއެއް ނޫނެވެ.
އިންޓަ މިލާންގައި ލުކާކޫއާ އެކު ސްކްރީނިއާ ތިން ސީޒަން ހޭދަކުރިއެވެ. އެހެންކަމުން، ލުކާކޫ އަށް ސްކްރީނިއާ ވަރަށް ބޮޑަށް ސަމާލުވާނެ އެެވެ.
"އަހަރަމެން އެންމެންނަށްވެސް އެނގޭ ލުކާކޫގެ ކޮލިޓީ. އަހަރެން ކޮންމެހެން ބުނަންޖެހޭ ވާހަކަތަކެއް ނޫން އެއީ،" ސްްކްރީނިއާ ބުންޏެވެ.
މިއީ ސްލޮވާކިއާ ޔޫރޯގައި ވާދަކުރާ ތިން ވަނަ ފަހަރެވެ. މިހާތަނަށް ޔޫރޯގައި އެ ޓީމަށް ލިބުނު އެންމެ ބޮޑު ކާމިޔާބަކީ 2016ގެ ޔޫރޯގެ ގަދަ 16ގެ ބުރަށް ދިއުމެވެ.
ބެލްޖިއަމް އާއި ސްލޮވާކިއާ މީގެ ކުރިން ބޮޑު މުބާރާތެއްގައި ވާދަކޮށްފައެއް ނުވެ އެވެ. މި ދެ ޓީމުން އެކުވެރިކަމުގެ މެޗުތަކުގައި ތިން ފަހަރު ބައްދަލުކޮށްފައިވެ އެވެ. އެއް މެޗުން ބެލްޖިއަމް މޮޅުވިއިރު، އަނެއް ދެ މެޗު ނިމުނީ އެއްވަރުވެގެންނެވެ.
ބެލްޖިއަމް އާއި ސްލޮވާކިއާ ކުޅޭ މެޗު ފަށާނީ މިރޭ 9 ޖަހާއިރު އެވެ.
