ޝާލްކާ، ޖަރުމަނު (ޖޫން 17) - ފުރަތަމަ ހާފުގައި ޖޫޑް ބެލިންހަމް ޖެހި ލަނޑުން އިންގްލެންޑުން 1-0 އިން ސާބިއާ ބަލިކޮށް، މޮޅަކުން މި ފަހަރުގެ ޔޫރޯ ފުޓްބޯޅަ މުބާރާތް ފަށައިފި އެވެ.
މެޗު ފަށައިގެން އިންގްލެންޑުން ބޯޅަ ކޮންޓްރޯލްކޮށް ސާބިއާގެ ހާފަށް ބާރުބޮޑުކުރިއިރު, މި މެޗުގެ 13 ވަނަ މިނެޓުގައި އިންގްލުންޑުން ވަނީ ގޯލު ޖަހާ ލީޑު ނަގައިފަ އެވެ. މިއީ، ބުކާޔޯ ސަކާ ނަގައިދިން ހުރަހެއް, ޖޫޑް ބެލިންގްހަމް ބޮލުން ޖަހައި ގޯލުގެ މަތީ ކަނަށް ބޯޅަ ވައްދާލައިގެން ކާމިޔާބުކުރި ގޯލެކެވެ.
އޭގެ ފަހުން، މެޗުގެ 25 ވަނަ މިނެޓުގައި އިންގްލެންޑް އަށް ވަނީ ލަނޑު ޖަހަން ރަނގަޅު ފުރުސަތެއް ލިބި ބޭކާރުވެފަ އެވެ. ކައިލް ވޯކާ މުޅިން ހުހަށްހުރެ އޭރިއާ ތެރެއަށް ވަދެ ނަގާދިން ހުރަސް އިންގްލެންޑް ކުޅުންތެރިއަކަށް ނުލިބި ދިޔައީ ބޭރަށެވެ.
ޓްރެންޓް އަލެކްސަންޑަ އާނޯލްޑް މެދުތެެރެއަށް ލައިގެން އިންގްލެންޑުން ކުޅުނުއިރު، ފުރަތަމަ ހާފުގައި އޭނާ އަތުން ގެއްލުނު ބޯޅައެއް ހޯދައި ސާބިއާގެ ކެޕްޓަން، އަލެކްސަންޑަ މިޓްރޮވިޗް ޖެހި ޝޮޓް ދިޔައީ ދަނޑިކައިރިން ބޭރުންނެވެ.
އިންގްލެންޑްގެ އާނޯލްޑް (ކ) ސާބިއާގެ ގުޑެލް ކައިރިން ބޯޅަ ހިފައިގެންދާން މަސައްކަތްކުރަނީ
ދެ ވަނަ ހާފު ފަށައިގެން ސާބިއާ އިން އެ ޓީމުގެ ކުޅުން ރަނގަޅުކުރިއިރު, މި ހާފު ފަށައިގެން ފުރަތަމަ 10 މިނެޓު ތެރޭގައި އިންގްލެންޑަށް ރަނގަޅު އެޓޭކެއް އުފެއްދޭ ގޮތް ނުވި އެވެ. އަދި މި ހާފުގެ ކުރީކޮޅު ދެ ޓީމުގެ ފަރާތުން ގިނަ ފައުލުތަކެއް ފެނިގެންދިޔަ އެވެ.
މި ހާފުގައި އިންގްލަންޑުން އުފެއްދި އެންމެ ނުރައްކާތެރި ހަމަލާ މެޗުގެ 76 ވަނަ މިނެޓުގައި އުފެއްދިއިރު, ކޭން މުޅިން ހުހަށް ހުރެ ބޮލުން ފޮނުވާލި ހަމަލާގެ ހުރަހަކަށްވީ ސާބިއާގެ ކީޕަރު ޕްރީޑޮވިޗް ރަޖްކޯވިޗް އަތުގައި ޖެހިފައި ބޭރުވީ ދަނޑީގައި ވެސް ޖެހިފަ އެވެ.
އޭގެ ފަހުން، މެޗުގެ 82 ވަނަ މިނެޓުގައި ސާބިއާގެ ޑޫސާން ވްލާހޮވިޗް އޭރިއާ ބޭރުން ފޮނުވާލި ބާރު ހަމަލާގެ ހުރަހަކަށްވީ ޖޯޑަން ޕިކްފޯޑް އެވެ.
މި މެޗުގެ ދެ ވަނަ ހާފުގައި ސާބިއާގެ މިޓްރޮވިޗަށް އިންގްލެންޑްގެ ކިއެރަން ޓްރިޕިއޭ ފައުލެއް ކުރި ކަމަށް ބުނެ، އެ ޓީމުން ކުރި އެޕީލް ކާމިޔާބެއްނުވި އެވެ.
