ބްރިޖު ކައިރި ކަނޑުން މަރުވެގެން އޮޔާ ދަނިކޮށް ފެނުނު އަންހެން މީހާ އެންމެ ފަހުން އުޅުނީ ލޯބިވެރިޔާއާއެކު ކަމާއި ސިނަމާލެ ބްރިޖުން އެކަނި ދިޔަކަން ސީސީޓީވީ ފުޓޭޖުން ފެންނަ ކަމަށް ފުލުހުން ބުނެފި އެވެ.
ފުލުހުން ބޭއްވި ނޫސްވެރިންގެ ބައްދަލުވުމުގައި ސީރިއަސް އެންޑް އޯގަނައިޒްޑް ކްރައިމްގެ އިންސްޕެކްޓާ މުހައްމަދު ސާމިހު ވިދާޅުވީ އެ އަންހެން މީހާއާއި އޭނާ ލޯބީގެ ގޮތުން ގުޅިގެން އުޅޭ މީހާގެ އިތުރުން އެހެން ފިރިހެނަކާއެކު މެއި 25، ވަނަ ދުވަހު (އޭނާގެ ހަށިގަނޑު އޮޔާ ދަނިކޮށް ފެނުނު ދުވަހު) މާލޭގެ މަގުތަކުގައި އުޅެފައިވާކަން ސީސީޓީވީ ފުޓޭޖުތަކުގެ އެހީގައި ދެނެގަނެވިފައިވާ ކަމަށެވެ.
މަރުވި މީހާ ލޯބިވެރިޔާއާއެކު އުޅުމަށްފަހު ސިނަމާލެ ބްރިޖަށް އަރައިގެން އެދުވަހުގެ 11:27 ހާއިރު ހިނގާފައި ދިޔައީ އެކަނިކަން ސީސީޓީވީ ފުޓޭޖުން އެނގޭ ކަމަށާއި، އެއަށްފަހު އޭނާ ދިރިހުއްޓާ ފެނިފައި ނުވާ ކަމަށް ސާމިހު ވިދާޅުވި އެވެ.
ސާމިހު ވިދާޅުވީ ފުލުހުން ކުރި މަސައްކަތުން މަރުވި މީހާއަކީ ނޭޕާލްއަށް ނިސްބަތްވާ 25 އަހަރުގެ އަންހެނެއްކަން އެނގިފައިވާ ކަމަށާއި އަދި އޭނާ އަކީ މެއި، 1 އިން ފެށިގެން ރާއްޖެ އައިސް ގެސްޓްހައުސްއެއްގައި މަސައްކަތް ކުރަމުންދިޔަ މީހެއްކަން ވެސް އެނގިފައިވާ ކަމަށެވެ.
"ނިޔާވި އަންހެން މީހާ އުޅުނީ އޭނާ ލޯބީގެ ގޮތުން ގުޅިގެން އުޅޭ ފިރިހެން މީހާއެކު ގެސްޓްހައުސްއެއްގައިކަން ތަހުގީގުގައި ވަނީ ފާހަގަކުރެވިފައި. މި މަރަކީ އިތުރު ފަރާތެއްގެ ސީދާ ބައިވެރިވުމެއް އޮވެގެން ހިނގާފައިވާ މަރެއް ކަމަށް ނުބެލެވޭ،" ސާމިހު ވިދާޅުވި އެވެ.
ބްރިޖު ކައިރިން މި އަންހެން މީހާ އޮޔާދާ ކަމުގެ މައުލޫމާތު ފުލުހުންނަށް ލިބިފައި ވަނީ މެއި 25، ވަނަ ދުވަހު އެވެ. އަދި ފުލުހުން އެމީހާ އައިޖީއެމްއެޗް ހޮސްޕިޓަލަށް ގެންދިޔައިރު ވެސް ވަނީ މަރުވެފައި ކަމަށް ޑޮކްޓަރުން ވަނީ ބުނެފަ އެވެ.
އެ މައްސަލަ އަދިވެސް އިތުރަށް ތަހުގީގު ކުރަމުންދާ ކަމަށް ފުލުހުން ވަނީ ބުނެފަ އެވެ.
