މީހުން ރަހީނުކުރުމަށް ފަހު ބަރަހަނާކޮށް އޮރިޔާން ކާޑު އުފައްދައިގެން، ބިރު ދައްކައި ފައިސާ ފޭރޭ ކަމަށް ތުހުމަތުކޮށް ދެމަފިރިއަކު ބަންދުކޮށްފި އެވެ.
މި ދެ މީހުން ހައްޔަރުކުރީ މެއި 26, ގަ އެވެ. އޭރު ފިރިމީހާގެ ބަންދަށް 15 ދުވަސް އަދި އަނބިމީހާގެ ބަންދަށް 10 ދުވަސް ޖެހި އެވެ.
އަންހެން މީހާގެ ބަންދުގެ މުއްދަތު ހަމަވުމުން ކްރިމިނަލް ކޯޓުން އިއްޔެ އިތުރު 15 ދުވަސް ޖެހި އެވެ.
ދެ މީހުންގެ މައްޗަށް ކުރާ ތުހުމަތުތަކަކީ ބިރު ދެއްކުން، ހުއްދަ ނޫން ގޮތެއްގައި މީހަކު ހިފެހެއްޓުން، އޮރިޔާން ކާޑު އުފެއްދުން، އަދި ފޭރުމެވެ.
އެ ކޯޓު އަމުރުން އެނގުނު ގޮތުގައި އެއީ މާލޭގެ ހެންވޭރުގައި ހުންނަ ގެއެއްގައި ދިރިއުޅޭ އަންހެނެކެވެ. އަދި އެއީ އުމުރުން 39 އަހަރުގެ އަންހެނެކެވެ. ފިރިހެން މީހާއަކީ 40 އަހަރުގެ މީހެކެވެ.
އޭނާގެ ފިރިމީހާ ވެސް ހައްޔަރުކޮށްފައިވާ ކަން، ބަންދު ކުރަން ކުރިއަށް ދިޔަ މަޖިލީހުގެ އަޑުއެހުމުގައި ފުލުހުން ބުނި ކަން ކޯޓު އަމުރުގައި ފާހަގަކޮށްފައިވެ އެވެ. ފިރިމީހާގެ ބަންދު އަމުރެއް އަދި ނެތެވެ.
ކޯޓު އަމުރުގައިވާ ގޮތުން ފުލުހުން ތުހުމަތު ކުރަނީ މި ކުށުގެ އަމަލުގައި ދެމަފިރިންނާއެކު އިތުރު ބަޔަކު ވެސް ބައިވެރިވެ އެވެ. އެއީ ޖަމާއަތެއް ހަދައިގެން ހިންގާ ކުށެއް ކަމަށް ކަމަށް ފުލުހުން ތުހުމަތުކޮށްފައިވެ އެވެ.
މި ފަހަކަށް އައިސް، މީހުންނަށް އޮޅުވާލައިގެން އެޕާޓްމަންޓަކަށް ގެންގޮސް މިފަދަ ގޮތަކަށް ބިރު ދައްކައިގެން ފޭރޭ މައްސަލަތައް ވަރަށް ގިނައިން ފެންމަތިވެފައިވެ އެވެ.
މިދިޔަ ހޯމަ ދުވަހު ހިޔާ ފްލެޓް ސަރަހައްދުގެ އެޕާޓްމަންޓަކަށް ކުއްޔަށް ދޫކުރާ ތަނެއް ކަމަށް ބުނެ މީހުން ގެންގޮސް ފޭރެން އުޅެނިކޮށް ބަޔަކު އެ ގްރޫޕް ހޯދައި ފުލުހުންނާ ހަވާލުކޮށްފައިވެ އެވެ.
އޭގެ ކުރިން މިދިޔަ ހުކުރު ދުވަހު ވެސް ހިޔާގެ އެޕާޓްމަންޓެއްގައި އުޅޭ އަންހެނަކާއި ފިރިހެނެއް ބަންދުކޮށްފައިވެ އެވެ. އެ މީހުނަށް ވެސް ތުހުމަތުކުރަނީ މީހުން ރަހީނުކޮށް ބިރު ދައްކައިގެން ފޭރެން އުޅުނު ކަމަށެވެ.
މިދިޔަ މަހު ފަހުކޮޅު ފުލުހުން ބުނެފައިވަނީ އެކި ވާހަކަ ދައްކައި ހައްދާލައިގެން ހުޅުމާލޭ ދެވަނަ ފިޔަވަހީގެ ޓަވަރެއްގެ އެޕާޓްމަންޓުތަކަށް މީހުން ގެންގޮސް ފޭރޭ މައްސަލަ ފުލުހުންނަށް ރިޕޯޓުކޮށްފައިވާ ކަމަށެވެ. މި ކަން ވަރަށް އާންމު ކަމަށާއި، ގިނަ މައްސަލަތަކެއް ފުލުހަށް ރިޕޯޓުކުރާތާ މަސްތަކެއް ވެއްޖެ ކަމަށް ހިޔާ ފްލެޓް ސަރަހައްދުގައި އުޅޭ ބައެއް މީހުން ކިޔައިދީފައިވެ އެވެ.
