އެންވަރަމަންޓު މިނިސްޓަރީ އާއި ޔުނިސެފް ގުޅިގެން ކުނިއެޅުމާއި ކުނި މެނޭޖުކުރުމަށް އަހުލުވެރި ކުރުމުގެ ގޮތުން "ކްލީން" ގެ ނަމުގައި ހާއްސަ ޕްރޮގުރާމެއް ލޯންޗުކޮށްފި އެވެ.
މިއަދު ހެނދުނު ހުޅުމާލޭގައި އޮތް އެ ރަސްމިއްޔާތު ޝަރަފުވެރިކޮށްދެއްވީ މާލެ ސިޓީގެ މޭޔަރު، އާދަމް އާޒިމް އެވެ.
ތިމާވެށީގެ ދުވަހާ ގުޅުވައިގެން ލޯންޗު ކުރި އެ ޕްރޮގުރާމުގެ މަގުސަދަކީ ސާފު ވެށްޓެއް ގާއިމު ކުރުމުގެ ވިސްނުން ކުޑަކުދިންގެ އަށަގެންނެވުމުގެ އިތުރުން ކުނި މެނޭޖުކުރުމުގެ މަސައްކަތުގައި އެކުދީން ވެސް ބައިވެރި ކުރުން ކަމަށް އެންވަރަމަންޓު މިނިސްޓްރީން ބުންޏެވެ.
ތިމާވެށީގެ ދުވަސް ފާހަގަކުރުމުގެ ގޮތުން އެ މިނިސްޓަރީން މިއަދު ވަނީ ކުރިއަށް އޮތް ފަސް އަހަރު ދުވަހު ކުނި މެނޭޖު ކުރުމުގެ ގައުމީ ޕޮލިސީ ވެސް އިފުތިތާހުކޮށްފަ އެވެ. "މަގޭ ސާފު ރާއްޖެ" ނަމުގައި އިފުތިތާހު ކުރި އެ ސްޓްރެޓެޖީ ޕްލޭންގެ ލޯގޯ ވެސް އެ ޕޮލިސީއާ އެކު ލޯންޗު ކުރި އެވެ.
ތިމާވެށި ހިމާޔަތް ކުރުމުގެ ގޮތުން ގިނަ މަސައްކަތްތަކެއް ކުރުމަށް މި ސަރުކާރުން ނިންމާފައިވެ އެވެ. އެގޮތުން މި ފަސް އަހަރު ތެރޭގައި ފަސް މިލިއަން ގަސް އިންދުމަށް ރައީސް ޑރ. މުހައްމަދު މުއިއްޒު ވައުދު ވެވަޑައިގެންނެވި ދަށުން މިއަދު ވަނީ ގަސް އިންދުމުގެ މަޝްރޫއު ވެސް މުޅި މާލޭގައި ފަށައިފަ އެވެ.
ދުނިޔޭގެ ތިމާވެށީގެ ދުވަހުގެ ގޮތުގައި ފާހަގަ ކުރަނީ ކޮންމެ އަހަރެއްގެ ވެސް ޖޫން 5، އެކެވެ. އެ ދުވަސް ތިމާވެށީގެ ދުވަހުގެ ގޮތުގައި ފާހަގަ ކުރަން ފެށީ 1973 ވަނަ އަހަރުން ފެށިގެންނެވެ.
