ދިވެހި ފުލުހުންގެ ހިދުމަތުގެ ކުރިއަށް އޮތް ފަސް އަހަރު ދުވަހުގެ ސްޓްރެޓެޖިކް ޕްލޭން މިއަދު ރަސްމީކޮށް އިފުތިތާކޮށްފި އެވެ.
އިސްކަންދަރު އިމާރާތުގައި މިއަދު ކުރިއަށް ގެންދިޔަ ރަސްމިޔާތު އިފުތިތާހުކޮށްދެއްވީ ހޯމް މިނިސްޓަރު އަލީ އިހުސާން އެވެ.
މިއަދު އިފުތިތާހު ކުރި ސްޓްރެޓެޖިކް ޕްލޭންގައި ކުރިއަށް އޮތް ފަސްއަހަރު އިސްކަންދޭނެ މުހިންމު ފަސް ކަމެއް ފާހަގަކޮށްފައިވެ އެވެ.
އެގޮތުން ރާއްޖެއަކީ ރައްކާތެރި ގައުމަކަށް ހަދަން ފުލުހުންގެ މަރުކަޒީ އަދި ސަރަހައްދީ ގާބިލުކަން ހަރުދަނާކޮށް މަސްތުވާތަކެތީގެ ވަބާއާ ދެކޮޅަށް ހަރަކާތްތެރިވެ ގޭންގު މާރާމާރީތައް ހުއްޓުވުން ޕްލޭންގައި ހިމަނައިފައިވެ އެވެ.
ގަވާއިދާ ހިލާފަށް އުޅޭ ބިދޭސީން ހޯދައި އިންސާނީ ވަގުފާރި ހުއްޓުވުމުގެ އިތުރުން ވައްކަމާއި ފޭރުމާއި މަކަރާއި ހީލަތް ހެދުން އަދި ޓްރެފިކް ގަވާއިދާ ހިލާފުވުން ހުއްޓުވުމަށް ހާއްސަ އިސްކަމެއް ދިނުމަށް އެ ޕްލޭންގައި ހިމަނާފައިވެ އެވެ.
ސައިބާ ކްރައިމްއާއި ޓެރަރިޒަމް އާއި ވައިލެންޓް އެކްސްޓްރީމިޒަމްގެ އިތުރުން ގެވެށި އަނިޔާއާއި އަންހެނުންނާއި ކުޑަކުދިންނަށް ކުރާ އަނިޔާ ހުއްޓުވުމާއި ޕަބްލިކް ޑިސްއޯޑާ ހިމެނޭހެން ކުށާއި ކުށުގެ ބިރުވެރިކަން ނައްތާލުމަށް މަސައްކަތް ކުރުމަށް ޕްލޭންގައި ހިމަނައިފައިވެ އެވެ.
އެ ޕްލޭންގައި ދެން ހިމަނައިފައި ވަނީ ފުލުހުންނާއި މުޖުތަމައުއާ އޮންނަ ގުޅުން ވަރުގަދަކޮށް ރައްޔިތުންގެ ސަލާމަތާއި ރައްކާތެރިކަން ގާއިމުކުރުމަށް ކޮމިއުނިޓީ ޕޮލިސިން މޮޑެލެއް ތައާރަފުކޮށް އޭގެތެރެއިން ފުލުހުންގެ ހިދުމަތް ތަރުތީބުކޮށް މަސައްކަތް ކުރުމަށެވެ.
އޭގެ އިތުރުން ފުލުހުންގެ ހިދުމަތުން ރައްޔިތުންނަށް ދޭ ހިދުމަތުގެ ފެންވަރު އިތުރަށް ފުޅާކޮށް ތަރައްގީކުރުމަށް ބޭނުންވާ ވަސީލަތްތައް ޒަމާނީ ފެންވަރަށް ތަރައްގީ ކުރުމަށް މަގުފަހި ކޮށްދޭނެ ދިގުރާސްތާ ޕްލޭނެއް އެކުލަވައިލައި ތަންފީޒު ކުރުމާއި ހުރިހާ ޑިޕާޓުމެންޓެއް ގުޅިގެން ފުލުހުންގެ ތެރޭގައި ހުރި ގޮންޖެހުންތަކަށް ހައްލެއް ހޯދަން މަސައްކަތް ކުރެވޭނެ ސަގާފަތެއް އުފެއްދުން ވެސް އެ ޕްލޭންގައި ހިމަނައިފައިވެ އެވެ.
ކުރިއަށް އޮތް ފަސް އަހަރުގެ ޕްލޭންގައި ދެން ހިމެނެނީ ފުލުހުން ފޯރުކޮށްދޭ ހިދުމަތުގެ ފެންވަރު ރަނގަޅު ކުރުމުގެ ބޭނުމުގައި ފުލުހުންގެ ތެރޭގައި ގާއިމު ކޮށްފައިވާ ޑިޕާޓުމެންޓުތަކާއި ސިސްޓަމްތަކާއި ޕްރެސްތަކާއި ގަވާއިދުތަކުގެ އިތުރުން ޕޮލިސީ އަދި ޕްރޮސީޖަރުތައް ރިވިއުކޮށް ރަނގަޅު ކުރަން އިސްކަން ދިނުމާއި ކޯ ޕޮލިސިން ފަންކްޝަންތައް ހަރުދަނާ ކުރުމެވެ.
އެންމެފަހު ކަމަކަށް ޕްލޭންގައި ހިމަނައިފައި ވަނީ ފުލުހުންނަށް ރައްޔިތުން ކުރާ އިތުބާރު ދެމެހެއްޓުމަށް ފުލުހުންގެ ހިދުމަތަކީ ދެފުށް ފެންނަ ޕްރޮފެޝަނަލް ހިދުމަތަކަށް ހަދައި ފުލުހުންގެ މުއައްސަސާގެ ތެރޭގައި ނަޒާހަތްތެރިކަމުގެ ސަގާފަތެއް އުފެއްދުމެވެ.
މިއަދުގެ ރަސްމިއްޔާތުގައި ޕޮލިސް ކޮމިޝަނަރު، އަލީ ސުޖާއުއާއި ޑެޕިއުޓީ ކޮމިޝަނަރު އޮފް ޕޮލިސް، އިސްމާއީލް ނަވީންއާއި ޑެޕިއުޓީ ކޮމިޝަނަރު އޮފް ޕޮލިސް، ފަރުހާދު ފިކުރީ ވެސް ބައިވެރިވެވަޑައިގެންނެވި އެވެ.
