މިދިޔަ އަހަރުގެ ފަހު ކުއާޓަރުން ފެށިގެން ރާއްޖޭގެ އިގުތިސާދު ފުޅާވީ މިންވަރަށް ވުރެ، ރާއްޖެއިން ދަރަންޏަށް ހޯދި ފައިސާގެ އަދަދު ނިސްބަތުން މަދުވުމުން، ޖީޑީޕީގެ ނިސްބަތުން ރާއްޖޭގެ ދަރަނި ކުޑަވެއްޖެ އެވެ.
ފިނޭންސް މިނިސްޓްރީން އާންމުކުރި ކުއާޓާލީ ބުލެޓިންގައިވާ ގޮތުން ޖީޑީޕީގެ ނިސްބަތުން ރާއްޖޭގެ ދަރަނި މިހާރު ހުރީ 110.1 ޕަސެންޓުގަ އެވެ. މިދިޔަ އަހަރުގެ ފަހު ކުއާޓަރުގައި ދަރަނީގެ ނިސްބަތް ހުރީ 116.5 ޕަސެންޓްގައި ކަމަށް ވާތީ މިއީ 6.4 ޕަސެންޓްގެ ދަށްވުމެކެވެ.
ދަރަނީގެ ނިސްބަތް މިގޮތަށް ދަށްވި އިރު ރާއްޖޭގެ ގްރޮސް ޑޮމެސްޓިކް ޕްރޮޑަކްޓް (ޖީޑީޕީ) 107.2 އިން 114.6 އަށް ވަނީ މަތިވެފަ އެވެ. އޭގެ މާނައަކީ މިދިޔަ އަހަރުގެ ފަހު ކުއާޓަރަށް ވުރެ މިއަހަރުގެ ފުރަތަމަ ކުއާޓަރަށް އައި އިރު އިގުތިސާދު ބޮޑުތަނުން ފުޅާވުމެވެ.
ފިނޭންސްގެ ބުލެޓިންގައިވާ ގޮތުން މިއަހަރުގެ ފުރަތަަމަ ކުއާޓަރުގައި އެތެރޭގެ ދަރަންޏަށް 62.9 މިލިޔަން ރުފިޔާ އިތުރުވި އިރު އެތެރޭގެ ދަރަންޏަށް 1.4 ބިލިޔަން އިތުރުވި އެވެ. އެތެރޭގެ ދަރަންޏަކީ އާންމު ގޮތެއްގައި ރާއްޖޭގެ ކުންފުނިތަކަށް ބޮންޑް ވިއްކައިގެން ހޯދާ ފައިސާ އެވެ.
ފިނޭންސްގެ ހިސާބުތަކުގައިވާ ގޮތުން ދަރަނި އަދާކުރަން ހަރަދު ކުރި ފައިސާ (ޑެޓް ސާވިސް) އަށް ވެސް މި ކުއާޓަރުގައި ހަރަދުކުރި ފައިސާ ބޮޑުތަނުން އިތުރުވި އެވެ. ބޭރުގެ ދަރަނި އަދާކުރަން މިދިޔަ އަހަރުގެ ފަހު ކުއާޓަރުގައި 655.2 މިލިޔަން ރުފިޔާ ހަރަދު ކުރި އިރު މިއަހަރު 995.2 މިލިޔަން ރުފިޔާ ހަރަދުކުރި އެެވެ.
އެތެރޭގެ ދަރަނި އަދާކުރަން މިދިޔަ އަހަރުގެ ފަހު ކުއާޓަރުގައި 862.8 މިލިޔަން ރުފިޔާ ހަރަދުކުރި އިރު މިއަހަރުގެ ފުރަތަމަ ކުއާޓަރުގައި 1.2 ބިލިޔަން ރުފިޔާ ހަރަދުކުރި އެވެ.
