އެތަންސް، ގްރީސް (މެއި 30) - ފިއޮރެންޓީނާ އަތުން 1-0 އިން މޮޅުވެ، އޮލިމްޕިއާކޯސް އިން ޔުއެފާ ކޮންފަރެންސް ލީގު ކާމިޔާބުކޮށް ތާރީހުން ޖާގަ ހޯދައިފި އެވެ.
އޮލިމްޕިއާކޯސް އަކީ، ޔޫރަޕްގެ ބޮޑު މުބާރާތެއްގެ ޗެމްޕިއަންކަން ހޯދި ގްރީސް އަށް ނިސްބަތްވާ ފުރަތަމަ ޓީމެވެ. އަނެއްކޮޅުން، އިޓަލީގެ ފިއޮރެންޓީނާ އަކީ ކޮންފަރެންސްގެ ކުރު ތާރީހެއްގައި ދެ ފައިނަލުން ބަލިވި ފުރަތަމަ ޓީމެވެ. މިދިޔަ އަހަރުގެ ކޮންފަރެންސް ލީގުގެ ފައިނަލުން ފިއޮރެންްޓީނާ ވަނީ ވެސްޓް ހޭމް ޔުނައިޓެޑް އަތުން ބަލިވެފަ އެވެ.
މިދިޔަ އަހަރުގެ ފައިނަލެކޭ އެއްގޮތަށް ފިއޮރެންޓީނާ މި ފަހަރުގެ ފައިނަލުން ވެސް ބަލިވީ ފަހު ވަގުތުގަ އެވެ.
މި ފަހަރުގެ ފައިނަލުގެ އިތުރު ވަގުތުގެ ދެ ވަނަ ހާފުގައި އޮލިމްޕިއާކޯސް މޮޅުވި ލަނޑު ޖެހީ، އައްޔޫބް އެލް ކާބީ އެވެ. މިއީ، އެލް ކާބީ މި މުބާރާތުގައި ޖެހި 11 ވަނަ ގޯލެވެ.
އެންމެ ފަހުން ގްރީސް ޓީމަކުން ޔޫރަޕްގެ ފައިނަލުގައި ކުޅެފައިވަނީ، 1971 ވަނަ އަހަރު އެވެ. އެ ފަހަރުގެ ޔޫރަޕިއަން ކަޕްގެ ފައިނަލުން ގްރީސްގެ ޕެނަތަނައިކޯސް އަތުން ނެދަލެންޑްސްގެ އަޔަކްސް ވަނީ މޮޅުވެފަ އެވެ.
