ކަނޑުއަޑީގެ ދިރުންތަކާ ބެހޭ މާހިރު، އަހުމަދު ހާފިޒު އަވަހާރަވެއްޖެ އެވެ.
އަހުމަދު ހާފިޒު އަވަހާރަވީ މިއަދު މެންދުރުފަހުގެ ވަގުތެއްގައި އައިޖީއެމްއެޗުގަ އެވެ. ނަމަވެސް އަވަހާރަވީ ކޮން ސަބަބެއް މެދުވެރިވެގެން ކަމެއް އަދި ނޭނގެ އެވެ.
ހާފިޒް ވަނީ ޔޫތު މިނިސްޓްރީގެ ސްޓޭޓް މިނިސްޓަރުކަމާއި ފިޝަރީޒް މިނިސްޓަރީގެ ޑެޕިއުޓީ މިނިސްޓަރުކަމުގެ އިތުރުން ދިރާގުގެ ބޯޑު މެންބަރުކަން ކުރައްވައިފަ އެވެ. އޭގެއިތުރުން އޭނާ އަކީ ރާއްޖޭގެ މެރިން ރިސާޗް ސެންޓަރު އުފެދުނީއްސުރެއް އެތަނުގައި ހިދުމަތް ކުރައްވަމުން ގެންދެވި އިލްމީ ބޭފުޅެކެވެ. އޭނާ ވަނީ 1999 އިން 2004 އަށް އެ ސެންޓަރުގެ ޑިރެކްޓަރުގެ މަގާމު ވެސް އަދާ ކުރައްވައިފަ އެވެ. އަދި އޭނާ އަކީ ބާސްކެޓްބޯޅަ އެސޯސިއޭޝަންގެ ރައީސްގެ މަގާމު ވެސް ފުރުއްވި ބޭފުޅެކެވެ.
ކަނޑުއަޑީގެ ދިރުންތަކާ ބެހޭ މާހިރެއްގެ ގޮތުގައި ފާހަގަކުރެވޭ ހާފިޒްގެ ނަމުން ފަރު މަހަކަށް ނަން ވެސް ދީފައިވެ އެވެ.
ހާފިޒް ވަނީ ކަނޑުއަޑީގެ ދިރުންތަކާއި މަސްމަހާމެއްސާ ގުޅޭގޮތުން ވަރަށް ބައިވަރު އިލްމީ ދިރާސާތައް ކުރައްވައި ލިޔުންތައް ވެސް ޝާއިއު ކުރައްވައިފަ އެވެ. އެގޮތުން އޭނާ ވަނީ ދިވެހިރާއްޖޭގައި އާންމުކޮށް ބާނައި އުޅޭ މަސްމަހާމެއްސާ ގުޅޭގޮތުންނާއި މަސްވެރިކަންކޮށް ދިވެހީން ކުރިން އުޅުން ގޮތްތައް ވެސް ދިރާސާ ކުރައްވައި ލިޔުންތައް ޝާއިއު ކުރައްވައިފަ އެވެ. އޭގެއިތުރުން އޭނާ ވަނީ އެ މައުލޫގައި ބައިވަރު ފޮތްތައް ވެސް ލިޔުއްވައިފަ އެވެ.
އެގޮތުން ލިޔުއްވާފައިވާ ފޮތްތަކުގެ ތެރޭގައި ކޮމަން ރީފް ފިޝަސް އޮފް މޯލްޑިވްސް 1،2 އަދި 3 އާއި މޯލްޑިވްސް ޑައިވާސް ޕެރަޑައިސް ހިމެނެ އެވެ.
އީޕީއެސް ސްކޫލުން ތައުލީމު ހާސިލު ކުރެއްވި ހާފިޒް މެރިން ބަޔޮލޮޖީ އިލްމުގެ ތެރެއަށް ވަދެވަޑައިގެންނެވީ 1981 ވަނަ އަހަރު އޭރުގެ ސަރުކާރުން ދެއްވި ޓްރޭނިން ކޯހެއްގައި ތައިލެންޑަށް ވަޑައިގެން ކަނޑުގައި އުޅޭ މަސްމަހުގެ އަދަދުތައް ދެނެގަތުމާބެހޭ (ސްޓޯކް އެސެސްމަންޓް) ކޯހެއް ފުރުއްވި އެވެ. އޭގެފަހުން 1985 ގައި ކޮރެއާގައި ބޭއްވި ސްޓޮކް އެސެސްމެންޓު ކޯހެއްގައި ވެސް އޭނާ ބައިވެރިވެވަޑައިގެންނެވި އެވެ.
މަސްވެރިކަމަށް ހާފިޒް ކޮށްދެއްވަމުން ގެންދެވި ހިދުމަތްތަކުގެ އަގުވަޒަން ކުރުމުގެ ގޮތުން 1991 ވަނަ އަހަރު ކުރީގެ ރައީސް މައުމޫންގެ ސަރުކާރުން ވަނީ މަސްވެރިކަމަށް ހިދުމަތް ކުރުމުގެ ރޮނގުން އާންމު ހިދުމަތުގެ އިނާމު ވެސް އޭނާއަށް ދެއްވައިފަ އެވެ.
ފިޝަރީޒް މިނިސްޓްރީގެ ޕްރޮޖެކްޓްސް ޑިވިޝަންގެ އެސިސްޓެންޓް ސްޓެޓީޝަނެއްގެ ގޮތުގައި 1981، މެއި 30، ގައި ދައުލަތަށް ހިދުމަތްކުރައްވަން ފެށްޓެވި ހާފިޒް 33 އަހަރަށް ވުރެ ދިގު މުއްދަތެއްގައި ހިދުމަތުގައި ދެމިހުންނެވި އެވެ.
އަދާކުރެއްވި މަގާމުތައް
- ފިޝަރީޒް އެސިސްޓެންޓް
- ފިޝަރީޒް ރިސާޗް އޮފިސަރް
- ސީނިއާ ފިޝަރީޒް ރިސާޗް އެންޑް ޑިވެލޮޕްމެންޓް އޮފިސަރް
- އެސިސްޓެންޓް ޑިރެކްޓަރް
- ޑެޕިއުޓީ ޑިރެކްޓަރް
- ޑިރެކްޓަަރް ޖެނެރަލް (ފިޝަރީޒް މިނިސްޓްރީ)
- ޑިރެކްޓަރް ޖެނެރަލް ( ޑިފެންސް މިނިސްޓްރީ)
- ޑިފެންސް މިނިސްޓަރުގެ ނައިބުކަން
- ރައީސް އޮފީހުގެ އަންޑަ ސެކްރެޓަރީ
- ފިޝަރީޒް މިނިސްޓަރުގެ ނައިބުކަން
- ޔޫތު މިނިސްޓްރީގެ ސްޓޭޓް މިނިސްޓަރުކަން
މަސްވެރިކަމާއި ކަނޑުގެ ދިރުންތަކުގެ އިލްމުގެ އިތުރުން ހާފިޒްއަކީ ކުޅިވަރުގައި ވެސް ފާހަގަ ކޮށްލެވޭ ބޭފުޅެކެވެ. އޭނާ ވަނީ ކްލަބް ވެލެންސިއާއަށް ގޯލް ކީޕަރެއްގެ ގޮތުގައި ކުޅުމުގެ އިތުރަށް ބާސްކެޓު ބޯޅަ އެސޯސިއޭޝަނުގެ ރައީސްކަމުގެ މަގާމުގައި ހުންނަވައި މުހިންމު މަސައްކަތްތަކެއް ކުރައްވައިފަ އެވެ.
