މާލޭގެ ގެސްޓްހައުސްއެއްގައި ބިދޭސީއަކު ރަހީނުކޮށްގެން ގެންގުޅުނު މައްސަލާގައި ހައްޔަރުކުރި ދެ މީހުންގެ ތެރެއިން އެކަކު ދޫކޮށްލައި ދެވަނަ މީހާގެ ބަންދަށް 10 ދުވަސް ޖަހައިފި އެވެ.
ފުލުހުން ރޭ ބުނި ގޮތުގައި މި މައްސަލާގައި ހައްޔަރުކުރީ ބަންގްލަދޭޝްއަށް ނިސްބަތްވާ ދެ ފިރިހެނުންނެވެ. ރަހީނުކޮށްގެން ގެންގުޅެނިކޮށް ފުލުހުން ސަލާމަތްކުރީ ނޭޕާލުގެ ފިރިހެނެކެވެ.
އެ މައްސަލައާ ގުޅޭގޮތުން ފުލުހުން މިއަދު ބުނީ ހައްޔަރުކުރި ދެ މީހުންގެ ތެރެއިން އެކަކު ރޭގެ ވަގުތެއްގައި ދޫކޮށްލާފައިވާ ކަމަށެވެ. އަދި އަނެއް މީހާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އޭނާގެ ބަންދަށް ކޯޓުން 10 ދުވަސް ޖަހާފައިވާ ކަމަށްވެސް ފުލުހުން ބުނެފައިވެ އެވެ.
ފުލުހުން ބުނީ އެ މީހާ ބަންދުކޮށްގެން ގެންގުޅުނީ މާފަންނުގައި ހުންނަ ގެސްޓްހައުސްއެއްގައި ކަމަށެވެ. އެތަނުގައި ފުލުހުން އަދިވެސް ހަރަކާތްތެރިވަމުން އަންނަ ކަމަށް ފުލުހުންގެ މީޑިއާ ޑިޕާޓްމަންޓުން ބުނެ އެވެ.
ފުލުހުންގެ ތަރުޖަމާނު އަހުމަދު ޝިފާން "އަދަދު" އަށް ވިދާޅުވީ އޭނާ ސަލާމަތް ކުރިއިރު އެއްވެސް ހާނީއްކައެއްވެފައިނުވާ ކަމަށެވެ.
ސަލާމަތް ކުރި މީހާ މިހާރު މާފަންނު ޕޮލިސް ސްޓޭޝަނަށް ގެންގޮސްފައިވާ ކަމަށް ވެސް ފުލުހުން ބުނެ އެވެ. ފުލުހުން އަންނަނީ އެ މައްސަލަ ތަހުގީގުކުރަމުންނެވެ.
