ރާއްޖެ އާއި އިންޑިއާއާ ދެމެދު މިނިވަން ވިޔަފާރީގެ އާ އެއްބަސްވުމެއް ނުވަތަ ފްރީ ޓްރޭޑް އެގްރީމެންޓް (އެފްޓީއޭ) އެއް ގާއިމުކުރުމުގެ މަސައްކަތް ކުރަމުންދާ ކަމަށް އިކޮނޮމިކް މިނިސްޓަރު މުހައްމަދު ސައީދު އިއްޔެ ވިދާޅުވި އެވެ.
ދެކުނު އޭޝިއާގެ ގައުމުތަކުގެ މެދުގައި 2004 ގައި މިނިވަން ވިޔަފާރީގެ އެއްބަސްވުމެއް ސޮއިކުރި އެވެ. އެއީ ސައުތު އޭޝިއަން ފްރީ ޓްރޭޑް އެގްރީމެންޓް (ސަފްޓާ) އެވެ.
މި ސަރަހައްދު އިގުތިސޯދީ ގޮތުން ބާރުވެރިކޮށް ވިޔަފާރިއަށް ފަހިކުރުމުގެ ގޮތުން ސޮއިކުރި އެ އެއްބަސްވުމުގައި ރާއްޖޭގެ ބައިވެރިވުން ވެސް އޮވެ އެވެ. ނަމަވެސް, ވަކިވަކި ގައުމުތަކާ އެކު ރާއްޖޭން އެފަދަ އެއްބަސްވުމެއްގައި ސޮއިކޮށްފައި ނުވެ އެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ސައީދު ވިދާޅުވި ގޮތުގައި އާ އެއްބަސްވުމެއް ގާއިމުކުރުމަށް އިސްވެ އެދުނީ އިންޑިއާގެ ފަރާތުންނެވެ.
"އަޅުގަނޑު ވަރަށް ފަހުން އިންޑިއާ އާއެކު ކުރި މަޝްވަރާތަކެއްގައި އެ ބޭފުޅުން އިސްވެ ބޭނުންފުޅުވޭ ދިވެހިރާއްޖެއާ އެކުގައި ފްރީ ޓްރޭޑް އެގްރީމެންޓެއް އޮންނަން ވަކިން, އަދި ސަފްޓާގެ އިތުރަށް. ރައީސް އެވަނީ އެ ފުރުސަތު ހުރިހާ ގައުމަކާ އެކު ވެސް އޮންނަން," އޭނާ ވިދާޅުވި އެވެ.
އޭގެ އިތުރުން, މިހާރު އޮތް އެފްޓީއޭއެއްގެ ދަށުން 296 ބާވަތެއްގެ ސީފުޑް އެއްވެސް ޓެރިފަކާ ނުލައި މިހާރު ޗައިނާ އެކްސްޕޯޓު ކުރެވޭނެ ކަމަށް ވެސް އިކޮނޮމިކް މިނިސްޓަރު ވިދާޅުވި އެވެ. ޑިސެމްބަރު 2017, ގައި ސޮއިކުރި މި އެއްބަސްވުން މަޖިލިސް ފެށުމާ އެކު 'އެކްޓިވް; ވާނެ ކަމަށް ސައީދު ވިދާޅުވި އެވެ.
ހަމައެހެންމެ, ތުރުކީއާއެކު ގާއިމުކުރާ އެފްޓީއޭ އެއްބަސްވުން ވެސް އޮތީ އެންމެ ފަހުގެ މަރުހަލާގައި ކަމަށާއި އިނގިރޭސިވިލާތާއެކު ވެސް ވިޔަފާރީގެ ފުޅާ ސްކޯޕެއް ހިމެނޭ އެއްބަސްވުމެއްގައި ސޮއިކުރުމުގެ މަސައްކަތް ކުރަމުންދާ ކަމަށް ސައީދު ހާމަކުރެއްވި އެވެ.
އިންޑިއާއާއެކު ވިޔަފާރީގެ އެއްބަސްވުމެއް ގާއިމުކުރާއިރު، ކާޑުގެ ބާވަތްތަކަށާއި ބޭސްފަރުވާ އަދި ވިޔަފާރިއަށް އިންޑިއާ އަށް ބަރޯސާވުން ކުޑަކުރަން މަސައްކަތް ކުރާނެ ކަމަށް ރައީސް މުއިއްޒު ވަނީ ވިދާޅުވެފަ އެވެ.
ޕީޕީއެމް/ޕީއެންސީ އިދިކޮޅުގައި އޮތްއިރު އިންޑިއާ އަށް ވަރަށް ބޮޑަށް ފާޑުކިޔައި، އިންޑިއާ އައުޓު ކެމްޕޭނެއް ކުރިއަށް ގެންދިޔަ ނަމަވެސް، ވެރިކަމަށް ވަޑައިގަތުމަށް ފަހު ހެލިކޮޕްޓަރުތަކާއި މަތިންދާ ބޯޓު ފޮނުވައެއް ނުލި އެވެ. އަދި އެ އުޅަނދުތައް އޮޕަރޭޓުކުރަން ރާއްޖޭގައި ތިބި އިންޑިއާ ސިފައިންގެ ބަދަލުގައި ގެންނަން އެއްބަސްވީ، އިންޑިއާގެ އަސްކަރިއްޔާގެ ދަށުން ހިންގާ އެ ގައުމުގެ ސަރުކާރު ކުންފުންޏެއް ކަމުގައިވާ ހިންދުސްތާން އޭރޮނެޓިކްސްގެ ކޮންޓްރެކްޓުގައި ތިބި މީހުން ގެނައުމަށެވެ. އެއީ މަދަނީން ކަމަށް ދިވެހި ސަރުކާރުން ބުނަމުން ދިޔަ ނަމަވެސް، އިންޑިއާއިން ބުނަމުން ދަނީ އެއީ ގާބިލް ޓެކްނިކަލް މީހުން ކަމަށެވެ.
