ލަންޑަން (މެއި 21) - މެންޗެސްޓާ ޔުނައިޓެޑްގެ ފޯވާޑް، މާކަސް ރަޝްފޯޑް އަށް، އިންގްލެންޑުން ޔޫރޯ ފުޓްބޯޅަ މުބާރާތަށް ނެގި ޕްރޮވިޝަނަލް ސްކޮޑުން ފުރުސަތު ގެއްލިއްޖެ އެވެ.
އިންގްލެންޑުން ޔޫރޯ އަށް ނެގި، 33 ކުޅުންތެރިންގެ ޕްރޮވިޝަނަލް ސްކޮޑު މިއަދު ވަނީ އިއުލާނުކޮށްފަ އެވެ. ރަޝްފޯޑްގެ އިތުރުން ލިވަޕޫލްގެ ކުރީގެ ކެޕްޓަން، އަޔަކްސް އަށް ކުޅެމުން އަންނަ ޖޯޑަން ހެންޑަސަން އަށް ވެސް މި ސްކޮޑުން ފުރުސަތެއް ނުލިބުނެވެ.
މި ސީޒަނުގައި ރަޝްފޯޑް، 26، އަށް ލީގުގައި އޭނާ ކުޅުނު 33 މެޗުން ޖެހުނީ، ހަތް ގޯލެވެ. އަދި ދެ ލަނޑު ޖަހަން ފުރުސަތު ތަނަވަސްކޮށްދިނެވެ. މި ސީޒަނުގެ ތެރޭގައި އިންގްލެންޑުން ކުޅުނު ހަތް މެޗުގައި ރަޝްފޯޑް ކުޅުނު ނަމަވެސް، މާޗް މަހު ބެލްޖިއަމާ ދެކޮޅަށް ކުޅުނު މެޗަށް ނެގި ސްކޮޑުގައި ރަޝްފޯޑް ނުހިމެނެ އެވެ.
ރަޝްފޯޑްގެ ފޯމު މި ސީޒަނުގައި ވަރަށް ބޮޑަށް ދަށްވިއިރު، އޭނާ އަށް ޔުނައިޓެޑްގެ މެޗުތަކުން ވެސް ފުރަތަމަ އެގާރައިން ފުރުސަތު ލިބުން މަދުވި އެވެ.
ލިވަޕޫލް ދޫކޮށް މި ސީޒަނުގައި ސައުދީ ޕްރޯ ލީގުގެ އަލް އިއްތިފާގަށް ފުރަތަމަ ބަދަލުވި ހެންޑަސަން، ޖެނުއަރީ މަހު ވަނީ އަޔަކްސްއާ ގުޅިފަ އެވެ. ހެންޑަސަން، އަށް މާޗް މަހު ކުޅުނު އިންގްލެންޑް މެޗުތަކުގެ ސްކޮޑުން ފުރުސަތު ލިބުނު ނަަމަވެސް، ޔޫރޯގެ ސްކޮޑުގައި ލައްވާލާ ގޮތެއްނުވި އެވެ.
އިންގްލެންޑުން ނެގި 33 ކުޅުންތެރިންގެ ސްކޮޑުގައި ސީނިއާ ޓީމަށް މުޅިން އަލަށް އެރި ފަސް ކުޅުންތެރިން ހިމެނެ އެވެ. އެއީ ލިވަޕޫލްގެ ކާޓިސް ޖޯންސް އާއި ޖަރެލް ކުއަންސާ، އެވަޓަންގެ ޖަރަޑް ބްރަންތުވެއިޓް، ކްރިސްޓަލް ޕެލަސްގެ އެޑަމް ވާޓަން އަދި ބާންލީގެ ގޯލްކީޕަރު، ޖޭމްސް ޓްރަފޯޑް އެވެ.
ޔޫރޯ އަށް ސްކޮޑު ފައިނަލް ކުރަން ޖެހެނީ އަންނަ މަހުގެ ހަތް ވަނަ ދުވަހަށެވެ. ފައިނަލް ސްކޮޑު ނަގާއިރު އިންގްލެންޑުން ހަތް ކުޅުންތެރިން ބާކީވާނެ އެވެ.
