ހަތަރު މީހުންނާއެކު ހުކުރު ދުވަހު ގެއްލުނު ދޯނި ހޯދަން އިއްޔެ 6,240 އަކަ ނޯޓިކަލް މޭލްގެ ސަރަހައްދެއް ބެލި ކަމަށް އެމްއެންޑީއެފުން ބުނެފި އެވެ.
ދިވެއްސަކާއި، ބަންގުލަދޭޝްގެ ތިން މީހުން ދަތުރުކުރަމުން ދިޔަ "AAA-37" ނަމަކަށް ކިޔާ ދޯނި ތިލަފުށިން ފުރީ ހުކުރު ދުވަހު ހެނދުނު 6:00 ހާއިރު ކަމަށާއި، އެ ދޯނީގެ ހަބަރެއް ނުވެގެން ކޯސްޓްގާޑަށް ރިޕޯޓު ލިބުނީ އެ ދުވަހު ހަވީރު 5:20 ގައި ކަމަށް އެމްއެންޑީއެފްއިން ބުނެ އެވެ.
ދޯނި ހޯދުމުގެ އޮޕަރޭޝަންގައި ހޮނިހިރު ދުވަހު ކަނޑާއި ވައިގެ މަގުން މ. ރަތްމަންދޫ އިރުމަތީ ބިތުގެ 4519 އަކަ ނޯޓިކަލް މޭލު ބަލާފައިވެ އެވެ.
މި އޮޕަރޭޝަންގައި ޑްރޯންތައް ބޭނުމެއް ނުކުރެ އެވެ.
މާޗު މަހު ފަހުކޮޅު މ. އަތޮޅުން ގެއްލުނު ދޯންޏެއް ހޯދީ ޑްރޯން ބޭނުންކޮށްގެން ކަމަށް އެމްއެންޑީއެފްއިން އޭރު ބުނެފައިވެ އެވެ. އެ ފަހަރު އެ ދޯނި ހޯދުމަށް ރަތްމެންދޫއާ ދިމާ ކަނޑުގެ ސަރަހައްދުގެ 440 އަކަ ނޯޓިކަލް މޭލްގެ ސަރަހައްދެއް ބެލި އެވެ.
އެ ފަހަރު ޑްރޯން ބޭނުންކޮށްފައި، މިފަހަރުގެ އޮޕަރޭޝަންގައި ޑްރޯން ބޭނުން ނުކުރާތީ އެމްއެންޑީއެފްއަށް ދަނީ ފާޑުކިޔަމުންނެވެ.
ހުކުރު ދުވަހު ގެއްލުނު "AAA-37" ދޯނި ހޯދުމުގެ އޮޕަރޭޝަން ކުރިއަށް ގެންދަނީ މ. އަތޮޅުގައި ކަމަށް އެމްއެންޑީއެފުން ބުނެފައިވެ އެވެ. ނަމަވެސް، ޑްރޯން ބޭނުމެއް ނުކުރެ އެވެ. އަދި ބޭނުން ނުކުރާ ސަބަބެއް ވެސް ހާމައެއް ނުކުރެ އެވެ.
މި ދުވަސްވަރު މުޅި ރާއްޖެ އަށް މޫސުން ގޯސްއިރު، ބޯކޮށް ވާރޭ ވެހި، ވައި ބޮޑަށް ގަދަވެ، ކަނޑުތައް ވެސް ގަދަވެ އެވެ. އެހެންވެ، ދަތުރުފަތުރު ކުރުމުގައި ސަމާލުވުމަށް ވަނީ އިލްތިމާސްކޮށްފަ އެވެ.
ގެއްލިގެން ހޯދަމުންދާ ދޯންޏާ ބެހޭ އެއްވެސް މައުލޫމާތެއް ލިބިއްޖެނަމަ އެމްއެންޑީއެފް ކޯސްޓްގާޑުގެ ހިލޭ ގުޅޭ ނަންބަރު، 191 ގުޅައި މައުލޫމާތު ހިއްސާކުރަން ވަނީ އިލްތިމާސްކޮށްފައިވެ އެވެ.
ޑްރޯންތަކާ ގުޅޭ ގޮތުން ރައީސް މުއިއްޒު ދެއްވި ޔަގީންކަން
އެމްއެންޑީއެފްގެ އެއާ ކޯ އިފްތިތާހު ކުރުމާއި، އަންމޭންޑް އޭރިއަލް ވެހިކަލް (އޫއޭވީ/ޑްރޯން) ސިފައިންގެ ހިދުމަތަށް ތައާރަފް ކުރުމަށް މާޗު 15، 2024 ގައި ނ. މާފަރުގައި ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވީ ޑްރޯންތައް ބޭނުން ކުރަން ފެށުމުން "ހާލުގައި ޖެހިގެން ހޯދަންޖެހޭ މީހާ ނުހޯދިގެން މީގެ ކުރިން އުޅެންޖެހުނުހާ ގިނަ ވަގުތު، ދެން އުޅެންނުޖެހޭނެކަން ޔަގީންވެގެން އެބަދޭ."
"މި ދެންނެވި ނުވަ ލައްކަ އަކަ ކިލޯ މީޓަރުގެ ބޮޑު ސަރަހައްދަކީ، ދެން މީގެ ފަހުން ހަމަ ކޮންމެ ވަގުތުކޮޅެއްގައި ވެސް އަޅުގަނޑުމެންގެ ސާވޭލަންސްގެ ދަށުން ބެލެހެއްޓޭނެ ސަރަހައްދެއްކަން، އެގޮތަށް ހާލުގައި ޖެހޭ މީހުން ހޯދުމުގައި، އިސާހިތަކު އެކަން ކާމިޔާބު ކުރެވޭނެކަމުގެ ޔަގީންކަން އަޅުގަނޑުމެންނަށް އިރާދަކުރެއްވީތީ މި ލިބިގެން ދިޔައީ،" އެ ރަސްމިއްޔާތުގައި ރައީސް ވިދާޅުވެފައިވެ އެވެ.
ރާއްޖެއަށް ގެނެސްފައިވަނީ ތުރުކީން އުފައްދާ ޑްރޯން އެވެ. ދިވެހިރާއްޖޭގެ ކަނޑުގެ ސަރަހައްދު ބެލެހެއްޓުމަށްޓަކައި އަސްކަރީ ޑްރޯންތަކެއް ގަތުމަށް ދައުލަތުގެ ކޮންޓިންޖެންސީ ބަޖެޓުން 37 މިލިއަން ޑޮލަރު (569.8 މިލިއަން ރުފިޔާ) ދޭން އެއްބަސްވެފައިވާ ކަމަށް ކުރިން އަދަދު ނޫހުން ރިޕޯޓުކޮށްފައިވެ އެވެ. އެކަން ސަރުކާރުން މިހާތަނަށް ވެސް ދޮގެއް ނުކުރެ އެވެ. އަދި ބައެއް ޑްރޯންތަކަކީ ތުރުކީ ސަރުކާރުގެ ހިލޭ އެހީގެ ދަށުން ލިބިފައިވާ އާލާތްތަކެއް ކަމަށް ރައީސް މުއިއްޒު ވިދާޅުވެފައިވެ އެވެ.
އެއާ އިފްތިތާހުކުރި ރަސްމިއްޔާތުގައި ތިން ޑްރޯނެއް ދައްކާލި ނަމަވެސް، އެމްއެންޑީއެފް އަށް ހޯދަނީ ކިތައް ޑްރޯންކަމެއް ސަރުކާރުން އަދި އެމްއެންޑީއެފްއިން މިހާތަނަށް ހާމައެއް ނުކުރެ އެވެ.
.
