ނިކަމެތި، ކުޑަ ބުޅަލަކަށް ބަޔަކު އަނިޔާ ކުރުމަށްފަހު، ފޮށިގަނޑެއްގައި މޫދަށް ދޫކޮށްލައިފި އެވެ.
އެ ބުޅަލަށް އަނިޔާ ކުރާ މަންޒަރުގެ ވީޑިއޯތަކެއް އެކަން ކުރި މީހުން ވަނީ ސޯޝަލް މީޑިއާ ޕްލެޓްފޯމަކަށް ލައިފަ އެވެ. ޖަނަވާރުންގެ ހައްގަށް މަސައްކަތް ކުރާ މީހަކު ވަނީ އެ ވީޑިއޯތައް އެކްސްގައި ފުލުހުންގެ ސަމާލުކަމަށް ގެނެސްފަ އެވެ.
ވީޑިއޯތަކުން ފެންނަނީ ކުޑަ ކަޅު ބުޅަލަކާ ދިމާލަށް ބަޔަކު ވަޅިއެއް ދިއްކުރަމުން ކަކަކަކައަޅައިހޭ ތަނެވެ. އެ ސޮރު އެއިރު އޮތީ ތެމި ފޯވެ، ނިކަމެތި ހާލެއްގަ އެވެ. ދެން ފެންނަނީ ބުރިކޮށްފައި އޮތް ފުޅިމަދު ފޮށިގަނޑަކަށް ލުމަށްފަހު ބުޅާ މޫދަށް ދޫކޮށްލާ މަންޒަރެވެ.
މި ވީޑިއޯ އާންމުވެފައި މި ވަނީ ގއ. ވިލިނގިލީގައި ބުޅަލަކަށް އަނިޔާ ކުރުމަށްފަހު އަތުކޮޅަށް ހޫރާލި މަންޒަރުގެ ވީޑިއޯއެއް އާންމުވި ފަހުންނެވެ. އެ މައްސަލަ ތަހުގީގު ކުރަމުންދާ ކަމަށް ފުލުހުން ވަނީ ބުނެފަ އެވެ.
ބުޅަލަށް އަނިޔާ ކުރާ މައްސަލަ މިފަހުން ވަރަށް ބޮޑަށް ވަނީ އިތުރުވެފަ އެވެ. މާލެ ތެރޭގައި އުޅޭ ވަގު ބުޅާތައް މަރާ ސީރިއަލް ގާތިލެއް އުޅޭ މައްސަލައެއް 2019 ވަނަ އަހަރު ފެންމަތިވި އެވެ. އޭނާ ބުޅާ މެރީ އެސޮރުމެންގެ ބޮލުގައި އެއްޗަކުން ތަޅައިގެންނެވެ.
އޭގެ ފަހުން މިދިޔަ ނޮވެމްބަރު މަހު މަގުމަތީގައި އޮތް ބުޅަލެއްގެ ބަނޑަށް ވަޅިއެއް ހަރާލި މައްސަލައެއް ވެސް ފެންމަތިވި އެވެ. ވަޅި ހެރީ ބަނޑުބޮޑު ބުޅަލެއްގެ ބަނޑަށެވެ. ފުލުހުން އޭނާ ހައްޔަރު ކުރި އެވެ.
