ހުޅުމާލޭގައި ޕާކުކޮށްފައި އޮތް ވެހިކަލެއްގެ ތެރޭގައި މަރުވެފައި އޮއްވާ ފެނުނު މީހާގެ މަރުގައި ޝައްކު ކުރެވޭ ކަމެއް ނެތް ކަމަށް ފުލުހުން ބުނެފި އެވެ.
ބަންގްލަދޭޝްއަށް ނިސްބަތްވާ އެ ފިރިހެން މީހާ މަރުވެފައި އޮއްވާ އިއްޔެ ހަވީރުގެ ވަގުތު ފެނުނީ ހުޅުމާލޭ ފޭސް އެކެއްގެ ސަހަރާ ކުރިމަތީ ޕާކުކޮށްފައި އޮތް ވެހިކަލެއްގެ ތެރެއިންނެވެ. އޭނާ ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ފުލުހުން ބުނެ އެވެ.
ފުލުހުން ބުނި ގޮތުގައި އޭނާގެ މަރުގައި ތުހުމަތު ކުރެވޭފަދަ އެއްވެސް ކަމެއް މިހާތަނަށް ބެލި ބެލުމުން ފާހަގަ ނުކުރެވެ އެވެ. އެހެންވެ އެ މަރު އިތުރަށް ތަހުގީގުނުކޮށް، މިހާރު މަޝްވަރާ ކުރަމުން ދަނީ އޭނާގެ ހަށިގަނޑާ މެދު އަމަލުކުރާނެ ގޮތަކާ މެދު އޭނޭގެ އާއިލާއާ ކަމަށް ފުލުހުން ބުންޏެވެ.
މި ނޫހަށް އެނގިފައިވާ ގޮތުގައި މަރުވެފައި އޮތް މީހާ ފެނުނީ އޯޓީއޭ ލޮޖިސްޓިކް ސޮލިއުޝަންސް ނަމަކަށް ކިޔާ ކުންފުންޏެއްގެ ވެހިކަލެއްގެ ތެރެއިންނެވެ. އޭނާއަކީ އެ ކުންފުނީގެ މުވައްޒަފެއް ނުވަތަ ނޫން ކަމެއް އަދި ސާފެއް ނުވެ އެވެ.
