ދައުލަތުގެ ބަޖެޓުން ކައުންސިލުތަކަށް ކޮންމެ މަހަކު ދޫކުރާ ބްލޮކް ގްރާންޓް ލިބެން ދިގުލާތީ ބައެއް ކައުންސިލުތަކުން ކަންބޮޑުވުން ފާޅުކޮށްފި އެވެ.
މި މައްސަލައާއި ގުޅިގެން "އަދަދު" އަށް މައުލޫމާތު ދެއްވަމުން ވ. އަތޮޅު ކައުންސިލުގެ ރައީސް ޝުޖާއު އަލީ ވިދާޅުވީ މިދިޔަ ނޮވެމްބަރު، 2024، އިން ފެށިގެން ކޮންމެ މަހަކު ވެސް ފައިސާ ލިބުން ލަސްވާ ކަމަށެވެ. އަދި އެ މުއްދަތު ދިގުލައިގެން ގޮސް ފައިސާ ނުލިބި މަސް ދުވަސްވާ ކަން ފާހަގަކުރެއްވި އެވެ.
"ނޮވެމްބަރުން ފެށިގެން ފައިސާ ޖަމާނުވެ ލަސްވަމުން ގޮސް މިހާރު މަސް ދުވަސް އެބަވޭ. އަޅުގަނޑުމެން ދެން މިޖެހެނީ ހަރަދުތަކަށް ކައުންސިލުގަ އޭރު ހުންނަ ފައިސާކޮޅުން ނުވަތަ މަޝްރޫއުތައް މަޑުޖައްސާފަ އެ ފައިސާ ބޭނުންކުރަން،" ޝުޖާއު ކަންބޮޑުވުން ފާޅުކުރެއްވި އެވެ.
ބްލޮކް ގްރާންޓް ޖަމާވުން ލަސްވުމުގެ ސަބަބުން ކައުންސިލް ހިންގުމަށް ވަރަށް ބޮޑަށް ދަތިވާކަން ވިދާޅުވެ، ގަވާއިދުން އެ ފައިސާ ލިބޭނެ ގޮތް ހައްދާދިނުމަށް ޝުޖާއު ވަނީ އެކްސްގައި ކުރި ޕޯސްޓެއްގައި ވެސަ އެދިވަޑައިގަނެފަ އެވެ.
ޝުޖާއު އިތުރަށް ވިދާޅުވީ ބްލޮކް ގްރާންޓަކީ ކޮންމެ މަހަކު ވެސް މުސާރަތަށް ޖަމާވުމުގެ ކުރިން މަހުގެ 20 ހިސާބު ކައުންސިލުތަކަށް ޖަމާވާންޖެހޭ ފައިސާއެއް ކަމަށެވެ. ނަމަވެސް، ގަވާއިދުން ފައިސާ ޖަމާނުވާކަން އޭނާ ތަކުރާރުކުރެއްވި އެވެ.
މި ސަރުކާރުން ވަނީ ލާމަރުކަޒީ ނިޒާމްގެ ތެރެއިން ކައުންސިލުތައް ބާރުވެރިކުރުމަށް ގިނަ މަސައްކަތްތަކެއް އިއުލާނުކޮށްފަ އެވެ. އޭގެ ތެރޭގައި ރަށްރަށުގައި ހިންގާ ގެސްޓުހައުސްތަކަށް ލޯކަލް ޓޫރިޒަމްގެ ތެރެއިން ލިބޭ ޓީޖީއެސްޓީން ވަކި ޕަސަންޓެއް ކައުންސިލްތަކުގެ އާމްދަނީއަށް އިތުރު ކުރުމަށް ލާމަރުކަޒީ ގާނޫނު އަދި ޓޫރިޒަމް ގާނޫނަށް އިސްލާހު ގެނައުން ހިމެނެ އެވެ.
ފަޅުރަށްތައް ކުއްޔަށް ދޫކުރާ މުއްދަތު 25 އަހަރަށް އިތުރުކޮށްދިނުމާއި ކައުންސިލުތަކުގެ ބަޖެޓު އިތުރުކުރުމާއެކު، ކައުންސިލުތަކަށް އޮފީސް އިމާރާތްތައް އަޅައިދިނުމަކީ ވެސް މި ސަރުކާރުން ކައުންސިލުތަށް ބާރުވެރިކުރުމަށް ކުރަން ނިންމާފައިވާ ކަންކަމެވެ.
މީގެ އިތުރުން ލާމަރުކަޒީ ގާނޫނަށް އިސްލާހު ގެނައުމަށް މިމަހުގެ ތެރޭފައި ދިރާސާކުރަން ފަށަން ސަރުކާރުން ވަނީ ނިންމާފަ އެވެ.
