މިއަހަރުގެ މިހާތަނަށް ފުލުހުން ހިންގި އޮޕަރޭޝަންތަކުން 19 ކިލޯގެ މަސްތުވާތަކެތި އަތުލައިގަނެފައިވާކަމަށް ފުލުހުން ބުނެފި އެވެ.
ހޯމް މިނިސްޓްރީ އާއި އެ މިނިސްޓްރީގެ ދަށުގައިވާ އެޖެންސީތަކުން ކުރާ މަސައްކަތްތަކުގެ ތަފްސީލުދޭން އިއްޔެ ބޭއްވި ނޫސްވެރިންގެ ބައްދަލުވުމުގައި މައުލޫމާތުދެއްވަމުން ޗީފް ސުޕާއިންޓެންޑެންޓް އޮފް ޕޮލިސް، މުހައްމަދު ނާފިޒު ވިދާޅުވީ މިއަހަރުގެ މިހާތަނަށް 56 އޮޕަރޭޝަނެއް ހިންގައި 19 ކިލޯގެ މަސްތުވާތަކެތި އަތުލައިގަނެފައިވާ ކަމަށެވެ.
"އަތުލެވެވުނު މަސްތުވާތަކެތީގެ ބަރުދަނަށް ބަލާނަމަ ގާތްގަނޑަކަށް 19 ކިލޯގެ މަސްތުވާތަކެތި އަޅުގަނޑުމެން ފުލުހުންގެ ބެލުމުގެ ދަށަށް ގެނެސްފިން،" ނާފިޒް ފާހަގަކުރެއްވި އެވެ.
ސްޓްރީޓް ވެލިއުށް ބަލާނަމަ އެ ތަކެތީގެ އަގު 104 މިލިއަން ދިވެހި ރުފިޔާއަށް އަރާކަން ނާފިޒު ފާހަގަކުރެއްވި އެވެ.
ނާފިޒް އިތުރަށް ވިދާޅުވީ މިއަހަރުގެ މިހާތަނަށް ފަސް ޑްރަގް ކާޓެލް ބަންދުކުރެވިފައިވާ ކަމަށާއި، މަސްތުވާތަކެތީގެ މައްސަލަތަކާއި ގުޅިގެން 13 އުޅަނދެއް ބަލައި ފާސްކޮށްފައިވާ ކަމަށެވެ. އަދި މަސްތުވާތަކެއްޗާއިއެކު މިއަހަރު 260 ދިވެހިންނާއި 16 ބިދޭސީން ހައްޔަރުކޮށްފައިވާކަމަށް ވިދާޅުވި އެވެ.
އެގޮތުން މިއަހަރުގެ މިހާތަނަށް މަސްތުވާތަކެތީގެ 257 މައްސަލައެއް ފުލުހުންގެ އިދާރާއިން ތަހުގީގުކޮށްފައިވާއިރު، އޭގެ ތެރެއިން 95 މައްސަލައެއް ޕީޖީއަށް ހުށަހަޅާފައިވާކަމަށް ވިދާޅުވި އެވެ.
