އިންޑިއާ އަސްކަރިއްޔާއިން ހަދިޔާކޮށްފައިވާ ވައިގެ ތިން އުޅަނދު ދުއްވުމުގެ ގާބިލުކަން ހުރި ސިފައިން އެމްއެންޑީއެފްގައި އަދިވެސް ނެތް ކަމަށް ޑިފެންސް މިނިސްޓަރު މުހައްމަދު ގައްސާން މައުމޫން ވިދާޅުވެއްޖެ އެވެ.
ގައްސާން މިހެން ވިދާޅުވީ، އެ އުޅަނދުތައް ދުއްވުމަށް ރާއްޖޭގައި ތިބި އިންޑިއާ ސިފައިންގެ 76 މީހުން ފޮނުވާލާ ބަދަލުގައި އެ ގައުމުގެ މަދަނީން ގެނައުމުގެ ތަފުސީލު ދޭން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގަ އެވެ.
އެބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ގައްސާނު ވިދާޅުވީ، މީގެ ކުރީ ސަރުކާރުތަކުން ހަދާފައިވާ އެއްބަސްވުމުގެ ދަށުން ޑޯނިއާ އަދި ދެ ހެލިކޮޕްޓަރު ދުއްވުމުގެ ތަމްރީނުތައް ފަށާފައި ތިބި ސިފައިން ތިބި ނަމަވެސް އެކަމުގެ ގާބިލުކަން ހުރި ސިފައިންގެ މީހަކު ނެތް ކަމަށެވެ.
"އެކި މަރުހަލާތައް ކަޑައްތު ކުރަންޖެހޭ ޓްރެއިނިންއެއް ވީމަ، ކޮމްޕްލީޝަން އާ ހަމައަށް އަޅުގަނޑުމެންގެ ސިފައިންނަކަށް އެކި ސަބަބުތަކާހެދި ދެވިފައެއް ނެތް، އެހެންކަމުން މިވަގުތު އަޅުގަނޑުމެންގެ ފޯސްގައެއް އޭއެލްއެޗް ޕްލެޓްފޯމާއި ޑޯނިއާ ދުއްވަން ލައިސަންސްޑް އަދި ފުލީ އޮޕަރޭޝަނަލް ވެފަ ތިބި މީހުނެއް ނެތް،" ގައްސާން ވިދާޅުވި އެވެ.
ގައްސާން މިހެން ވިދާޅުވި ނަމަވެސް ނިމިދިޔަ ފަސް އަހަރު އެ ބޭފުޅުން އިދިކޮޅުގައި ތިއްބަވައިގެން މި މައްސަލާގައި ސަރުކާރަށް ފާޑުވިދާޅުވެ، އެމްއެންޑީއެފްގައި އެ ގާބިލުކަން ހުރި ސިފައިން ތިބި ކަމަށްވެސް ވަނީ ވިދާޅުވެފަ އެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި ގެނައި ހެލިކޮޕްޓަރާއި ކުރީގެ ރައީސް އަބްދުﷲ ޔާމީނުގެ ވެރިކަމުގައި ގެނައި ހެލިކޮޕްޓަރު އަދި ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ގެނައި ޑޯނިއާ އާއެކު އިންޑިއާ ސިފައިން އައި މައިގަނޑު އެއް ސަބަބަކީވެސް ދިވެހިން ތަމްރީން ކުރުމެވެ.
މިހާތަނަށް އެކަން ވެފައި ނުވާއިރު، އިންޑިއާގެ މަދަނީން ގެނައުމަށް ވެވުނު އެއްބަސްވުމުގައިވެސް ދިވެހިން ތަމްރީނުކުރުމުގެ ވާހަކަ ހިމަނާފައިވާ ކަމަށް ފޮރިން މިނިސްޓަރު މޫސާ ޒަމީރު މިއަދު ވިދާޅުވި އެވެ.
